Nigeria ah biakinn cim, mi 160 kiim si

Nigeria ah biakinn cim, mi 160 kiim si

Dec. 12, 2016: Uyo khua-a Reigners Bible Church International kicite biakinn tung zanhal in a kikhop lai takun kicim a, mi 160 kiim in sihna tuak a, a si kibeplap lai dingin ki-ummawh hi ci-in zan in hospital director in pulak hi. Uyo khua-a zato inn a misi koihnate (mortuaries) zanhal panin si luang tawh dim hi ci-in University of Uyo medical director Etete Peters in The Associated Presste kiangah ci hi.

Hih Reigners Bible Church International pawlpite biakinn pen manlang takin a kizawh theihna dingin a kilam hi a, a pawlpi phuankhiapa Akan Weeks in bishop a ngahna pawi bawlna Kiginni in kinei ding ahih manin tua hangin a lam ten nawh lam mahmah uh hi ci-in pawlpi mi ten ci uh hi.

Computer program analyst Ukeme Eyibio in tuahsiatna mun ka va delh pah a, liamna tuakte dah leh kap in mau ngeingei uh a, sisan naisan leh si luang, handbags leh khedap tua munah dim a, kikhawm a liamna tuak mi 10 ka va hunkhia a, ka car in ka pua hi ci hi. Hih tuahsiatna ka muhte hangin zan in ka lunsim ah hong kilang den ahih ka ihmu thei kei hi ci hi.

Si luang a hihna kitel nai lote (uncounted victims) tu-in Uyo sunga misi koihna tuamtuamte ah kikoih lai a, misi koihna munte dim in awng nawn lo ahih manin sihna tuakte innkuanpih ten va sim lak uh hi ci-in gen beh hi. Journalist ten hih tuahsiatna mun a delh hangun pawlpi makai ten a camerate laksak sawm in, nung kik dingin na lehsawl uh hi.

More: Nigeria gamah Suicide Bomb sukhamding in numei kizang

2014 in zong Nigeria gam-a khuapi gol pen Lagos-a Synagogue Church of All Nations pawlpite dawl tampi a kibawl zinbuk (multi-storey guesthouse) kicim a, mi 116 in sihna tuak hi. Sihna tuak a tamzawte pen South Africa gam-a megachurch phuankhia T. B. Joshua nungzuite hi a, hih tuahsiatna hangin structural engineers nih leh T.B. Joshua tungah “criminal negligence and involuntary manslaughter” ngawhna kibawl khum hi. Source : The Hindu and Associated Press/ Thang Khan Lian