Numei tungpan pasalte lamet lianpen ~ Job Cinpi

Numei tungpan pasalte lamet lianpen ~ Job Cinpi

Numei in pasal a neih ciangin a pasal tungah lamet pawlkhat nei ding uh hi. Bang mah lametna neilo, ngeina khat bang lel a pasal nei cih pen dah huai mahmah kha ding hi. Lametna nei keng a cite in zong belh ding muan ding khat a nei bangin kingaihsun kha thei veve ding uh hi. Tua pen amau lametna khat mah ahi hi. Tua mah bangin pasal khat in zi a neih ciangin ama zi numei tung pan lamet pawlkhat nei uh hi. Tua a lametnate sung pan pawlkhat a lamet uh bang lo thei hi. Ahi zongin a lamet uh a bang lo pawlkhatte thuakzoin theisiamin sangsiamzo uh hi.

Ahi zongin a thuak zawh loh a maisak theih loh, a theihsiam zawh loh uh thu khat om citciat hi. Tua a lungkimlohna uh pen a kam uh tawh a gengen nuam kei zong un a lungsim sung uah kemcing den uh hi. Tua lungkimlohna pen ama ading khantawn loh zawhloh ding leiba nei bangin kingaihsun uh hi. Tua thu a ngaihsut khak uh ciangin a sin a lung uh so vanvan thei hi. Bang hi dingin na um hiam?

Numei pawlkhat in pasal a neih uh ciangin moken gina nei napi a pumpi siangthona ahi a nungakbitna uh a pasal moken dingin keng lo sese uh hi. Moken cih pen sum le pai vanmanpha a tuamtuamte deihhuaiin lunggulhhuai kha mah ding hi. pilna siamna ding deihhuai kha mah ding hi.

Ahi zongin tuate sangin moken hoih zaw khat om hi. Nungak khat in ama pumpi siangthona, a nungakbitna pen a kitenpih a pasal tungah a tut ding thupi mahmah hi. Bang hang hiam cih leh a nungakbitna a thupisak lo, manpha a sa lo numai khat in a nuntakna sungah manpha le thupi a sak bang mah om nawn lo ding hi. Tua bang numei khat in a innkuan sung zong thupisaktakin makaih zo lo ding hi.

A khangto gamte ah nungak tangval omkhopna pen mawhna khialhna bangin mu lo uh hi. Amau nih kithukim peuh leh ci-in thusiain mu lo uh hi. Tua bang ngaihsutna a nei gam le minamte sung mah ah nupa kikhen tam pen pah uh hi. Tua bang ka cih ciangin numeite bek a ginain gamta ding, pasalte a ut bangun gamta ding a ci ka hi kei hi. Pasal in zong ama zi ahilo ding numei khat tawh khial khin ahih manin zi a neih ciangin a zi bek tawh a lungkim zawh ding ngaihsut haksa thei hi.

Pasal khat in a tangval lai-in numei dang tawh a utut-in om napi a zi ding nungakbit khat deih cih pen Pasian in zong tua pasalpa deihna pia dinhin ka um kei hi. Nang tunga hong kibawl ding na dwih bangin midangte tungah zong bawl in, a cih mah bangin Sia, JM. Paupu in TOPA aw, ka pumpi ka kikep zawh mah bangin ka zi dingte pumpi zong na kemsiangtho in, ci-in ka tangval lai a kipan thu ka ngen den hi, na ci hi.

Tua ahih manin ama pumpi a thusim lo mi khat in thurang bang mah thusim zo nawn lo ding uh ahih manin dah huai mahmah ding hi. Pasal khat in zi a neih ciangin a zi tung pan a lamet lian mahmah pen a zi nungakbit ahih ding mah lamen pen uh hi.

Cilesa thu tawh a gen ding hi le hang, tua numai ningakbitna lian pen a thupi lua hi peuhmah lo hi. Ahi zongin numei khat in a kipuah kik thei nawn lo ama nungakbitna thupisak lo, kemcing nuam lo, cih lungsim le ngaihsutna pen tua bang mi khat tawh pum khat suak ding cih pen pasalte’n in nasa mahmah uh hi.

Bang hang hiam cih leh tua bang numeite in ama pumpi zong thupisak zo lo a hih leh a pasal zong thupisak zo lo kha ding hi. Ama pumpi kemcing thei lo ahih leh a tate bangci makaih in pantah zo nawn ding hiam, cih pen pasalte lungnoploh a lianpen khat ahi hi. Tua ahih manin moken ding a hoih penpen nungakbitna mah hisak ciat ni, kong it sanggamnute aw. Na lawm na gualte na deihsak leh na Share sawn in. Lungdam, Job Cinpi (Zomi Laisim Nuamte)