Online pan US$60 Million val mikhemkhempa ki manta

Online pan US$60 Million val mikhemkhempa ki manta

Internet Online tungtawn in mi uptheihtheih dingin Scam atuamtuam tawh ngianzong in akhemkhem makaipipa kiman khiata cih Interpol (International Police Organisation) te’n Monday ni in genkhia uhhi.

Tua makaipipa pen Nigeria gammi hi a, Port Harcourt City pan ahihi. Kum 40 valkhin a, “Mike” cih mintawh aki theizaw khat ahihi. Interpol te genkhiatna ah hihpa makaihna leh vaihawmna tawh Online Scam tuamtuam panin mi akhemna pan sum US$50 Million val khemkhinding cihi.

Hih Online kikhemna cihte pen namtuamtuam omding himah taleh khatveivei na email sungkhawng panin midang te kiangah huhna na ngen kawikawi cihdan tezong hipah hi. Zomi makai te email sungkhawng panin email hongki khahkhia a, keipen tua gamsung ah kazin laitak ka sumbawl leh kavanteng mangsak ingin, ka ciahkik nading, vanleng saapding, Hotel saapding tuazah nong khak theiding cihte nengneng pen omden hi.

Adang khatleuleu ah keipen kum tamluata in, ka neihsa tengpen mimuanhuai khat khutsung ah ap nuam ing. Tuaban bawltheih nading in kumpi tungah Register nabawl masak nading sum tuazah hongkhak lecin, ka neihsateng nang khutsung ah hong piatheining cihkhawng zong Spam Email tammahmah thei a, pawlkhat in na umtakpi ahih manin khem athuak Zomi sungahzong omngei hi.

Hihbang kikhemna panin khatvei khembekbek tawh US$15.4 Million tak khem thuak in apiakha zong omngei ci’n Interpol te’n genkhia hi. Hih Online mikhemkhempa amattheih nading in Nigeria gamsung aom “Economic and Financial Crimes Commission” cih Anti-graft Agency tetawh mapangkhawm in Interpol te’n amat khiat uh ahihi.

Hihbang kikhemna pen Email tungtawn in hiphadiak ci a, Australia, Canada, India, Malaysia, Romania, South Africa, Thailand, United States cih gamsungteng hiphadiak cihi. Mite khemsa ihthuak lohding kidawm ni. ZD Sawltak #zomidaily