A kicing lungnopna Pasian’ sung bekah om ~ David Tuang

A kicing lungnopna Pasian’ sung bekah om ~ David Tuang

Mi khat in lungnopna kicici pen koi-ah om dinga, koi pan hong pai himawk hiam ci-in zon ding hong kipan hi. Paak huan khat ah hong pai leh nungak khat leh tangval khat ki-it tuak mahmah in kikawi kawm sa-in nuih mai takin a tukhawm hithiat hong mu hi. Hi te nih bangzah takin lungnop ding uh hiam, ka zonzon lungnopna pen hi bangdante hilo maw, ci-in amah zong lawm ngaih zon ding hong kipan hi.

Tua leh khatvei, paakhuan sungah mi vak tam thei aitak teh kei ading mi khatpeuhpeuh a awng lai kha hiam, va khuadak dih ning ci-in tua paakhuan ah a va pai leh a muh ngei a ki-it tuak mahmah lawm kingaite nih pen na kitawng/kisel ziahziah in na kap keei mawk uh ahih manin, aw..ka zonzon lungnopna pen hibang te sungah zong om tuak lo pi, ci-in lawm ngaih zon ding hong khawl hi.

Khatvei khuapi sung kimawlna(games)sai nasia mahmah khat mai-ah lam siau in a pai laitakin mawtaw hoih mahmah khat mu-a, tua mawtaw hong khawl lian leh mawtaw sung pan manlang takin mikhat hong taikhia pah setset in, kong khak hong hon khiat lian leh, a nasia mahmah a pong checha mihau khat mawtaw sung pan hong pusuakkhia lian hi. Aalah…hih mihaupa bangzah takin a lungnuam ding, hi zah val lungnop nading om nawn mawk ding hiam ci-in, amah zong mihau ut luatna lungsim hong khang vat ahih manin, sum neih sun teng tawh hih games sai-ah kimawl ning ei, ci-in games sai sungah hong lut pah lian hi.

A enn mahmah mihaupa’ kimawl dan bang dan hi peuhmah hiam, kei kimawl ma tawm en phot limlim ning ci-in tawmvei sung a et leh mihau mahmahpa pen hong sumh dikdek a, a khua ul nel tolh ziahziah kawmin a kha kuun ngiungeu a muh teh, aw..lungnopna pen hauhna sungah zong om peuhmah kei ei cih thu hong mu khia leuleu ahih manin, a kimawl sawm games zong kimawl ngam nawn loin inn lamah hong ciahkik hi.

Tua leh zingsang khat lam siau in hong pai leh, nupi ahi ningneng khat lam kiangah van zuakin tu hithiat kawmin Lai Siangtho simin na om hi. Nupi nu pen lam gei-ah van zuak khat ahih hangin, zingtungtung in hibang a nuih mai zo hiuhiau mawk cih pen lamdang sa mahmah a, nupi nu’ omzia limlim lungnop tuak sa lua ahih manin nupi nu’ kiangah va neh pah a, “nang pen na lungnop tuak lua hi, lam gei-a van zuak khat zingtungtung in nuihmai hiuhiau cih pen koi pana hong pai lungnopna himawk hiam,” ci-in nupi nu kiangah hong dong hi.

Nupi nu in zong, “Himah hi, eite’ zon tawm nopsaknate’ sungah lungkimna leh lungnopna om ngeilo a, hih ka simsim Lai Siangtho sunga om a nungta Pasian’ kammalte in ka nuntakna hong nosuaksak in ka lungsim, ka kha leh ka pumpi hong cidam, hong thahatsak ahih manin, Pasian’ hong piak nopsakna a ngah ka hi-a, tua Pasian’ hong piak nopsakna sungah lungkimna leh lungnopna a kicing in om hi,” ci-in dawngkik hi.

Hi takpi hi. Mihingte ki-it kingaihna sungah lungnopna taktak omlo hi(ki khenna leh khitui luanna tawh kizom thei hi). Hauhna sungah zong lungnopna taktak om tuan lo hi(lungkham mangbatna khawng piang thei zaw hi). Pasian’ sung bekmah ah a kicing lungkimna leh lungnopna taktak om hi. Amen! Khris sungah, David Tuang