Ngimna kician na nei hiam? ~ Deih Tung

Ngimna kician na nei hiam? ~ Deih Tung

Kaneu lai pan kipan in kanu leh kapa in lai lam hong pan tah mah mah uh a, lai sim leh lai gelh ka uk mah mah hi. Sang kakah cil pan ki pan sumleh paai a ki sam bang bang kanu leh kapa te in haksa pi pi in hong vai hawm sak uh a, sang ka kah to to hi. Kapa in Engineering kasuah ding hong deih a, kanu in siavuan ka suah ding hong deih hi. Kanu in siavuan na kah zawh na ding a hih nak leh ih neih sateng ih bei lawh phial zong na kah ding hi hong ci hi. Ka nu leh kapa hong deih sak nate uh thei ka hihman in laisin na ah lai ka han ciam hi. Ka hanciam na tawh ki zui in ka kum tawm lai siah bang pen ka sang kah na ah lai a pil pen pawl ka hi den hi.

Ka ut tak tak a hih leh bang hiam ci in kei leh kei ka ki thei kei a, ka neu lai thu in siam na siam, Kungfu siam, boxing siam khawng ka ut hi.Sangkhaan sung ah laika vuan lai tak na ngawng in ka sangsia pi pa in mi pil mah mah leh Kungfu siam koi na ut zaw hiam hong ci in hong dong a, Kungfu siam ut zaw ing ka ci hi. Hih pen laivuan na khaan sung hi a, sia pi pa inhong lehdot leh hong khel dot a hihi.

Kanu leh kapa in lai pil ding inhong deih sakzah khat un ki mawl ka uk mahmah a, siamna Kungfu kua in hong hilh thei ding hiam ci inka lung ngai a, ka lawm tetawh ka ki kum zelzel uh hi. Ka lawm te khatin ihkhua sung ah nidang a galkap lui khat taihcondo a siam khat om in tua pa kiang ah siam na hong hilh in ci leng hoih in teh cih na tawh siam na sin man ding in a lo vuah nipi khat sung bang a mawk na in lo ka khawh pih uh hi.Zing kal nitak kal in siam na dan hong hilh a, kalbal, tha lak dan hong hilh in, sun ciang pheigolh, ci golh lua in nak pi tak in ka gim hi.

Ka lawm te pawl khat bel tha nei zaw deuh uh a hih manin thala zo leh siam na dan sin zo uh a, kei ka hih leh ka ci golh lua in ka sinsuak zo kei hi. Banghang hiam cih leh tua Galkap lui pa in ka thapuak hong et et teh tha nei lo lua ka hih man in Deih Tung aw siam na lam ah na tha in pia kei lua in nang a ding pen Kungfu lam a hi lo adang khat ah na ki hei zaw le cin hoih zaw in teh hong ci a, hong deih nawn lo lai lai hi. Hong deih nawn lo kawmkal ah ka ci golh lua a hih manin Kungfu siam ka ut zo nawn kei a, ka lung zong a kia hi.

A hun zui in khua hun hong ki laih to leuleu a, bawhlung sui siam te ka eng to leu leu hi. Zingsang sim in ka valzangtual pi vuah tai khiang khiang zelzel in ka ki mawl zelzel hi. Bawhlung lawp mahmah honkhat ki om a, ka ki mawl mawl uh hi. Ka lungsim ah bawhlung siam mah mahleng miminthang khat suak zo ding ing a, ka ci vial nong hi. Bawhlung suihdan, ki mawl dan a hilh ding sia khat om a, sum tawh ki guai in ki mawl dan hong hilh hi. Sum lah bei tha lah bei, ci teng golh in ki gim mahmah hi. Kha khat sung bang ki mawl dan ka sin khit uh teh ka siapa in Deih Tung aw nang pen bawhlung sui ding pawl hi kei teh na ki mawl dan kong et teh a ki mawl ding lam hi kei cin a baih lai in tawp le cin hoih zaw in teh hong ci a, bawhlung sui ki sin na pan ka tawp hi. Tua khit zawh tu ni dong in bawh lung puai khat bup ka sui nawn kei hi.

