Vanleng sungah nupa ki totgawpna hangin “Emergency Landing” kibawl
Vandawn ah alengdiaidiai vanleng sungkhatah nupa kopkhat kitawnggawp dihdih uh ahih manin, cihnading kithei nawnlo a, amanlang in tua vanleng pen Emergency Landing kibawl cihi. A pasal pen numeidang khattawh asim gamtatna teng azi in vanleng sungah mukhia dihdih ahih manin, abuaigawp uh ahihi.
Tua vanleng pen Qatar Airways hi a, abeisa Sunday ni in thupiang ahihi. Hih Qatar Airways vanleng pen Qatar gam ii khuapi Doha City panin Indonesia, Bali zuanin alen laitak ahihi.
Hih vanleng sungah buaina apiangsak pen nupakop tepen ata naupang khattawhzong atuamkhawm cih India’s Hindustan Times te’n genkhia hi. Vanleng sungah apasal a ihmut laitak in, azi in a Mobile Phone etsimsak hi. Tua Mobile Phone pen mimawkmawk in a ettheih lohding in, Fingerprint-protected Password akoih hi a, azi in apasal a ihmut laitak in akhutme tawh tua Mobile Phone honsimsak hi.
Apasal Mobile Phone sungteng aphehphehleh apasal pen numei adangkhattawh a utbang in agamtata ahihlam atheihkhiat ciangin azizong hehmahmah a, a ihmu hithiat kimlai apasal pen saksukpah hi.
Vanleng sungah nasem Cabin Crew te’nzong lenhuan in, khensawm uhhi. Ahi zongin azi pen hehlua mahmah ahih manin, ki lencip theilo “Out of Control” hiliang ahih manin, anunung ah vanlenghawl Pilot pa’n amanlang in vanleng kumsukding khentat hi.
Qatar gam panin Indonesia gam zuanin alengkimlai, vandawn ah buaina apian ciangin akinai penpen ahi India gam ii Chennai City sung aom vanlengtual ah geelkholhna omlopi in Emergency Landing bawlsak hi.
More: Vanleng tualpi sungah nupa kibuan dihdih ahih manin, vanleng ziakaisak
Tua Chennai City ah akitawng nupa tenih leh ata ki kumsak in, tuakhit ciangin Indonesia gamlam zuanin tua vanleng lengkhiakik leuleu hi. Tua nupa tepen Chennai Airport ah zankhat kikem in, tuakhit ciangin Kuala Lumpur zuanin Batik Air Flight tawh lengkhia cih kiza hi. Nupa kopkhat hangin khualzinmi Passenger tampitak in buaipih mahmah uhhi. Tuaban ah khatlekhat Mobile Phone khawng ki etsak, ki sitsak zelzel dingzong thupileh kilawm hi 🙂 Sawltak #zomidaily
Comment piaknop aomleh...