Malaysia, Penang ah nupa kitawngin, apasal in azikhut tankhiatsak

Malaysia, Penang ah nupa kitawngin, apasal in azikhut tankhiatsak

Malaysia, Penang Island tung aom Balik Pulau ah nupa kitawng in, apasal in azi akhut langkhat tankhiatsak cih theStar pan kiza hi. Tuni Sunday (Aug 12) ni in thupiang hi a, khutlangkhat tankhiat athuak numeinu pen kum 24 aphakhin khat ahihi.

Nupa kitawng in kam kinialgawp uh a, tuakhit ciangin apasal in azi pen Bayan Lepas sung aom Condominium Apartment Block ii dawlthumna Car Parking ah akhut alangkhat atankhiatsak ahihi.

Tuabangin azikhut atansakpa pen kum 39 aphakhin khat hi a, atankhiatsak khitciangin taikhia vingveng hi. Ahi zongin asuahtakna pen sauvei kikhomlo in, buaina apianzawh nai 3 khitciangin tuapa pen Police te’n Macallum Street Ghaut geinai ah aom Surau pualam ah mankhiapah uhhi.

Hihvai tawh kisai in palik thunei ahi Balik Pulau OCPD Supt A.A. Anbalagan in agenna ah buaina apianhun pen Sunday zingsangtunglam 1am hunpawl ci a, azi akhut atansakna temta leh Bag khatzong aphual ah kimukhia cihi.

Hihbangin azi ii akhut atansak lawmlawmpen ki hazatna tawh kithuhkikna (revenge and jealousy) in akitansak hiding hi. Azi pen abeisa kum 2 hunpawl akipan midang khattawh kithuahsim theizel kici a, tuapen apasal hehmahmah in tuahangin azi ii akhut langkhat atankhiatsak hiding hi ci’n Police thunei te’n genkhia uhhi.

Athu akikanbehna ah tuate nupa pen kikhen nading “divorce” abawlsawm laitak uh ahihi. Tua kawmkal ah apasal in hihbangin akhut tansak ahih manin, kimanpah a, thusitna neihdingin kikemphot hi. Hihpa pen abeisa inzong midangte van guksakna leh guihtheih khamtheih zatna “Drug & Theft” tawh thunawngkai aneigei, Criminal Record aneikhat kici hi.

More: Pasal khatin Porn Video a etkawm in azahmawh leh apumpi temtawh kuikekgawp

Tua ahih manin, apasal pen “Section 326 of the Penal Code” thukhun ombangin hiamtawi in midang liamsakna cihtawh thu kibawlding hi. Azi pen Penang Hospital ah zatui zaha akibawlsan laitak ahihi. Aki itmahmah nupa tepen akitot akisiat uhciangin lauhuai mahmah hi. Itpenpen tezong gallian penpen suaktheimawk hi. Sawltak #zomidaily