Khangno lai ka hih na tawh ki zui in ka lawp a hun hun in hong ki laih to to a, Music ka lawp leuleu hi. Guitar lui mah mah khat ka khua sung va papi khat kiang ah ka lei a, kei guak in ki sin in tum ci pi in ka tum bang bang gun hi. Ka khuasung vua Guitar tum siam mahmah khat kiang ah nitak a man hunkal kal in sinding in ka va gen a, tua pa in zong hong hilh thei mah ning hong ci hi. Kei zong lawp mah mah ka hih man in Guitar tum siam min thang mah mah khat ka suah zawh na ding ci in ka han ciam to to hi. Kha 3 sung bang ka sin khit teh ladawng khat na ngawng zong ka tum thei tuan nai kei a, ka sia pa in Deih Tung aw nang pen music lam ding hi kei teh, tu in kha 3 bang sin khin in bang mah ki lamdang nai lo nai teh Guitar tum nawn dah zaw in la nang hih theih nang ki vat khat hoih tak in ngaih sun pha inhong ci a, Guitar sin na pan in ka tawp leuleu hi.

Kanu leh kapa in lah pilna hong deih sak mah mah uh kawmkal ah kei pen pilna lam ah lung lut lo in Kungfu siam ding peuh, bawhlung kimawl ding peuh ka lung lut hi. Hih Guitar tum ka sin na pan in zong bang mah khan toh na ngah ki sa lo leuleu ka hih manin ka nu leh ka pa te in laisim in hong cih uh bang a ci peuh mah hiam ci in lai ka sim zelzel hi. Lai ka sim kawm kawm in ka sep theih bang hi a, ka ki vat pen pen in bang hiam ci in ka ki ngaih sun den hi. Tangthu sung ah a minthang mah mah Napoleon, Adolf Hitler te khawng ka eng mah mah leuleu a, Ka lung sim ah Galkap ka ut hi.

Galkap tum ding in Galkap bu suak ding, zalian pi pi nei ding in mitam pi in zahtakna hong pia diam diam ding cih ka ngaih sut khak teh ka lung sim ah nuam in ka lawp khol hi. Sanglai ah pil lo ka hih manin Galkap tum ding in ka ngaih sun hi. Galkap bu suah theihna ding in DSA kah masak kul a hih manin tua DSA ah ka kah theih na ding laivuankhat ka vavuan a, lai vuan na ah ka ong hi. Laivuan na ah aong teng kam tawh thu dot omleuleu a, tua lai ah ka kia hi. DSA kah thei kei mawk leng galkapbu suakzo nawn lo ding ka hih teh cih in kei leh kei ka ki thei a, ka tha a nem mah mah hi.

Kaneu lai a ka ut mahmah a hi Kungfu siam, ka suah zawh loh leh tu a Galkapbu suak nuam a, ka suah zawh loh pen nak pi in ki lamdang hi. Galkapbu suah nop na lung sim tawh ngim na ki cian mah mah dankhat in ka ngaih sut zawh kum 3 sung bang a hi hi. Kum 3 sung in Galkapbu suah zawh na ding vive a ki sam ding te ka sim a, ka ki ging khol hi. Galkap bu ka suah zawh nawn loh ding tak teh ka lung sim khat hong palang gawp a, ka ut meel ka ki thei kei leuleu hi. Ka ngim na khat kipelh leuleu ahih man in nak pi in na ka sa hi. Kanu leh kapa in sang khat ah sang kah zom lai in hong cih cih uh hang in kalung sim ah bang mah a om kei hi.

Ka phawk kik thu khat leh ka mang ngilh hetloh thu in ka khua(Valvum) vuah nausuak siamah khat hong tung a, a ma om na ding ah lah a mah guak om ngam lo a hih manin ko inn ah hong om hi. Galkapbu suak nuam mahmah in suak zo lo ka hih lam hong theih teh siamah nu in nangbang suak nuam na hia? Hong ci a, ka dawng dan ding ka thei kei vat hi. Hih dotna na theih kei leh na theih na ding in sangkhat ah sang zom kawm in la na ngim na bul pi leh hih lei tung ah na suah nop tak tak in bang hiam cih dam dam in ki ngaih sun to to in hong cih pen maan ka samah mah hi. Ihsep pak ding khat ih theih loh tak teh mawk din khawl sang in khat sem kawm zaw leng tua tung tawn pan in a hoih zaw khat ki thei khia hi cih ka mu hi.

