Niguk sung kidona (Six Days of War)

Niguk sung kidona (Six Days of War)

Israel te pen nidanglai pek panin gaal a do den nam ahi uh hi.Khatvei leh gualzo in khatvei leh salah a tan hun uh zong om hi. Sal taanna pan paikhia in gam kician nei lo in sehnel gam khawngah vakvai zel uh hi. A kiim ua om gamte tawh kithutuak ngeilo uh hi. Hun hong pai zel in leitung galpi nihna hunin Juda mi tampi kithat hi.Tua khitciangin kamphatna tawh independent ngah vanglak uh hi.

Kum 1948 in British leh UN vaihawmna tawh Palestine gam mun nih ah kikhen hi. State khata Hitler ii’ hun laia Juda 6 million te om uh hi.A state khat leu leu ah Palestine Arab mite om uh hi. Arab gam tamzaw ten UN vaihawm dan deihlo uh hi.Israel independent dinga hong kipat un zong Arab galkap ten nakpi takin do uh hi.Tua kidona pen The War of Independence hi a arab pau in AL Naqba kici hi.

The war of independence ah Arab ten zolo uh ahihmanin mun tuam tuam ah kithehthang uh hi.A in n leh lo te uh it mah mah ta le uh taikhiatsan uh hi.Arab ten a zawhloh uh pen zumhuaisa in a lungsim uh n amah mah hi.Arab gam ten Israel tunga phuba lak pen a tup lian khat uh hong suak hi.A makaite uh zong om mawk mawk thei lo in bangci leeng phuba la thei ding cih bek bek ngaihsun uh hi.

Tua bang dinmun pan in politics lamah kithutuahna ding ngaihsutna tawh Palestine Liberation Organization ( PLO) hong piang hi. Ahmad Shukeirei makai dingin kiteel pah hi. Aigupta President Nasser in Soviet makaite tawh kilawmtakna bawlin huhna tampi ngah hi.Galvan zong Soviet ten pia uh hi.Hih bang dinmun ah hong din ciangun Arab mite zong thalawp uh hi.Kum 1948 a a min siatna uh a beisak dingin kum 1967 ciang Israel te do dingin hong kipan uh hi. Nasser- in Soviet bek tham loin Syria President Hafez al-Assad leh Jordan kumpi Hussain te zong ama lamah pangsak hi.

Arab ten pan masa uh ahihmanin Israel te zong mawk om thei tuan lo uh hi.Israel makai David Ben Gurion a khek Labour Party-a Prime Minister Levi Eshkol in kum 1967 May kha in kidona om ding cih Radio pan pulaak hi.Israel galkap te a lungkiat loh na dingun a manlangin Moshe Dayan pen defence Minister dingin kiseh hi.Kido dingin hong kithawi ta uh hi. Aigupta President Nasser- in kidona om pelmawh ding cih thei ahihmanin May 16 ciangin Britist-France-Israeli ten kum 1956 a a lak uh Suez Canal a UN galkap omte kihemkhia dingin UN makaite kiangah ngen hi. May 22 in tembaw pi paina lampi Strait of Tiran leh santuipi (The Red Sea) nisuahna lam zong khakcip uh hi.Tua munah galkap 1 lakh, kidona motor 1,000 leh kidona tank 1,000 koih uh hi.May kha tawp ciangin Arab gam ten zong kido dingin man ta(ready) ung ciin pulaak uh hi.

Kum 1967 June 5 in kidona kipan ta hi.Zingsang nai 7 lian in Israel te gamtang masa uh hi.Israel ten a masa pen in Egypt Airfield bomb tawh den siat sak uh hi.Tua khitciang tembaw khawlmun thupi te susia kik uh hi.Nisuahna lam pan Aigupta a huh dinga hong pai Jordan galkapte leh Golan Heights muna Syrian galkapte Israel ten thakhat thu in kap uh hi.A sawt lo in Palestinian gama Gaza Strip leh West Bank la zo uh hi.Syria gamgi a Golan Heights, East Jerusalem leh Sinai Peninsula zong la uh hi.A airfield uh leh tembaw khawl mun te kisia khin ahihmanin Arab te June ni 10 in hong guallel ta uh hi.

Israel in hun sawtlo sunga Arab kipawlte a zawh theih uh pen lamdang kisa hi.Mi tampi ten Israel CIA te nasep dan leh kido dan(strategy) te a gualzawhna hang lian pen khat in ngaihsun uh hi.Israel ten Sinai Peninsula a lak pen kum 1979 a kilemna (Israel-Egypt Peace Treaty) dungzui in Israel ten Aigupta pia kik hi.West Bank pen Israel galkapte khutsungah om hi.

