North Korea te’n Japan gamlam ah Missile thaupi khatvei lotphei leuleu

North Korea te’n Japan gamlam ah Missile thaupi khatvei lotphei leuleu

North Korea te’n Japan gamlam ah Friday zingsang in Missile thaupikhat lawnphei leuleu cih Fox News pan kiza hi. Abeisa nungdiak inzong Japan gamlam ah khatvei Missile lotphei ngeikhin uh a, hihpen khakhat huamsung in Japan gamlam ah Missile nihvei alotna hita hi ci’n South Korea’s Joint Chiefs of Staff in genkhia hi.

Friday zingsang in alotkhiat uh Missile pen North Korean capital of Pyongyang, Sunan District panin alotkhiat uh hi ci’n South Korea Military te’n genkhia uhhi.

Tua Missile pen alotkhiatna panin 3,700 kilometers (2,300 miles) bang lengkhia a, vandawn Altitude 770 kilometers (480) miles asangin lengto hi. Tuakhit ciangin Pacific Ocean tuipi sungah tusuk hi ci’n South Korea te’n genkhia uhhi.

Japan’s largest broadcasting organization khat ahi NHK te’nzong agenkhiatna ah tua Missile kilotna hangin Japanese Government in J-Alert akici Warning piakna nei uh cihi. Tua Missile pen Northern Japan, Hokkaido tungah nawkin, tuakhit ciangin Pacific Ocean sungah kiasuk cihi.

Japan kumpi thunei te’n tua Missile ii athemnen khatpeuh namuhkhak uhleh nakhoihkha hetkei un ci’n mipi te tungah zaksakna nei uhhi.

Hihbang in North Korea te’n Japan gam nawkin Missile alotna hangin Japan kumpi te’nzong Prime Minister’s Office sungah National Security Council Meeting neipah uhhi ci’n Defense Ministry te’n genkhia hi.

Japan te bekthamlo, South Korea tezong lunghimawh mahmah uh a, South Korean President Moon Jae-in inzong National Security Meeting neihpihpah cih kiza hi.

North Korea te’n abeisa August 29 ni inzong Missile khatvei Pyongyang Airport geipan in lonkhia uh a, Japan gam ii atungah nawkphei in, Northern Japan tuisung ah kiasuk hi. Tu’n Japan gamlam zuanin nihveitak Missile alotna hita hi.

More: North Korea te Missile thaupi lotkhiat Japan gamsungah tusuk ahih manin kibuai litlit

Hih North Korea te Missile lotvai tawh kisai in US President Donald Trump zong ki zasak cihi. Ahi zongin Donald Trump in tuciangciang bangmah genkhiatna neinailo cih kiza hi. Abeisa Missile alot masak hunlai inzong Japan te hehmahmah uh a, ahi zongin bangmah thuhkiknalian kizalo hi. North Korea te’n Japan gambek atobawl hilo a, South Korea, US cihte tawhzong akizomto dikdiam ahihi. Tua ahih manin, tutung petpet bangciang hongtungdiam, galgim nammahmah taleh kilawm hi. Sawltak #zomidaily