Nidang lai leh tulai ~ Rev. Thang Van Lian

Nidang lai leh tulai ~ Rev. Thang Van Lian

Nidangin guitar tumte leh music ukte pen zu tawh a buai tam zaw ahih manin music kici peuhmah dawi nasepna danin i ngaihsun a, tu hun ciangin music thupitna leh a hoihna thei ta ihih manin i biakinn nangawn ah music sinin i tum ziahziah ta a, nuntak zonna nangawnin i nei thei ta hi.

Rock, Rap leh Hip Hop music cihte dawi vai sa-in a zadah mahmah tampi i om ngei a, tu-in khua mu ta ihih manin love song, gam ngaihna leh biakinn sung ciang nangawn ah music namkim a hot theithei tum ziahziah, sa ziahziah in nuam i sa thei ta hi.

Hun khat lai-in Zogam ah “Khuang pen” Pasian’ thu tawh kituak lo, ci-in biakinn a zat ding kikham cip a, ahi zongin tu hun ciangin Zogam biakinn a tam zaw ah kikham nawn loin thungen khami khempeuh phial in khuang tum uh hi.

Nidangin biakinn sungah lam kawm diang kawmin la kisa ngei lo a, tu-in ahih leh tum theih khempeuh tumin contemporary music style te tawh phatna la tung dian vai dianin i sa kheng khang thei ta hi.

Hun khat lai-in leitung pang lang khat a thupiangte pen leitung pang lang khat ate in mu thei ding, en thei ding… cih thu kigen pen hai vai kisa mahmah a, ahi zongin tu hun ciangin online khawng pan live enin thu i kiza a, hai vai i sa het kei hi.

Nidangin mihingte huih lakah lengin khualzin ding, cih khawng hai tawpna in na kingaihsun ngei a, tuhun ciangin vandawn ah nai tampipi lengin Zogam leh USA khual zin ta ihih manin lamdang zong i sa man nawn kei phial ta hi.

Hun khat lai-in leitung a bem hi, a cite hai sa lua-in kithat zawzen ngei a, ahi zongin tu hun ciangin leitung a pekpi hi, kuaman ci nawn lo hi.

Hun khat lai-in US Dollar pen vang nei lua ahih manin Dollar maw Pasian koi teel zaw ding, a ci mawkmawk tampi om a, tuhun ciangin Pasian in Dollar hong zeeksak hi, ci-in dollar muh ding leh zeek ding i hanciam thei ta hi.

Hun khat lai-in ngeina pawi khawng Pasian’ thu tawh kituak kei, ci-in minam vai khawng zong Pasian’ vai kei, i ci a, tu-in ahih leh GZA leh Zomi Innkuante makai-in mun khempeuh ah Zomi Nam Ni leh Khuado bawl ding, i hanciam thei ta hi.

Nidang lai-in biakinn sungah numei leh pasal a tuam tek in kitu litlet a, tu hun ciangin kuaman hong sawl lo napi, numei pasal kikhen nawn loin i tukhawm zihziah lel hi.

Nidangin numeiten pheituam tual teng le uh kilawm sa loin i mudah ngei a, tu hun ciangin khua mu ta ihih manin lamdang sa lo bek tham lo nisimin vaikuanna, inn ompihna leh biakinn nangawn ah i zang thei ta hi.

Contemporary context cih leh popular culture… cih kammal tawh kizom thu le la leh nasep silbawlna peuhmah satan a sa pahpah a pom thei mahmah lo lungsim hi beekbaak nam leh himah veh e, ci-in a pom siam a nuntakpih siam mihing nam 2 om den hi.

Pawlpi sungah tuhun paizia a sang siam lo a hi beekbaakte kiam hanhan uh a, tuhun tawh kituak music khawng, media leh IT vanzat khawng a zang theite bel khang hanhan leuleu uh hi.

I khuamuhna tantan, i laisimna tantan tekin i thupomzia leh nuntak dan kilamdang a, tuni a i pom loh leh i san loh khat zong a man lo leh a siahuai hi khin tuan lo hi. Rev. Thang Van Lian