Numei te pahtawizual dihni ~ Zomi Quavadis

Numei te pahtawizual dihni ~ Zomi Quavadis

Ciamnuih siam khat in a genna ah “kei bel pawlpi thak phuan ding hi leng numeite mah ka khuambul dingin zangh ning” ci liang hi. Ahilua hi! Numeite pen lungkimsak peuh lehang vai khat peuhpeuh ahoih lamin hong kihei liailiai lel takpi hi.

Innkuan sungah Pasal in thuneihna sangpen a neih sam hangin amin bek hi a, a nunglam pan ut bangin a kawi heek thei pen Numeite hi gige hi. Innkuan sunga pasalte thuneihna pen tulaitak a ih President Thein Sein thuneihna tawh kibang hi. A nunglam pan kuama theih loh in a kawikaih gaalkapte na om veve uh hi.

Numeite in amau septheihna te hong theih a, amau neih thahatna hong phawk khak a hong zat khiat taktak uh ciangin leitunga “Ka pa tapa hi’ng” cia a kipasal sak pasal kitomtomte naleng zong naangkhau tuisunga diahte bangin hong duai in hong lukun pah ngeungau zo mawk uh hi. Tua bek hi lo lai!

Kawl papi gawng dengdang pawlkhat in amau sanga golzaw pek ahi saipi saital te a ut bangin a kawikaih theih mah bangin numeite hong gamtaang vanglak uleh a pasalte uh a kawikaih ngekngek thei uh na hi mawk hi. Ciautui khang vanvan a kantan ngam pasal hangsan khat in a zi mit pan a luang khia khitui mal khat kantan zo lo mawk hi!

Tua zah taka hat numeite hatna thatang pen koiah om mawk hiam? Thagui thazang om lohna, guh leh tang om lohna mun ahi apumpi tungvua a nipna mun tengah om sese hi. Tua teng hang mah hi lo dia leitung mi minthang leh mipil Churchill, Napoleon, Julius Ceaser te awkcip pahpah uh!

Gaal tampi zo in mi thahat tampi a khutnuai vuah koih zo mah taleh a zite uh lel in, numei awmnipte maiah na tuuk mawk uh hi. Abraham Lincoln mahmah inzong kumpi thuneite khut sungpan in mivom sila tul tampi honkhia zo mah taleh a nuntaak sung khempeuh a zi Mary Todd ukcipna sung panin suakta zo tuan lo hi.

Tua hang mah hi lo diam leitung mipil William Shakepeare in a gengen “Ka hatna ka thatang aw, na min pen numei na hi mawk maw!” na ci ngeungau zen hi! Francis Lamthang (Zomi Quavadis)