Ngeina leh Christian Upna (4) ~ Rev. Fr. Damian Dal

Ngeina leh Christian Upna (4) ~ Rev. Fr. Damian Dal

Ngeina cihthu namnih in kitel thei hi. Ngeina (culture) i cih in mihingte nuntakzia khantohna, amaute pilna leh theihna te asangpenpen leh ahoihpenpen, atangzai penpen leh apicingpenpen a nuntakpihna cihna ahihi. Hi cibang telna zia pen nidangpek ahi, leitung piancil a kipan minam khempeuhte sungah akimu ngeina tawhkisai amau te telzia leh nuntakpihzia ahihi.

Ngeina cihthu telzia anihna in khangthak (modern view of culture) te ii ngeina cihthu atelzia uh ahihi. Hih khangthakte muhzia ngeina i cih in, minamkhat ii lungsimpuakzia, lungsim khuamuhzia (philosophy) leh nisim asinkhak athuakkhak thu te tungah minam khat ii muhzia, sanzia (responses) te ahihi.

Hih telzia thunih te hangin, ngeina i cih in mimal leh minam hongkizomsak, mimal leh minam khau bang honghen in, tuibang honggawm ahihna thu kimuthei hi. Minam khat ii ngeina in deih le deihlo cihthu hilo, thei le theilo cihthu hilo a, tua minam sunga om mimal tungah nisimin thunei gige hi. Tua thu hangin, sisan in thugenhi kici hi.

Ngeina ii hoihna ametlawh, akhantohlawh, anopsaklawh pen tua ngeina nei minamte ahihi. Hihthu hangin, mikhat peuhmah in ama minam ii ngeina te paaikhia thei ngeilo hi. Athei keiphial zongin, tua ngeina te in amasungah nungta gige ahihman in, minam leh minam ngeina kikhen theilo hi, ci in ana kiciamteh ahihi.

Ngeina cihthu akhiatna atangzaizaw in tawm i enlai dinghi. Ngeina i cih in pupa te hunpekpan hongpai amaute nuntakzia, thungaihsutzia, thumuhzia, annek tuidawnzia akipan, amaute nuntakna sungah zungkha in akhang akhangin hong kizomsuk minamkhat ii kipattahna leh, kilamna innpi ahihi. Tua ahih manin, ngeina i cih in, minamkhat ii bulumna, picinna, innpi zong kicithei hi. Ahi zongin, tua innpi pen kipuah, kihah, kizem in hun le mun tawh kituak in ki puahpha toto a, minam innpi ahihna kibeisakthei ngeilo hi.

Tua hi a, ngeina i cih in, puahkul, hahkul, zepkul a, ahun le amun tawh kituak in puahphat tohtoh ding ahihi. Genteh na in nikteenzia puansilhzia te ah teltak in kimuthei pen hi. Ngeina in khanglui leh khangthak kizopna guipi zong nahihi. Khanglui pupa te nuntakna ah zungkiphut in, khangthak leh khanglai ding khangsawnsawn te nuntakna sungah ngeina gui hongzam suksuk ahihi (cf. Vatican II: 1965, Gaudium et Spes, 53).

Ngeina in minam puahpha in zema, minampicing suaksak in, minamlamsang hi. Tua mahbangin mihing te hangin ngeina piangin, mihingte in ngeina bawla, mihingte in ngeina ciingin keem in, mihing te in ngeina puahpha in, mihingte in ngeina picingsak hi. Hihthu hangin minam khat leh amau te ngeina koi piangmasa a, koi thupi zawhiam cihthu dotna in amawknapi ahihi. Banghanghiam cihleh mihing omlo in, minamkhat ii ngeina cih omlo a, ngeina neilo minam na omlo hi.

Tuhun ciangin mitampi te in “Ngeina pen mihingte bawl hilel hi” (Culture is manmade) ci in pawng ngaihsut thei uhhi. Human being is formed by its culture – Ngeina in mihingte nuntakzia kikhelsak hi. Hihthu hangin ngeina leh mihing (ahihkei leh) ngeina leh minam koi masak dinga, koi nunun ding cih thu in, minam siasak in, ngeina zong siasakthei hi.

Hihthute hangin, minamkhat ii ngeina sungah Christian upna in innteek asuah matengin, tua Christian upna in tua minam sungah zin tanghden hi aci ihihi. Upna in mihing nuntakna puahin, keemin, khangcingsaka, lamsangin, picingsak hi. Upna in asi lo in, anungta upna ahih den nadingin, upna puah in, upna keemin, upna khangcingsak a, upna ipicin sak semsem ding Pasian piak vaipuak anei ihihi. Hithu te hangin, Ngeina le Christian upna kithupuak theihna thu tampi ihmu thei semsem hi. Rev Fr Damian Dal