Numeino kum 5 bek aphapan khat apu in zahmawhvai tawh bawlsia

Numeino kum 5 bek aphapan khat apu in zahmawhvai tawh bawlsia

Anu leh apa aki khenkhit ciangin akemding omlo ahih manin, apu api te’n akep uh ahihi. Ahi zongin tua numeino kum 5 bekbek aphapan pen apu in zahmawhvai tawh nabawlsia “Sexually Molested” cih theStar pan kiza hi. Tua abawlsia apu pen apu taktakbel hisamlo a, apukik “Step-grandfather” ahihi.

(Note: Zomi sungah Nukik leh Pakik cihte kizakha zelzel himahleh Pukik leh Pikik pen ki tamzak khollo hi. Ahi zongin Step-grandfather himawk ahih manin, Pukik kongcih uh ahihi.) Malaysia, Sarawak State sung aom Miri City sungah thupiang hi a, numeino akibawlsiat pen February khakipatlam ahihi.

Numeino ii anupen kum 21 bek hipan a, apa tawh aki khenkhit ciangin pasal neikik ahih manin mundang ah omsan a, numeino pen api leh apukik in akep uh ahihi. Khatvei anu ahawhlaitak in atanu zahmawhvai tawh kibawlsia cih mukhia hi.

Anu inzong atheihphet in Miri Police te kiangah nung Tuesday ni in Police Report bawlpah a, abawlsia apuzong kiman pahhi. Apukik pen kum 40 gualpawl kici hi.

Anu in Police Report abawlna ah hih numeino pen apasal masa tawh ta khatbek aneih uh cihi. Khatvei atanu omna ah ahawh laitak in atanu in anu kiangah azahmawh na asaklam genkhia a, tuapan in bangcinat cih adot ciangin apukik in abawlsiatlam genkhia hih manin, tuapan aki theikhia ahihi.

Miri police chief Asst Comm Khoo Leng Huat kicipa inzong hihvai tawh kisai in gencianna neikhia a, tua abawlsiapa “Suspect” pen Tuesday nitaklam in Pujut Corner aom Coffeeshop khatpan kamankhin uhhi ci’n genkhia hi.

Miri Police te’n hihvai kancianna, velcianna neiding uh cih kiza hi.

More: Sangsia khatin sangnaupang numeino khat buan, kum 24 thongkiading

Malaysia gamsung ah hihbangdan zahmawhvai thupiang tamdeuhhiam, apa in buan cihmah, sangsia in sangnaupang buan cihmah, apano in buan cihmah, apukik nangawn in buan cihmah thuthang ginalo tuamtuam tamphadeuh hi. Ei kipawlna, ei innkuan baangkuasung, ei Community sungah hihbangdan aomlohding, aomkhakleh aomzia bangci ziatheihding, bangci bangin Report bawlding cih theihsaknop manin Zolai tawh hongki suaksak zelzel ahihi. ZD Sawltak #zomidaily