Malaysia UNHCR vaitawh khualzinna theihsakna ~ DK Khup

Malaysia UNHCR vaitawh khualzinna theihsakna ~ DK Khup

Lawm leh Gual te; Cidam in New York tungkik ta ingh.

Malaysia omsung Hunzatna a bulpi teng:

1. Aug 13-15, 2018 ( 9:30 AM to 6:00 PM ) Consultation Meeting ah ZAM Makaipi Sia Khuppi, Sia Cinpi leh advisors (3) te tawh kahkhawm

2. Aug 13, 2018 ( 6:30 PM – 8:30 PM) – ZRC Makaipite leh Advisors te tawh holimna nei

3. Aug 16, 2018 (10:30 AM – 12:30 PM) ZAM makaipite leh Advisors te tawh holimna; ( 2:00 PM – 5:00 PM) Mipi tawh kimuh khopna nei

4. Aug 17, 2018 ( 10:40 AM to 12:30 PM) – UNHCR-Malaysia Representative Mr. Richard Towle tawh kimuhkhopna nei; ( 3:00 PM – 4:00 PM) – ZAM sang ZEM students pawlkhat tawh kimuh khopna nei

ZAM hong lunggulhna leh ZIUSA pawlmite’ veina zui in ZIUSA Board of Directors vaihawmna tawh ZIUSA Innpi thukimpihna zui in ZIUSA taang in Malaysia aa om Zomi te UNHCR vaivaanna nuai-a tunai thu om zia tuamtuam te tawh kizui in, amun amual a om i innteek ZAM akipan Zomi kipawlnate, Biakna siate leh mipi te tawh kimu khawm, thu omzia kikum khawm in pankhop theihna a om thei ding te ah pankhop dan ding kikum, thuvaan ding ban ah, hih vai tawh kisai a thuak khawm a phukhawm Malaysia a om Chin State pan a pai minam tuamtuam te pan kipawlnate leh hih vai ah ngaihsutna thusung, pankhoppih ding a ki zawn gam tuamtuam a kipawlna makai apai teng tawh thu kikupkhopna ahi ICC makaihna tawh Consultation Meeting kah ding muanna tawh ZIUSA taangin hong kisawl man in angtang leh lungdam ingh.

Asawtlo in khualzinna vai tawh kisai ZIUSA Board of Directors tungah Report na ka nei ding hi. Board of Directors in Board Chairman makaihna tawh kikupna nei in maban zopdan ding hong kikum, hong khensat ding uh hi.

Thu omziate leh maban vaandan ding akisai Tanute, Vaihawmpi Pawl in akisam bangin ahunhun in mipi leh ZIUSA Innpi tungah theihsak sawnna nei toto ding uh hi.

Thu tam khin ahih ban ah US lam te advocacy tungah Resettlement vai tampi kinga kha ding ahih man in biakna kipawlnate tawh zong mapankhop ding akisam mahmah dingdan in mu ingh.

More: Malaysia gamsung PPR innsaap vaitawh kisai UNHCR pan zaksakna

Amun amual aa om pawlkhatte in tu mahmah in zong June 13, 2018 lai options 1&2 vai ah aphuuk khak ta uh thu ahih ban ah patau leh alinglawng tampi, akap phialphial a thusung zong om khin ta uh hi. Apua facebook cihte aa lai ki at pawlkhat te meina sa a nasak behbeh tawh kibang in amu zong om uh hi. Tua man in mipi leh makaite tawh kikupna, holimna thute ahi thei zah in apua ah a tung pahlo ding in live kikhahsak lo hi. Tua man in ahunhun in thu omzia te hong update lo hi ingh.

Ka zin sung support na thu tuamtuam nong at te uh, thungetna ah nong phawk zelna uh hangin zong lungdam ingh. Do Khan Khup (August 19, 2018)