Nipi Thupuak: Zomi sung-a Tribe I-cihte khial ~ Pu Zokhai

Nipi Thupuak: Zomi sung-a Tribe I-cihte khial ~ Pu Zokhai

Beh cilehang Gualnam, Sukte, Guite cihdaante hizaw-a, English te-in “tribe” acihpen alianzaw tham-a kiseh ahihteh “TRIBE” zanghpak hihang.

Zomi ataangpi-in Dim, Saizaang, Siyang, Teizaang, Losau, Khuano, Phaaileeng, Paite, Simte, Vaaiphei, Zo, Thado, (akicinkeileh nana behlap unla) hihte “Tribe” hi peuhmah lo-hi. Israel Beh 12 (The Twelve Tribes of Israel)-tawh enpak lehang Jacob’ tapa 12 te’ suanlehkhaakte ahihi.

Atung-a “Awsuah” zuui-a lawhna sapnate “Tribe” I-sakkhaak man-in buaina lianpi Zomi sung-ah athuak I-hihi. Etpak ding-in Zo or Zou bangpen Tribe bek hilo-in minam (race or nation) akisakkhaak man-in kitukalhna lianpi a-omlam I-muhsa ahihi.

Tribe cihciang-in mihing khat pan-a apiangsawn suanlehkhaak gui khatteng agenna ahihi. Zomite’ muhkhialhna ahihkeileh letkhialhna pan-a pulaakkhialhna (minpresentation from mis interpretation) anuai-ah enpak leuleu dihni:

Zo-pen “awsuah hilo, TRIBE” ahihleh gui khat cihna hi-a, tua sung-ah tribe taktak ahi Suantak, Suante, Samte….. cihte-zong kihel-hi. Hih tribe taktakte-pen Losau leh Siyang sung-ahzong kihel-a, Paite sung-ahzong kihel-hi.

Tuabek genloh-in Gualnam tribe-pen Dim, Saizaang, Teizaang, Siyang, Paite sung-ah kihel-hi. Atua ahihleh koici bang-in Siyang-pen Tribe hithei ding-a, Zo-pen Tribe hithei zenzen laaizangding ahihiam?

Khuaknei khempeuh-in lungngai henla, “awsuah kidanna” leltak-tawh minam tuam kisa khalo-in, Lamka zaang-ah ka’ khan man-in Paite kahihlohna, Thuklaai-ah kakhan man-in Siyang kahihlohna, Phaitu-ah kakhan man-in Zo kahihlohna, Saizaang-ah kakhan man-in Saizaang kahihlohna, Laaitui-ah kakhan man-in Dim kahihlohna, minam leh beh-tawh kisai kahihna maantak-pen ka’ beh ahihna katelcian theihding mihingmaan kahihleh keima’ mawhpuak-hi ci-in theikim ciatni. Zokhai (Gualnam Beh, Dim Awsuah, Zomi) (hih hileh kitel buang intehmaw)