Oklahoma Zomi National Day (2015) vai zaksakkik na

Dear it leh ngaih Zomi Innkuan Oklahoma kipawlna sunga om Zomi teng

I ngaklah mahmah kum khat a khatvei tabek i neih i Zomi Nam Ni zong tunitak ong tungding hita hi. Zomi hing a kici peuhmah pello in paisawmtek ni. hih pawi hunsungah Zomi ngeina laam tuamtuam, Zogam leh Zomi itna langaih nono, Zomi te khantohna ding, kipumkhat nading thuhoih nono genkhiatna kinei ding hi. hih pawi hunsungah Non- Zomi lengla zahtak zong pawlkhat ongpai ding a hihmanin i nikten i puansilh te Zomi tawh a kilawm pen dingin nong kizep nong kithawi na dingun zong i ki hanthawn phapha hi.

Hih pawi hunsungah Zomi ngeina tawh kilawm nikten puansilh ong silh te ong kitelkhia dinga pahtawina ong kipia ding hi. tua pahtawina a kipia ding teng pen naupang numei 1, pasal 1, nungak 1, tangval 1, nupi 1, Papi 1, cihbangin Zomi Nam Ni tawh a kilawm niktenpuansilh ong silh a hoihpen mi 6 ong kitelkhia ding hi. tua hihmanin hih pahtawina ngah dingin a kua mapeuh nong kithawi tek nadingun a kitheisak phapha hi ni. tunitakciang Zomi Nam Ni ah kimu ngeingai ni ei.