North Korea ah a awkcip Malaysian gammi 9 te Kuala Lumpur tungta

North Korea ah a awkcip Malaysian gammi 9 te Kuala Lumpur tungta

North Korea te’n agampan aciahkhiatding aphalloh uh Malaysian gammi 9 te pen Kim Jong Nam ii luanghawm tawh kikhekding thukimna bawlthei uh ahih manin ciahkhiatding phaltaktakta uhhi. Asi luangkhat leh ahing mi 9 akikhek taktak himawk hi.

Tua North Korea ah a awkcip Malaysian gammi 9 tepen khahkhia taktakta uh a, tuni Friday (Mar 31) zingsanglam in Kuala Lumpur tungkikta uhhi. Malaysian Prime Minister Najib Razak leh North Korea gammakai te kimuhkhopna neikhawm uh a, thukimna abawlkhit uhciangin Kim Jong Nam luanghawm tawh akikhek kici hi.

Tua Malaysian gammi 9 tepen tuzingsang nisuahma in Kuala Lumpur International Airport tungta uh a, vanlengtual ngiat ah Malaysian Foreign Minister Anifah Aman in vadawn hi.

Tua mi 9 te lakah mi 3 pen Embassy Staff hi uh a, adang i 6 tepen a innkuanpih te uh ahihi. Tuzingsangin vanlengtual ah meltheih tanau te’nzong nadawn ngeingai uh a, akimuh uhciangin kikawi in kikahkawm in khitui naptui luangziahziah uhhi.

North Korea, Pyongyang khuapi aom Malaysian Embassy ah Counsellor in ava om ahi Mohamad Nor Azrin in agenkhiatna ah “bangmah hong bawlsiatna uhbel omkei, agamsung ah angei mahbangin ki paikawikawi theilel. Ahi zongin agampan ciahkhiatding hongphallo uh ahih manin, ki lungkham mahmah veve” ci’n genkhia hi.

Malaysia PM Najib inzong amah ii Twitter tungah “”Thank God, all nine Malaysians from Pyongyang have arrived safely in our homeland.” ci’n gelhkhia hi.

Kuala Lumpur International Airport sungah aki suamlum ahi Kim Jong Nam ii aluanghawm pen Autopsy kibawlkhin in, a innkuanpih te tungpan inzong aluanghawm ngetna lai ki ngahkhin ahih manin North Korea ah ciahpih tading uhhi ci’n PM Najib in pulakna neihi.

Ahi zongin a innkuanpih acih kuahiam cihpen Najib in gencianna neilo hi. Kim Jong Nam ii azi leh atate pen North Korea gamsung ah omlo uh a, Chinese Territory ahi Macau ah aom uh ahihi. Amauzong Kim Jong Nam kithah khitzawh patau uh a, aki busimsim kici hi. Tua hi’n aluanghawm angen a innkuanpih acihpen ki theicianlo hi.

Kim Jong Nam ii aluanghawm pen General Hospital Kuala Lumpur aom misi koihna Morgue ah kal 6 sungbang akikep khitciangin North Korea ah kipuak khinta hi ci’n Foreign Minister Anifah in Friday ni in genkhia hi.

More: Kim Jong Nam thahna vaitawh North Korea gammi 4 te Interpol Red Notice kipia

Media te genkhiatna ah Kim Jong Nam ii aluanghawm pen Kuala Lumpur panin Beijing City zuanin Malaysian Airlines tawh Thursday ni 7:39pm in lengkhiata ci uhhi. Beijing panin Pyongyang City zuanin Air Koryo tawh lengkhiading kici a, Saturday ni zingsanglam in North Korea tungkhading hi ci’n South Korea News Agency Yonhap te’n genkhia uhhi. ZD Sawltak #zomidaily