Nimit pawlkhat hongtung hiai-hiai

Nimit pawlkhat hongtung hiai-hiai

TOPA PASIAN in Rev. Hau Lian Kham zangin 1970s lam teh Chin State ih Zogam saklam khuate ah Kha Kha’nlawhna (Spiritual Rivival) hong tunga, tuni dong ki- sut kikkik nawn zelzel hi.

A: 1975? (tuma kum 45 lai) pawlin ko khua, Tuithang, Tedim Uksungah zong tua Kha Kha’nlawhna hong tung sem hi-in, a taktakin Lengtong Pauno’ innlak pano khat ahi, Pu Tuan Do Lian pen 1968 pawlin a omna Tuithang Tuiphum Pawlpi sung panin sim pianthaka, Khalam lim khat ahi, kamtuam zong ngah cihte tawh kizom to, kici hi.

Hih 1975 kum pawl mahin Tangvalno Tg. Cin Khan Gen kici pa tawh ni khat bawng ka cin khopna vuah, HOTKHIATNA Lungdamna thu hong genpihna ah, “Paumang aw Topa Zeisu…honpa leh gumpa-in sang inla, piangthak in. Laktoh ni ciangin, gentehna kei piangthak lo, nang piangthak zaw hi lecin, kei hong kinusia-in nang hong kila to ding hi,” ci-in deihsakna tawh hong genpih ngei hi. Ahi zongin kei lah ka piangthak thei nai kei hi.

Hih kammal laktoh (Rapture) kammal leh Covid -19 pen hong kisamkaih simsim ka sa a, laktoh hun ding a hong naina Matthew 24:7na ah Hun nunung ciangin “Pulnatna (pestilence) hong tam keii ding” cihna thu pen tuni mitmuhin hong tung hilo hiam! Laktoh Ni ding, ih Topa Jesuh hong pai kik hun ding Ni pen hih Covid -19 in a gimnam hong zasak khol ka sa sim tham hi.

B: 1980 (tuma kum 40 lai) in ka Middle School kahna ah ka lawmpa Tg. Cin Khan Dal in Japan gam ii bawl laibu hoih petmah pawlkhat sangah hong pua a, tua laibu sungah “Quarantine” cih kammal mu-in a deihna zong ka thei pah hi.

Tokyo port ah mi pawlkhat kituamkep (Quarantined) cih thu kigenna hi a, tua hunin bang mah ka ngaihsut theih loh, ei omna mun ah tua kammal hongtung ding peuhmahin ngaihsut hi vet loa, ahih hangin hih kammal in tuni-in ih kiim i pamah hong kizang hong tung petmah hita hi. Nang zong hong ban thei lua hi. Covid -19 huhau ahi hi. Natna nei ta leng nei ta kei le’ng hong kituamkep (Quarantine) thei lua dinmun kitung hita hi!

Deihnate Khang Semsem!

Mihing in Hauh nopna, Pil nopna, Sum ngah nopna, Suahtak nopna, Thuneih nopna, a Nuamzaw Nuntakna leh Leitung nopsakna, numei pasalvai LGBT…a kipan, Pilna lah kha’n pi-in khangto to lai mai hi. Hih bang thu hoih thupha kha’ntohnate in hun nung hun siatna limte ahi hi.

C: 1983~ 1984 Saya Thuam Khan Thang (Saya Thuam) in Indiagam, Nagaland State, Dimapur khua-a om, Eastern Bible College ah Lai Siangtho sang a kah hun lai-in, ko khua Tuithang Carmel AoG tawh kizopna om (a Sungte’ khua) hihna tawh a thu kipan ahi tam maw! 1983 kum sungin khatvei a sermon genna ah, tulai taka i muh ih zak mun mahmah Late/Psalm 91:1~5

“Zan-a A leng khiankhian Pulna panin TOPAN hong kemcing hi…” cih thulu tawh mi siangthote Kha an hong vaak ngei hi. Tu-in kum 37 vilvel pha ta hi. Tua zawh kei-a kipan Pasian’ thugen kuamah in hih Lai Siangtho mun bulphuhin thapiakna lian kinei ngei khol loa, tecipanna ah kizang cih bel za ngei sam ing. Bangbang hi ta leh, tuni tu hun laitakin hih “Covid – 19” hangin patauhna hun sia sungah hih LST mun tawh eite in tha la keii hi hang. Ka thulu ah “Nimit pawlkhat hong tung hiaihiai,” ka cih deuh khatin “Pulnatna pan…hong kembit ding” cih Pasian hong gamtang takpi dingin Lamen kawm sa-in mihing’ hih theih kidop siamna zong lungsim sungah vom ciat ding hi hang.

Thukhupna:

• 1. Galthu Sathu (Rumours of Wars),
• 2. khuaphuuk (Disastrous Calamities),
• 3. Pulnatna (Contagious Pestilence),
• 4. Meikhu Hualpi (Billows of Fire)
• 5. Kialpi tunna (Famines)
• 6. Zinlinna (Earthquakes)
• 7. Tuipi zinlin (Tsunami -1905 pan)

cihte pen Topa Jesuh in Matthew 24 sungah a gensa thu vive hi a, tam gen kul loin za mun leh zong mu mahmah ta hi hang. Hun nununga thupiang dingte hong piangpiang takpi ta hi. Ko khua tamna Utah State, Salt Lake City bangah tuteng nisimin zin lingling khawl nai lo, peuh ci zanzan hi. Seismologist kici zinlin hun ding a thei mipilten tuhun ciangin ni khat bekbekin 3000 vei bang ling den ta, ci uh hi. Mi 300,000 bang a sih tungtang lai, 2004 December 26 thupiang bang mangngilh theih ding hilo hi.

1994 April kha sung bangin Saya Khambawite The Philippines a tun khitun US military base mun lui tengah meimual puakkhamin kaal khat sung bang Manila khua sung meikhu in tuam cip cih, na za ngei hiam? Singapore ka om 1993- 1994 sungin zong Indonesia ah gamphengpi kangin ka omna Singapore dong meikhu in hong tuam hi.

US sung gamphengpi meikatna, leh Australia ah zong piang zela, tu kum 2020 Theinosihkha sungmahmah in zong Australia gam sungah Gampheng pi gamkatna (Forest Fire)hangin “tuuno 1,000,000-a simin si ci thong hi”ci-in Adelaide khua… Pa Mang (Gamlai khuamipa) in hong gen ngiat hi. Tua hi a, hih Covid – 19 in laktoh gim hong nam sak mahmah deuh semsem ahih manin ei pawl i Khalam dinmun zong kisittel kawmkawm ni cih, kihanthawn kiphawksak hang. A ni a nai ding in hong naih hong neh semsem hiai-hiai ta hi lo hiam! 2Korin 6:2 ” Tuni in Hotkhiatna Ni hi ~Today is the Day of Salvation” Dr. Thomas Pau (Tawmvei Melbourne)