Om hithiat un, Topa’ hotkhiatna mu un ~ Thang Van Lian

Om hithiat un, Topa’ hotkhiatna mu un ~ Thang Van Lian

Izipt gam pan lungdam maitai takin a paikhiat khit uh a sawt loin a mai uhah San Tuipi na om mawk hi. A nung hei uh ciangin Izipt galkap honte in a pha ding hi ta hi. Mainawt thei lo, nung kik ding ci leh lah nungkik thei tuan lo uh hi. Tua laitakin mipite in:

• Ci ta mang ing!
• Hong paikhiatpih kei in ka cih mah hi lo hiam?
• Kote kivuina ding Izipt ah han om loh manin sehnel gamah hong paipih na hi hiam?
• Sehnel gam a sih sangin Izipt mite’ nasep ding kote adingin hoih zaw hi!

Cih bangin phun keei, hang sausau keei mawk uh a, Pasian in phal lo hi kei leh makai Moses bang a vua nuam a that nuam om tuak phial uh hi.

Lawhcinna a om laitak pahtawi ding a kilawmte bang mangngilh zawzenin nuam kisa thei gige hi. Haksatna hong tun leuleu ciangin a den a lawhcinnate mangngilh in makai a gim taktakte mawhsakna leh zungkawkna pen tang lai pek pan na om ngei khin zo ahi hi.

Tua bang hun laitakin Moses in mipite kiangah hi bangin gen hi.

• Izipt galkapte kihta kei un.
• Kip takin ding un.
• Topa’ nasepna lamdang mu un.
• Tuni a na muh uh hih Izipt galkapte na mu kik ngei nawn kei ding uh hi.
• Topan hong dosak ding hi.
• Note na om hithiat ding uh hi bek hi.

Moses kammalte lak pan tuni-in eite adingin “NOTE NA OM HIT HIAT DING UH HI BEK HI” cih kammal i lungngaih khop ding i deih hi. Om hithiat hun ding leh sat sesu hun ding khinkhai siam ni. Kim leh pam ah buaina leh haksatna hong om ciangin mipi patau sesu den hi. Tua in phattuamna sangin buaina kibehlapsak zaw sop den hi.

Tuni-in thu-um mite patau sesu lua loin phun leh han ding bek thei samsam pong mawk loin Topa in bang gen a, i makaite in bang hong ci makaih sawm hiam, cih ngak in om hithiat dan siam dingin i kizawn nuam hi. I teel zawk sawn ding a om loh ciangin dai hit hiat leng kinavak baih zaw leh khua kimu zaw hi.

Lungkham kibehlapna ding thute hawm sawnsawn se loin mipi’ khamuanna ding lam lim ngaihsut ni. Mipi khamuanna ding deih sia lua, thuman kimuhbawl, cih lah hong hi thei tuan lo zel ding hi. Lau huai hi, kidawm ni… ci-in kumpi hong gente ei tawh kituak zuih zawh dingte zuih sawm ciat ni. Eima mimal upna bang midangte in na nei khin sam lo ding ahih manin upna neute ci-in kuamah kizahpih bawl se kei ni.

Ei kia bek a tolten hi loin mipi tawh a kimu a kisawhkha den ihih manin kumpi leh makaite hong makaihna ah lungkim dan kisin ni. Israel mite nuntakna i et ciangin a phun hat luate leh makai simmawh bawl luate met het lo uh hi. En huai khol lo hi.

Topa’ nasepna lamdangte na mu ding uh hi, ci-in Moses in a gen bangin zing leh thai ah a sawt loin Corona virus hong bei siang ding hi, cih lametna tawh i omna ciat pan thungetna tawh mapang ciat ni.

Mipi’ kimuhkhopna mun tampite leh i Biakinn i khakna zong Pasian leh hong uk kumpite thu i manna hi a, i mihingpihte tungah nahoih a sem ihih lam mangngilh kei ni.

Moses in mipite tungah, “Kihta kei un, kip takin om un. Amah in note adingin tu ni a hong sep ding TOPA’ hotkhiatna mu un; bang hang hiam cih leh tu ni a na muh uh Izipt mite, note in na mu kik nawn kei ding uh hi. Topa in note adingin hong dosak ding a, note ahih leh na om hithiat ding uh hi bek hi, a ci hi. (Paikhiatna 14:13-14). Thang Van Lian