Numei khatin a lawmngaihpa ngai taktak ahihna a kilangsak thu (4)

Numei khatin a lawmngaihpa ngai taktak ahihna a kilangsak thu (4)

Khangno nungak khat adingin lawmngaih cih pen pasal ding zonna hi masa khol lo thei hi. Lawm le gual dangte’n zong lawmngaih nei ciat uh ahih manin tangom lawmlawm sang cihna tawh a gei a kinelnel khatpeuh a kai vat zong hi thei hi.

Numei pawlkhatte leuleu ciangin lawmngaih neihna pen mi mawkmawk hih lohna le kisakpihtheih ding khat bangin ngaihsun uh ahih manin mel a piang zaw deuhdeuh pasal khempeuh a neih nuam numei pawlkhat zong om uh hi. Tua bang lungsim a nei pen numeite bek hi lo hi. Pasal sungah zong numei mel hoih zaw deuh khempeuh a neih nuam a neh nuam pasal tampi mah om uh hi.

Tua bangin lawmngaih tampi a khel kawikawi numeite sungah pawlkhatte in a khensa uh a lawmngaih pasalte kithuahpih kik nuam thei uh hi. Mihingte pen ei le ei kitheihtel ing baih lo hi ci-in mipilte thugen a om mah bangin numei pawlkhatte amau le amau kitel lo uh ahih manin a lawmngaih pasalte uh a tanlawh khit zawh ciang / midangte ang a tun zawh ciangin a iplahhuaina tel pan thei uh hi.

Tua ahih manin tu-a na kingaihpih na lawmngaihpa pen na it taktak mah ahiam, ama tungah na lungsim bang zah ciang kinga-a, ama hangin na lungsim ngaihsutna bang teng kikhel zo phial hiam cih na theih nadingin nang le nang hih thu nam li tawh kisiitel thei hi teh.

1. Na mailam kalsuanzia ding lunghimawhh thei ta

Mailam kalsuanzia ding lunghimawh cih ciangin amah tawh kalsuan kop ding patau gawp lunghimawh gawp cihna hi lo hi. Amah tawh nungta khawm nuam kalsuan khawm nuam cihna ahi hi. Zingcing amah tawh kimu leng bang silh ding bang teng ding cihte sangin a sang zaw ngaihsutna nei, lawmngaih kalsuanna khengin thu ngaihsun cihna ahi hi.

2. A lawm numei dangte thu thei nuam

Itna pen hazatna tawh kithuah khawm thei den hi. Numei khat in a lawmngaihpa le numei dangte kithuah ding haza cih pen a lamdang hi lo hi. Tua lawmngaihpa it ahih manin muangmawh thei a, haza thei hi. Tua hangin a lawmngaihpa tawh a kithuah numei dangte thu thei nuam ta hi. lawmngaih a nei lo numeite bang tawh kithuah leh bang hangin man lawmngaih nei lo, ka lawmngaihpa peuh hong ngaihsak sim khinkhian ai tam ci-in lawmngaih a neih lohna ahang peuh a sim a thamin kan thei uh hi.

3. Kipuah ding kin semsem

Kipuah cih pen mel le duang bek a kipauh thei hi lo hi. Lungsim ngaihsutna zong kipuah thei hi. Numei khat in a it a ngaih taktak pasal khat tawh a kimuh ding ciangin a mel a duang a kipuah mah bangin a lungsim zong kipuah ding ngaihsun den hi. Gentehna, amah tawh kimu leng bang teng gen ding cih a kipan a kimuh khit zawh ciang ka gen khialh bang teng a om kha tam cih dongin ngaihsun thei hi.

4. Theih loh kaal-in ama thugente ciamteh den

Lawmngaih nei nuemi mawkmawk khat adingin a lawmngaihpa thugente thusim khin ngaihsutsak khin cih om thei lo hi. Tua mah bangin ama thugen khempeuh zong a lawmngaihpa in ciamteh ding thusimsak ding cih ngaihsun lo ding hi. Ahi zongin numei khat in a it a ngaih taktak a lawmngaihpa kammalte thupitakin ngaihsutsak den hi. Tua hangin numei khat in pasal khat it semsem ngai semsem leh a lawmngaihpa kammal tungah dotna tam nei semsem uh hi. Tua pen pasalte buaina lian mahmah khat suak leuleu hi. Job Cinpi (Zomi Laisim nuamte)