North Korea aom Malaysia gammi te aciahkhiatding kiphallo

North Korea aom Malaysia gammi te aciahkhiatding kiphallo

North Korea gamsung aom Malaysia gammi te aciahkhiatding kiphallo cih Tuesday (Mar 07) ni in CNA News pan kiza leuleu hi. Kim Jong Nam ki suamlup khitzawh Malaysia leh North Korea kizopna siasemsem a, tu’n agamsung aom mipi te inzong athuaklawhding hitamawk hi.

North Korea gamsung aom Malaysian Nationals khempeuh gamnih kikal buaina aven mateng apusuahkhiat dinguh ki khamcipding hi ci’n Korea Central News Agency in genkhia cihi. North Korea gampanin ciahkhiatding phallo a, tatkhiat sakding Hostage bangin akepphot sawm uh himawk hi.

Malaysia’s Deputy Foreign Minister in agenkhiatna ah tulaitak North Korea gamsung ah Malaysia gammi 11 omding ci a, tualak ah mi 3 pen Embassy sungah nasem in aom uh ahihi.

North Korea in tuabangthu aginsakphet in Malaysia’s Deputy Prime Minister Ahmad Zahid Hamidi inzong Media Briefing bawlpah a, Kuala Lumpur khuapisung North Korean Embassy ah nasemteng, Diplomats teng khempeuh zong hihgampan in aciahkhiatding ki khamcipding hi ci’n Reporters te tungah genkhiapah hi.

Pyongyang leh Kuala Lumpur pen abeisa kumtampi sung kizopna akipmahmah hi a, ahi zongin Kim Jong Nam aki suamlupna vai hangtawh hongki kangcip mahmahta uhhi.

Free Visa kiphiat uh, tuakhitciang agam nih un Ambassador te ki hawlkhiat saktuak uh, tu’n agamnih un agamsung aom mite aciahkhiat theihloh nadingin khakciptuak leuleu uhhi. Hostage bangdan in akem uh hitamai hi. Tuazawh bang hongpai laitam? Avui atangte in azop lohding thupi dinghi.

More: Japan ah om Korea mite ~ Hau Za Cin

Manglai in “tit for tat” cihkhat nei uh a, khat ii hihbangbang alanglam inzong hihpah cihdante pen “tit for tat” ahih keileh “tip for tap” (blow for blow) cithei uhhi. North Korea leh Malaysia gamnih kikalzong tuatawh kibangta hi. Khat in asep khatpen alanglam te’nzong zuipah lianlian uhhi. ZD Sawltak #zomidaily