Ngaihsun phapha ni… tha kipiak dan ~ Pau Khat Suan

Ngaihsun phapha ni… tha kipiak dan ~ Pau Khat Suan

Mihing hihna i a-manphatna, Pasian in manpha ongsakna, ei’ hihna leh thupi’na hi peuhmah lo – ong itna hang bekbek a manpha ongsa lua mahmah ahihna, ei’ hihna leh thupina i kisialh i angtan ding om peuhmah lo, Pasian’ ong itna bek mah i kisialh leh i angtan ding ahihna… cihte hoihtak i kihilh ding leh tha kipiak ding hibek a…

Hih thu mah tawmcilik khat hei kiau in agah kilumlet sak, kilehbulh sak lian …. Ka ginat loh hang, ka zawn’ hang, ka hoihloh hang, ka cinloh hang, ka hai hang… ka .. ka…. ka.. (self centeredness) bulphuh a kisialh ding leh angtan ding kihilh leh tha kipiak pen Dawi Mangpa, Satan’ vanzat hoih mahmah ahi hi.

Limtak tusuk in daitak lungngai diidee dih ni. Ei’ hihna ahi hoihna, kicinna, ginatna, pilna siamna cihte hitaleh, hoihlohna, cihlahna, haina cihte hitaleh i kisialh ding, i angtan ding leh a masa a i koih ding khat beek omlo hi.

Naupangte leh numeite in upate leh a pasalte uh tung ah kingeksakna tawh a gualzawh bang un a cinglah leh a pillo deuh teng in kingeksakna tawh mipil leh a kicing zawdeuhte’ mai ah gualzawh tuh thei mahmah hi.

“Pilloh hang..”cih ki-thuhilhna pan “pilna theihna a tuamciat hi, a haizaw cihbang kuamah om kei..” cih dinmun ong tun hi. Theihloh kiphatsakpih (or) tua ka theihloh hang nang’/ama’ theihloh adang khat thei lel ing” cihbang tawh eng dem pongmawk pen tu-sawng Zomite’ lak a a laang sim gige ngaihsutna ahi hi.

• Hihpa zah a lai kapil loh hang, amah sang saili kap siamzaw ing..
• Hihpa zah a ka hatloh hang, ….
• Hihpa zah a experience ka neihloh hang….
• Hihpa zah a ka hauhloh hang….
• Hihpa zah a ka hicih loh hang… ka huacih loh hang….. hang.. hang… hang…

Cih lungsim kiguan ding a thu kihilh leh ki pantah ( direct or indirect ) zia le tong Zomite in nusiat huai mahmah ta hi. A diakdiak in mipi kikaihkhopna leh thu kihilhna platformte pan hihbang thute gen kidop, kipuah ding lunggulh huai lua hi.

Hai kisialh leh ginatloh kipahpih tha kipiakna in Zomite ong tuantualsak, i kal a kipalsak thu bulpite lak ah a bul mahmah khat ahi hi. I gen thu leh i zak thute limtak ngaihsun pha in, ngaihsun phapha ni. Pau Khat Suan