Sangkhat ah ka zopkik tak teh ka muh na khathong ki laih to leuleu a, gamvai na sem te thu pi ka sa to leu leu hi. Lai sim leng Gamvai(politics) bek bek ka sim a, thu ki gen te ka zak nop pen pen thu in Politics hong hi to leuleu hi. Ka lung kham na bul pi khat in Zogam ah pau ih kibat loh na pen ka lung a kham pen pen hi. Bang ci bang in ka gam a ding in na sem thei ding ka hiam ci in gamvai sep dan ding gel dan ding teng tawh ka buai mah mah vial nong hi. Kum hong ki hei to toin gamvai nasem te zong ka lam et na zah in hong gual zo tuan lo uh hi.

Gam vai ah gammakai ding ci inka lamet pawl khat bang pen panmun ngah zo lo in a nuntak na uh koi ah om hiam cih zah dong in ki mu nawn lo a, mangthang uh hi. Mi tawh kidem ding hi mawk a hih man in kalung sim ah ka lauthawng khol pong hi. Dam dam in ka lung hong kia kia a, atawp na ah Politics tawh ki sai ngaih sut na ah zong koih loh ding in ka khen sat ta hi.Khensat ka cih sam hang in gamvai thu khat peuh peuh aom ciang ngaihsun kha lo leh mawk om ding cih bang in ka omthei tuan kei veve hi.

Nuntak zon natak tak ding in pil na laigil nei loka hih manin kanu leh kapa nasep na maban lokhawh mah ka kho to to a, zi leh ta nei in ka hun hong bei to to hi.Ka ngim na inbanghi a, bang ut pen ka hiam? Bang suak zo ding ka hiam? Ci in kaki ngaih sut kawm kawm in ka hun hong bei a, tu ni dong tawh ka hun a mawk bei bei hi. Ka ut pen pen leh ka lawp pen pen in bang hiamci a ka ki theih tak tak ciangka kum tampi ka phata hi.

Tua hun lai tak in ka uk mah mah leh sem lo in ka om theih loh lai gelh leh laisim a hih lam ka ki thei khia hi. Hih dan a ka ki theih tak teh ka kum te ka thak pat kik nuam a, a hi zong in bang mah ka hihthei nawn kei hi. Hih ka nuntak na ah ka lungkiat na, tha nem na nei lo in a sem a hah kat teta khat hi leng nam khat teitei ah a minthang ka suak pel mawh ding hi. Tu in a hih leh kei kua mah in hong thei lo a,ka khua pih teng na ngawn in hong thei kim zo lo lai hi. Mi mawk mawk khat ka hi lel a, kua mah in hong thu sim lo hi. Ngim na ki cian nei lo in vakthap leh tup na gil ka neih loh hang ahihi.

Khangno te in ngim na kician hong nei un la, tup na gil hong nei un. Kei bang in bangmah a tangtun zo lo na hih loh na ding uh kong deih manin hih lai kong gelh hi. Na khang no lai in ngimna ki cian nei le cin na tup na na tung pel mawh ding hi. Na ngaih sut na tha a hat lai, na ci a dam lai in hanciam in. Bangngim na nei na hi hiam? Na ngim na na tup na koi cih leng tung thei ding ka hihiam cih nang leh nang ki sit in la ki thei cian in. Tu mah mahin ki dong in la kei ka ut bang hiam?

Ka suah nop tak tak in bang hiam cih tu mah mahin ki sit tel in. Na pai pai kawm in na pai nading a thei lo pi na hih khak ding dah huai hi. Na pai nop na na tel khit tak teh na paidan ding na thei ding a, na lam zang pan ding hi. Kum tam pi ka phak khit teh ka ut tak tak leh ka lawp tak tak ki thei pan ka hih man in tu lai khangno lai te in kei dan hi lo in na khangno lai mah un na lawp tak tak uh, na tup na tak tak uh bang hiam cih na ki theih ding kong deih hi.

Azenzen in ka neu lai pan ki pan lai sim simin lai gelh to to in hileng ka nuntak sung in lai hilh siam, lai gelh siam minthang khatsuak zo ding in ka ki lam en hi. Nidang a ka kungfu, bawhlung ka lawp danin ka neu lai pan ki pan ka lawp tak tak leh ka sepnop tak tak lai gelh a hih lam a ki theikha hi zen lengmaw ci in ka ki kingaih sut kik teh ka hun ka la kik nuam lua hi. A hi zong in kei a ding in nitum khin ta a,khangthak ta ding in ni hong suak ta hi. Tua a hih man in khangthak Zomi te in ngim na ki cian nei tek ding in kong deih hi. Lunggulhna, tupna kician nei a, a hanciam mi ading in hih leitungah a piang zolo ding a om kei hi. Deih Tung