Numei Pasal liangko kikimna (Gender Balance)

Numei Pasal liangko kikimna (Gender Balance)

Numei Pasal liangko kikim na ih cih cih in bang hiam? Leitung ah mihing khem peuh pen ih suahtung aa kipan in (sex) zahmawh kibang lo bek hi in mihing tektek mah ih hihi. Ahi zong in (sex) aom man in Numei leh Pasal cih kikhen khia hi aa tua hang mah in in tha gui ih tha tang, pumpi ki lam dan kibang lo pah lian hi.

A hizong in ah Mihing tektek hi mawk hi hih man in kuamah kidei dan theih ding om lo hi. Genteh na in: Nang numei na hih man in ahih kei leh nang Pasal na hih man in ci aa Kumpi, Siavuan, Gammakai ect.. aki pan ki dei dan theih ding om lo hi. Tua ahih man in Numei Pasal liangko kikim na(Gender Balance) ih cihcih tua ahihi. Nidang lai in ah Kum 1979 ma lai khawng in leitung mun khem peuh ah Numei te pen Pasal tawh kikim ding cih thu om ngei lo hi. Ki dei dan na tuamtuam omhi.

Tuhun ciang in ah leitung gamtuamtuam ah agamgam un kiteel na (Election) aneih uh ciang in Numei te leh Pasal te aki bang in vote tang khat tek pia thei in ni dang lai in ah tua bang hi lo in Numei ten piathei lo uh hi. Mun dang gamdang ci kei ni ih Zogam sung en leng zong Numei leh Pasal ki dei danna nasia mahmahhi. Numei ahih man in nikhat ni teh mizi ding hi lel in sang kahsak dah ni ee, Numei ahih man in Inn sung na sep khempeuh avaipuak hi ee cih khawng, Pasal ahih man in Sum azon ding hi, Pasal ahih teh sangkah sak ni, ect .. aki pan ki dei dan na tuamtuam om hi. Tuni dong mah om lai in mu ingh. Gender Balance vai ih gen ciang in pawlkhat te in na khempeuh ah kikim ding cih na in ngaihsun thei uh hi. Na khempeuh ah ki kim ding cih na zong hi pah sam lo hi.

Bang hang hiam cih leh Gentehna: Pasal khat in Antang ip khat pua ahihleh Numei khat in zong Antang ip khat pua hamtang ding cih na hi lohi. RC pawlpi te ahih leh Pasal ten Siampi (Phungyi) sem ahih leh Numei ten zong Siampi (phungyi) sem ding cih na hi lo hi. Zongei na ah Pasal te bek in gamh luah thei hi ki ci hi. Hi lai mun san ah U nau laizom Pasal om loh na ah gamh (heritage) pen Numei ten zong luah thei veve hi. Amun leh amual paidankhat , zuih dan (by law) tawh zong om akul hun om veve hi. Numei leh Pasal liang ko kikim ding cihpen Numei khat in Pasal khat bang aa na asep zawh leh asep na tungtawn in thaman angah kul hi. Sep kibang theih na kibang te Numei Pasal khen lo aa thaman aki bang in angah kul hi. Numei te pen Innsung nasep sem ahih man in sum zon hun nei nawn lo uh hi.

Sanggam Nu mei te ahi zong, Zi te tung ah ahi zong in nang sum lah zong lo inn ah omom, kei ma zon sa hi ci aa gen theih hi lo hi. Nang sum na zon bang mah in aman inn sung na sem hi. A inn sung na sep pen sum tawh cial ding hi le cin na tha lawh sang in zong tam tung zaw thei lai kha ding hi. Inn sung na sep pen Numei te bek in sep theih cih tuan om lo hi. Numei ten asep theih bang mah in Pasal ten zong sem thei hi. Pawl khat bang Numei te sang zong kiva zawsawp lai thei uh hi. Tuabang mah in Sum zon na ah zong Numei ten zongh zong thei uhhi. Numei leh Pasal sep khop theih ding na pen akibang in sepding thupi hi. Kul hi. Leitung ah Numei leh Pasal ki dei dan na hang in Numei te in thuak zo nawn lo ahih man un, Gender Balance cih tawh ki sai awng awng uh aa tua man in 1979 kum tak ciang in CEDAW ong piang khia hi.

Hih CEDAW cih athei zong ih om ding aa atheih nai lo zong ih om kha ding in ka um hi. CEDAW, the Convention on the Elimination of All Forms of Discrimination Against Women ci- in tua sung ah article 30 om in adiakdiak Numei te aa ding ngait aa aki bawl thukhun ( Law) ci leng kikhial lo ding hi. Hih CEDAW thu khun pi ( Law) pen 1979 kum in UN khawmpi ah akikip sak thukhun pi ahihi. Kawlgam Kumpi in zong hih CEDAW pen 1997 kum in suaikai (signature) pia hi. Hih CEDAW a sang apom gam (130) val om in Leitung ah suaikai( signature) tam mupen ( kipia) tampen hi ciin kiciam tehhi. Hih CEDAW ii deih na pen atung aa ih gen samah bang in gamvai , Pil na , Cidam na, Nasep na, ki teen na (political and Public life including the right to vote and to stand for election as well as education , health and employment) hih te ah Numei leh Pasal liang kokikim ding cih deih na hi pen hi.

Hih CEDAW pen mimal khat guak ii sep theih bawl theih (implement) theih hi lo in Kumpi te tung ah vaipuak lian pi om ahihi. Tua ahih man in ih gam ah hih CEDAW bang aa kal suan theih ding pen ih Kumpi te tung ah mawhpuak om hi ka cih nop na ahihi. Bang hang hiam cih leh hih CEDAW pen Kumpi te suaikai ahih man in asuaikai ( signature)pia te tung ah vaipuai om ahihi. Tu lai tak Kawlgam sung ah Numei tetawh kisai zum hong tei sam in ahi hang asep khiat na taktak bang mah ki thei lo hi. Gam dang tung adiak diak in gamthum na ( USA) ect..tung te khem peuh in hi Gender balance tawh ki sai thei khin ding hi uh hi.

Gamdang ah Naupang te ciang tawh kisat thei lo cih te ahi zong in, Numei leh Pasal ki dei dan lo aa sum leh pai zon na Pil sin na ah ahi zong liang ko aki kim thei na hang pen CEDAW, Children’s Human Right ( CHR) thu khun te hang zong ahihi. Kawlgam zong Democracy dan in pai pianpian ta ahih man in nikhat ni teh CEDAW thukhun pi zong kawlgam ah kizang lo ding cih ki gen thei lohi. Bang hang cih leh azang nai lo bek hi in suaikai (Signature) khin uh ahih man in azat ding asep ding bek uh cian lai hi. Kawlgam sung aa om te leh India, Thai gam sung aa om te pawl khat in thei nai lo aom khak leh cih na tawh Gender balance thu tawm kong at ahihi. A ki cing zaw in sim beh nop leh anuai aa link na mek in la na sim in. Timothy Naulak