1967 Arab-Israeli War – part 1/6

https://www.youtube.com/watch?v=E63AKJpa1Tk

Kidona a tawp ciangin Judate mun siangtho Jerusalem khuapi Israel te khutsungah hong om kik hi.A nam history ua mun poimawh mah mah West Bank zong tu in Israel te khutsungah om hi.Israel ten mipi ki-ukna(Civil Law) khauh takin bawl pah uh hi. Golan Heights leh East Jeruslem-a teeng Arab ten Israel khua leh tui(citizenship) a ngetna uh phal taka pia dingin thu khensat uh hi.

Israel ten manlang taka dan(civil law) a bawl uh pen UN Security Council) in mawhsak hi. UN Security Council ten Golan Heights leh East Jerusalem- pen kuama luah theihloh gam(null and void) cia a ciapteh uh ahi hi.Hih muna teeng peuhmah dan loa teeng(occupied) in ngaihsun uh hi.Israel leh Arab kikal ah kilemna a pian ding lam-etna tawh UN Security Council Danpi 242 ah “Land for Peace” ciin bawl uh hi.Israel ten dan kalh a a luah gam uh paikhiatsan dingin UN Security Council ten thu pia uh hi.Ahizongin Israel in awlmawh lo in UN te dan bawl pen thudon se lo hi.

Kidona tawh a lak uh West Bank a ommun bawl dingin Labour Party kumpi in thu vaihawm pah hi.West Bank pen kum 1948 in Jordan te khutnuai ah om hi.Tua pen Britain bek in thukimpih ahihmanin PLO te khutah aap kik hi.West Banka om mite Palestine arab kum 1948 kido laia refugee te hi pipen uh hi. Kum 1967 a niguk sung kido khit ciangin West Bank pen Israel te khutah om kik hi.Kum 1993 dongin Israel te thunuaiah om hi.PLO ten Israel te kiangah ngetna lai pia uh hi.Tuaciangin Israel ten Palestine mipi tamna te Palestine Authority (PA) te khut ah pia kik uh hi.Israel galkap ten mun khenkhat(tamlo) uk lai veve uh hi.Palestinian tapong ten buaisak zel uh ahihmanin Israel ten galkap tampi koih beh uh hi.Tu in Israel leh West Bank kikalah kulh bang sangpi tak kiciang hi.

Gaza Strip pen Aigupata tawh a kigamgitna mun uh ahi hi.Kum 1948-1967 dong Aigupta te khutnuaiah om hi.Kum 1967-2005 dong Israel galkapte khutnuaiah om kik hi.Kum 2005 ciangin Israel ten Israel’ s Unilateral Disengagement Plan dan bawl uh hi. Tua dan dungzui in Israel ten Gaza mun a mipi leh galkap khempeuh mundangah kisuansak uh hi.Gaza Airspace leh tembaw khawlna teng bel Israel te khutnuaiah om lai veve hi.Gaza gamgi tungtangah Israel, European Unions (EU), Palestine Authority (PA) leh Aigupta ten kilemna bawl uh hi.Tu in EU ten encik gige den hi.

Kum 2006 June in Hamas Movement ten zawhna hong tang uh hi.Tuaciangin gamgi tungtangah buaina naakpi takin hong om kik hi. Israel leh EU ten Hamas Movement thukimpih lo uh ahihmanin EU ten Israel tungtawna kumsima huhna a piak uh zong Israel ten khaktan uh hi.Palestine refugee te lah nisim in khang sem sem uh hi.Arab te heh uh ahihmanin Khartoum-a Arab makaite vaihawmna ah Israel tawh kilemna thuciam lo dingin hoihsa uh hi. Khartoum vaihawmna pana Dan kibawl te;

1) Israel gam hong piankhiatna thukimpih lo
2) Israel tawh kilemna thuciam lo ding
3) Israel tawh kihona nei lo ding

Israel-ten Arab gam leitang a ukte uh a piak kik masiah uh buaina om zel ding hi.Israel ten gualzawhna tawh gam la in nei mahle uh tua pen buaina a omsak zel ding thu khat hi. Israel leh Palestian te kikal buaina tawh kisai kilemna thu tamveipi kigenpih khin hi.Ahizongin tuni dongin beisiang cih om thei nai mah mah lo hi.Laisiangtho a i muh bangin Israel te pen Jacob suan leh khak ahi uh hi.Arab te pen ISmael suan leh khak tea hi uh hi.A nih un Abraham suan leh khak himah le uh kido do mawk uh hi.

Pau Tun Thang