Mandalay ah Thingyan tuibuahpawi hunsung Security khauh mahmahding

Mandalay ah Thingyan tuibuahpawi hunsung Security khauh mahmahding

Kawlgam ah Kawlpau in “Thingyan” akici tuibuahpawi “Water Festival” pen asawtlo in hong tungkikding hita hi. Tukum Water Festival pen Mandalay khuasung ah nopci phadiak dingin ki limgen mahmah a, kumpi thunei te’nzong Security limtakin vaihawmding cih Irrawaddy pan kiza hi.

Mandalay Border Affairs and Security Minister asem laitak ahi Gen Myo Min Aung in agenkhiatna ah Water Festival hunsungteng Mandalay khuasung ah Security mawhpuak alading in Police Force aom khempeuh ii 70% kizangding ci’n Thursday ni in genkhia hi.

Mandalay khuapisung aom palik khempeuh ii 70% takin Security laksawm uh a, adiakdiak in Mandalay Hill, Kandawgyi Lake, U Bein Bridge, Old Palace Wall leh adang mipi atamdiakna munte ah sunlehzan in Police te’n Security mawhpuak lading uh cihi.

Tuaban ah guihtheih khamtheih leh zukham ankham tezong Warning piakna leh theihsakna Notice te ki hawmkhiakhin ci’n Minister pa’n genkhia hi. Tuibuahpawi hunsung mahmah inzong mipi lakah muanmawh te akisap hunhun in Surprise Checks kibawl zelzelding a, guihtheih khamtheih zangte kiman pahpahding cihi.

Abeisa Water Festival atun ciangin guihtheih khamtheih azang atam mahmah banah azuakzong tamsem ahih manin, tukum tuabang in kumpi thukhun tawh akituaklo akimuh nakleh kiman pahpahding hi.

“Mandalay Thingyan” pen Kawlgambup ah minthang phadiak a, pawisimding ngiat inzong khua tuamtuam panin kipai ngeingai ahih manin mipi tamcihtak in tamthei hi.

Gamsung buaina apianloh nading leh lungmuanna aom nading ki lunggulh ahih manin, Water Festival hunsungzong kuamah maituam “Mask” thuahthei loding, galkappuan leh galkap kizep “Military Outfits” in kuamah kizem theiloding, Thaulim “Toy Guns” leh temta lim “Toy Swords” cihte kuaman puatheilo, zangtheiloding ci’nzong thunei te’n tangkona neikhin uhhi.

Myanmar Thingyan Water Festival pen April 13 nipan in kipanding a, April 17 ciangin manpanding hi.

More: Mandalay ah palik te’n Pistol, thautang honkhat, vankham honkhat mankhia

Abeisa 2010 kum Myanmar Thingyan Water Festival hunlai in Yangon ah Bomb puakkham ngeimawk a, mi 10 in sihlawh hi. Aliam bekbekzong mi 178 bang liammawk hi. Tuabangdan Terrorist Attack aomkik lohding thupi mahmahhi. ZD Sawltak #zomidaily