Ngaihsutna Mawkna Lo

Laphuak siam Sanford F.Bennett’ omna ah Joseph P.Webster hong pai hi.
Tua laitak Bennett sabuai ah tu-a lai khat a gelhgelh laitak ahi hi. A
lawmpa’ lamah kiheii-in, “Bang vai om ahia?” ci-a a dot leh, “Bangmah
hi kei e, nung ciangin hong hoihhoih lel inteh” cihsan hi. Bennett in
tua kammalte a zak ciangin, “Nung ciangin a nopna! Tu-a pen la-in
phuak leng e?” a cih leh Webster in, “Hoih kha mah inteh”cihsan lel
hi. Bennett sabuai lamah kihei-in, a manlang theihtawp in hong gelh
pah ngelhngelh hi. Tua lamalte a lawmpa Webster pia phei hi. Webster
in tua lamalte en a, sabuai lamah kiheii-in, a aw ding phuak pah hi. A
violin la a, a phuahsa teng a tum khit ciangin a sakkik ding phuak hi.
Tua lamalte gelh dinga Bennett in a laikung a lak a kipan a lawmta vua
tua la a sak dong uh minute 30 sawt lo ding hi, ci uh hi. Tuni dongin,
“Nung Ciangin A Nopna (Sweet By and By)” hoih ki sa den hi.

Laphuak uk, Laigelh uk, Thugen uk….ukna cih khat a neih mikhat in
lawmta ki hona pan maw, a ngaihsutna pan maw, lai asimna tung pan
maw…cih bangin a uk khat uh hong suah khiat ziau pen nai tampi, hun
tampi beilo uhhi cih ki mu hi. Tua ahih manin amasa in i ngaihsutna
bang tawh na khat peuh ki sem khia thei ahih manin i ngaihsutna pen
bang lam tawh ki sai hiam? A hoihlo lam i ngaihsut khak zenzen leh a
hoih lamin a ngaihsun theih ngaihsutna hi kik ahih manin mihingte
nuntakna hoih lamin a kalsuan nuam taktakte adingin ki khakcip ngeilo
hi.

Thuhoihlo khat Thuhoih tawh a hei thei ngaihsutna ahih manin i
ngaihsutna te mawkna lo hi. Sem khiata kei lecin, pulak khia kei lecin
zong na ngaihsutna in hong lungnuamsak in hong lunggimsak thei hi. Ka
ngaihsutna mawkna hetlo hi, ka ngaihsutna bangin tangtung ding hi cih
upna sepna maban ki sotna khat neihta ning ei cih ni simin phawk huai
den hi.

Na sep thalawp takin tuni kuan ning cih na ngaihsut leh tua ni
tawntung tua na ngaihsutna in hong thahat sak hi. Hih thu ka zak, ka
sim manin kei adingin manpha hi cih i ngaihsut leh ei mahmah a hampha
hi hang aa, hehna in i ngaihsut khak zenzenleh kuama theihloh in ei a
lunggim ki hi mawk hi. Ih gen nop bulpi penin i ngaihsutna khat
peuhpeuh mawkna cih bangin ngaihsunlo zaw in mawkna lo hi cih lungsim
i neih ding lunggulhna hizaw hi. Lungdam.