Nuu’ Paa’ ihcih …?

Nuu’Paap’ ihcih …?

Nuu’paa’ icih akhiatna taktak bang ai’tam?Nuu’paa’ cih pen numei khat leh pasal khat kiteeng acihna hiziau beklo dinga Nuu’paa’ cih kammal sungah thusim pawlkhat omngeel ding hi.

Nuu’ in apian’na innlelo behlephung nulepa sanggam te nusia ngamin anuntak sung ading a, ateel Paa’ kiang azuan ahi hi.Paa’ in zong anuntak sung tawntung ading a, a aituam teelkhiat Nuu’ ahi hi.

Ahang in, pian’na nulepa sanggam te tawh Nuu’paa’ hilo ihih manin ki omkhawm den lodinga kikhen khiat a tuam omhun hong omding ahi hi.

*Nuu’paa’ pen nambat khatna tuak a kikoih a, aki it pen ding te hi.

*Aki neekngaih pen, aki hehpih pen, aki khual pen ding te hi.

*Nulepa sanggam te’tunga………………….
…..agenkhiatloh uh aki gen te hi.
…..alahkhiatloh uh aki lak te hi.
…..apiakkhiat hetloh uh aki pia te hi.

Ahang pen inu ipa isanggam te tawh Nuu’paa’ ihihloh hang ahi hi.

Tanu tapa te akum uh hongcing ta, nungak tangval hong hita uh a, amau zong a Nuu’paa’ pihding ciat hong zong uh hi.Amau Nuu’paa’ ciattek mah hongki neekngaih pen pahlel uh hi.

Alim a al khatpeuh zong amau Nuu’paa’ ciatmah hongki baak hongki tulh lelta uh hi.

Tuani takteh, na tapa, na tanu,na mo, na maak te’n ei’lungsim bangin hongdon hongkhual hong neekngaih zolo khathei mah ding hi.

Tuabang hunteh ei’ Nuu’paa’ teek tegel mah I ki it seemseem ding ahi hi.

I tapa lah azi ata, asunghte teng tawh hongki buaisak niloh kha lel ding hi.

Ikaam aphat leh I tanu te’aa hoh ivalhzaw khathei ding uh hi.

Tanu tapa te’n zong nute pate’ hong itna khawng hawmthawh mawkmawk kha kei ni.Hibang dinmun ciang hongtun’ nute pate itna mangngilh hetkei ni. I zi/pasal in inulepa sanggam te hongit hong zahtak sak dingpen ei’mau tungah kinga hi.

A taktak in ci lehang, inu leh ipa pen amau geel ki it kingai ahih manvua Nuu’paa’ ana suak uh hibek a, ei a tate hongit manvua aki teenguh hilo hi.

Bangbang hileh,itapa imo te’n hong it hong khuallo in,Itanu leh itu imaak te’n hongvaan’ hong don’kei phial lezong….,

khasiat ngaihsut keilel ni.Amau te’hang a aki teeng ihihloh lamtak phawkni.

Ei Nuu’paa’ mah ki it zungzungh, kingaih ngaungau sawm ni.Zawng in ngauphial taleeng ei ki it leeng mi hampha kihi lel hi.

Leitung ah mi hamsia penpen tawpna in….. asi lah hisam lo, ki hingkhen a tate tagah asuaksak te mah hampha sakei pen ing.

Awmsung suak……
Mun Khai’pa.
KL, Mlsia.