News update: Russia – Ukraine vai (March 29, 2022)

News update: Russia – Ukraine vai (March 29, 2022)

1. Russia leh Ukraine palai (delegations) te tuni (March 29) in Istanbul, Turkey gam ah kimuhna nei uh aa, Russia lam pan deputy defense minister Alexander Fomin in makai in, Ukraine lam pan Mr. David Arakhamia in makai uh hi. Kiho theih nangin palai asem Turkish President Erdogan in hih kihona pan thukimna pawlkhat ngah ding ka lamen aa, Russian President Vladimir Putin and Ukrainian President Volodymyr Zelensky te pen ka lawm it te hi ci hi.

Russia-Ukraine kikal kikupna ah kikapna khawl zawh nang – ceasefire agreement leh security lam kimuan theih nang cih te kihel pha diak ding hi ci in Ukrainian presidential adviser Mykhailo Podolyak in genkhia hi.

2. Russia-Ukraine kihona akibawl lai tak in Russia in Ukraine capital Kyiv khuapi leh Chernihiv khua ngei teng ah kikapna leh buluhna te ka khiam ding uh hi ci in Russian Deputy Defense Minister Alexander in genkhia hi. General Staff of the Armed Forces of Ukraine in belh Kyiv khua leh Chernihiv khua ngei pan Russia galkap themkhat hemkhia leh kilawm hi ci hi.

US thu nei lam ten belh Russia te gen khempeuh kium zo nai lo ding hi ci uh hi. Russian presidential aide Vladimir Medinsky in Russia-Ukraine kikal kikapna khawlna (ceasefire) hi lo aa, Russia galkap te them vei sung aki nungkin sak phot hi ci hi. Russia-Ukraine kihona hang in Detsi (gas) leh Sathau (oil) man them khat kiam aa, U.S stock market zong kah hi ci uh hi.

3. Russia-Ukraine kihona update: Gam nih kikupna pan President te geel ahi Putin leh Zelensky te zong maitang kimuh theihna vaihawm ding hanciam ding cih khat kihel hi ci in alang tuak in gen uh hi. Tua kikupna ah 2014 kum aa Russia te buluh Crimea Tuikulh vai zong kikum thei uh hi ci uh hi. Turkish Foreign Minister Mevlut Cavusoglu in zong tutung kihona pen kihona lak pan tha angah huai pen hi aa, tua tung tawn in kikapna kibuluhna te zong tampi hong kiam tuam ding hi ci hi.

4. U.S President Biden leh European gam makaipi te kikal tawh kihona tuni nei thei uh aa, Ukraine gam vai leh Russia te buluhna khawl zawh nang kikupna nei thei uh hi. Russia in Ukraine abuluhna hangin leitung gambup ah nek leh dawn leh detsi, sathau man cih te khang mahmah aa, tua vai te zong kikum thei uh hi. UK kumpi in belh Russia ten agalkap teng uh amanlang tak in Ukraine pan ahepkhiat uh ka mu nuam uh hi ci hi.

5. European gam ten Russian Embassy te pan diplomats leh intelligence officers tampi agam uh pan hawlkhia uh hi. Dutch leh Netherlands gam ten Russian intellegince officers 17 agam uh pan paikhia sak uh hi. Belgium gam in zong Russia diplomats (palai) 21, Chzech Republic in Russia embassy pan mi 5, Ireland in Russia diplomats 4 te a gam uh pan paikhia sak uh hi.

6. U.S. President Joe Biden leh Singapore Prime Minister Lee Hsien Loong te tuni in White House ah kimu uh aa, Russia-Ukraine war, North Korea, Myanmar leh China vai te kikum uh hi. Singapore gam pen Russia ten Ukraine gam abuluhna deihlohna apulaak masa Asian gam khat zong ahi hi. Kawlgam ah MAL ii ukna abuluhna leh mipi te tung angongtatna te zong kikum thei uh aa, tulai tak Ukraine gam vai akibuai mahmah hangin Kawlgam vai zong kimanggilh het lo aa, kizom to to ding hi ci uh hi.

7. US te Gal zumpi ahi Pentagon in Russia ten a galkap te uh hemkhia acih pen maan vet lo aa, galkap te omna amun akhin uh hi lel hi ci in Pentagon press secretary John Kirby in Press conference ah genkhia hi. President Biden leh US kumpi thu nei ten belh Russia te thu gen pen uphuai het lo aa, Russia ten leitung gambup khem koi koi thei nawnlo ding uh hi ci hi.

More: Russia gamsung Moscow khuapi ah vanlengkhat tuahsiat in mi 41 in sihlawh

Tuesday ni nitak lam mahmah in zong Capital Kyiv ngei teng ah kikapna om to to kik hi ci in CNN in genkhia hi. Ref: CNN breaking news, Twitter *** News Update zong LIVE tawh kikhah ding ahih manin kimu tek ni…. Thomas On Sian Mung (Thomas Mung Guite) Washington D.C March 29, 2022