Khuapi sungah nasemin aom nulepa te muhnop manin Bus nuai ah guktuansim

Khuapi sungah nasemin aom nulepa te muhnop manin Bus nuai ah guktuansim

Leitung ihpianna nulepa pen angailo aomteisam hangin, atamzawtham in kingai mahmahtek hi. Adiakdiak in aneulai, naupangno te’n anu apa te ki lunggulh mahmah phadiaktek hi. Sengam khuaneu khauta pawlkhat ah nulepa te’n atate uh nusia in, khuapi sungah nasemding in paisan uh a, khatampipi thamcipthei uhhi.

Tuabang in anu apa te’n innah anutsiat naupangno nihte’n anu apa te uh munuamlua mahmah ahih manin, khuapilam zuandingin apaikhia Bus khat ii anuai ah tuangsim uhhi. Hih thupiang pen nungkal abeisa Thursday ni in thupiang hi a, azakha asimkha te’n ki khasiat mahmahtek hi.

Tua naupangno nihte pen kum 8 tuak hipan uh a, sanginn ah laisin akipat madeuh in sangin panin taikhiasim uhhi. Tuakhit ciangin Baise City azuanding Bus khat ii anuai ah tuangsim uh cimawk hi. Tua naupangte aomna Guangxi Province, Nazuo panin Baise City pen Bus tawh nai 3 sungbang akipaiding ahihi.

Nulepa munuam luamahmah in Bus nuai, apeikawm ah atuangsim uh hi a, tua Bus pen Xilin County sung aom Station khatah akhawl laitak in tua naupang nihte Security Worker te’n mukhia uhhi.

Bus Station ah nasem khat ii genna ah tua naupangno nihte pen gawngmahmah uh ahih manin, Bus mawtawnuai aom vankoihna kawmkal ah kita uh a, atuangsim uh ahihi ci’n genkhia hi.

Bus Mawtaw apeikawm ah atuangsim uh himawk ahih manin, apuan leh apumpi khempeuh uh vuikhu tawh kituamcip cihi. Bus Station nasem te’n siansuah uh a, tuakhit ciangin sun an nekpih uhhi.

Bus Station Worker te genna ah ataktak in hih naupangno te ii anu apa tepen Guangdong Province sungah nasem in aomcip uh cihi. Ahi zongin naupangno te alungnop nadingin anasep taktakna khuapi sangin anaizawtham Baise City ah nasem in aom uhhi ci’n akikhem cisawnsawn hi.

NGO te genkhiatna ah China gamsungah anu apa te’n tuabang in khuata ah atate uh nusia in khuapisung ah nasem in kuansan uh cihi. Tuabang in akinusia naupang pen akigawm in 23 Million bang omding hi ci’n NGO te’n genkhia uhhi.

Behlapna: Naupangtawh kisai in apattahsiam mipil misiamte’n agenna ah naupangno kum 3 pan kum 6 kikalpen “Learning” dingin ahoihpen hun hi a, tuasung in asin, asim khatpeuhpeuh akhantawn in ciamtehthei uhhi ci’n genkhia uhhi. Sumlepaai athupit mahbangin ihtano tezong aneu akipan ih pattah siamding thupi mahmah hi. Naupangno te’n nulepa itna, nulepa ompih kisam phadiak uh cih nulepa te’n phawk huai mahmah hi.

More: Naungek suakcil ending in napai ciang theihhuai pawlkhat

Na tate’n aneulai in anu apa pen mithupipen, hihatpen leh mipilpen in hong ngaihsut uh hi a, na gamtat bangbang hong etteh gige uhhi cihzong phawk huai hi. Zu nadawn leh natate’nzong zudawn pen ahoihmah sapahding uh a, zudawn pen kihlohding uhhi. Za natepleh, tuibuk, sahdah, khaini nazatleh tuatepen natate’nzong aneutung akipan akisinsin uh hipah hi. Na gamtat bangdan linlianin natate agamtading in na deihsak takpihiam? Na tanu natapa te’n nang lungsim puakzia, nang gamtatzia, innsung ah nakitom phangphangzia, nazi napasal navuakzia, nang dawnbang, nang muambang in hong sulzuihleh nalung akimdiam? Na deihsak takpi hiam? Sawltak #zomidaily