Nokia te Mobile Handset bawl kipan kikta

Nokia te Mobile Handset bawl kipan kikta

Finland gampan hongki pankhia Nokia Mobile Company te tawlpikhatsung akhawlcipkhit uhciang in Phone Handset bawl hongki pankhia kikta uhhi. Sunday ni in Nokia Company te’n Android Smartphones Model athak sitset 3 pulakkhiatna nei uh a, tuaban ah nidangin akilimzat aminthang mahmah ahi Nokia Iconic 3310 Model zong puahphathak in bawlphakik uhhi.

Nokia 3310 Model pen akibawlcil masakpenpen ahihleh sawtmahmah ta hi. 2000 kumin hih Nokia 3310 Model kibawlkhia masa a, tomahmah, siahak mahmah, Battery zong sauveipi kizangthei ahih manin, tuahunlai in minthang mahmah hi. Aki bawlkhiat masakzawh kum 17 sungbang aphakkhit ciangin khatvei athakin puahpha uh a, hong hawmkhiakik leuleuding uh ahihi.

Abeisa Model ah Internet kizangtheilo, Web Browsing ki ngahlo himahleh aphuahphatthak Model pen tuhuntawh kituak in Internet zattheihding in bawlpha uhhi.

Tulai hunbangin nidangin Phone sungah Game tuamtuam omlo a, hih Nokia 3310 Phone te sungah Snake Game kikoih in, tuahun tawh kituak in zatnuam, kimawlnuam kisa ahih manin minthang mahmah sawnsawn hi. Tua Snake Game zong ki puahpha in athakin hongbawl behding uhhi.

Nokia Phone pen HMD Global kici Company tetawh Licensing Agreement bawlkhin uh a, Mobile Phone bawlkhiat hongki pankikding uh hita hi.

Nokia 3310 Model athakte pen Battery sawtpi akizangthei dingin abawl uh hi a, nai 22 sungbang kiho theiding cihi. Tuapen Model aluite sangin azahsawm bangin sauvei akizang theizaw hipah hi. Hih Nokia Phone thak vaitawh kisai pen Barcelona ah akibawl leitungah Mobile Phone Show anopcipen ahi “Mobile World Congress” ah thunei te’n apulak khiat uh ahihi.

2000 kumin akibawlkhia masa Original Nokia 3310 Model pen leitungbup ah 120 Million Units bang kizuakkhia a, leitung Mobile Phone khempeuh lakah akikhawngpen Model khat ahihi. Ahi zongin 2005 kum ciangin hih Model pen ki bawlbeh nawnlo in, ki khawlbawl hi.

Nidang in Mobile Phone ahihnak leh Nokia Brand bekbek hizaw a, ahi zongin Nokia pen Mobile Phone abawl uh tawlpikhat hong khawlcipmawk uhhi. 1998 leh 2011 kum kikalsung phadiak leitungah “Top Mobile Phone Maker” ci’n aki ciamteh ahihi. Ahi zongin leitung vanzatte khangto semsem in, Smartphones cih hong om ciangin Nokia te’n Smartphones pen thupisaklo kha uhhi. Tualaitak in South Korea Brand ahi Samsung te’n Smartphones bekbek hong bawlkhia ziahziah uh a, Nokia te Business pen hong kiacip dipdep mawk hi.

Tu’n Mobile Phone Market ah hongki patkikphet in, nidangin aminthang mahmah Nokia 3310 Model tawh leitungah ki pulakkikna hongnei uh ahih manin, mipi Analysts te’n teelsiam mahmah uh ci’n pahtawi uhhi.

Nokia 3310 Model thak banah Nokia 3, Nokia 5, Nokia 6 ci’n Smartphones Model athaksitset 3 zong pulakkhiatna nei uhhi. Nokia 6 pen tulaitak China ah ki leitheita ci a, asawtlo in leitungbup ah ki ngahtading cih AFP pan kiza hi.

More: Nokia te’n 2017 kumsung in Smartphone hong hawmkhia kikding

Nokia te’n Samsung demzo nawnlo uh ahih manin, Nokia ii Handset Business pen 2014 kumin Microsoft Corp te’n leita hi. Nungkum ciangin HMD Company in Nokia Handset Business pen Microsoft te kiangpanin leikik leuleu a, tu’n Nokia Brand tawh Phone Handset bawlkhiat aki thakpatkik ahihi. ZD Sawltak #zomidaily