News tomkim lak khawm (23 Feb 2017)

News tomkim lak khawm (23 Feb 2017)

Feb. 23, 2017: # New York City a om Lincoln Center ah Budapest Festival Orchestra performance lahna en dingin Jenny Heinz kuan a, a jacket nungah Trump a deih lohna (anti-Trump) laimal 8 by 11 inches a ki-at, “No! In the name of humanity we refuse to accept a fascist America,” cih a silh manin kilutsak lo hi. Jenny Heinz in hih puanak pen Trump Tower pua-ah lungphona kineih a kipanin ka silh hi ta hi ci-in The New York Times-te kiangah gen hi. Lincoln Center ulian ten a ticket man leh kik uh a, ahih hangin hih thupiang gen cian nuam lo uh hi. – The New York Times

# San Jose, California, US ah tuilian (floods) hangin mi 14,000 kiim in inn nusiatsan in tai khia ta ua, zan in ulian ten in khat khit inn khat a ban a banin encik uh a, mun sangna munah kihemkhia dingin thupia uh hi. Nung Kiginni panin guah nak zuk lua ahih manin mun pawl khat awm ciang dong pha zo hi kici hi. – The Deccan Chronicle

# Chicago Court in Indian-American Seth kici in $900 million project a bawlna lawhsam napi Chinate mi 300 khemin a sumte tampi a project adingin a meet dingin sum a koihsak (investment) manin kum thum sung thongkia dingin zanhal in sehsak hi. Indian-American Seth pen Chicago Convention Center kici 2011 in a phuankhiapa hi a, Chinese 300 panin a meet a sum $5,00,000 + administrative fee dingin $41,500 la hi. – The Deccan Chronicle

# Colombia gam-a FARC rebels ten kumpi tawh nung kum-a kilemna suai a kaih uh nungthuapna dingin March 1 ciangin galvan koih khiatna/ap khiatna “historic disarmament process” kici pan ding uh hi. FARCte pen Latin America gam-a dingin Marxism-Leninism-Socialist deih a kiphinte lakah rebels upa pen hi a, Colombia kumpi kum 52 sung na do uh hi. March 1 ciangin a galvante uh 30% ap khia ding uh a, May 1 ciangin 30% mah ap khia kik leuleu in, June ciangin a galvan khempeuh uh kumpi tungah ap khiatna “final disarmament” kici nei ding uh hi. – The Deccan Chronicle

# Ni dangin Russia gum Ukraine kumpi lui (a kipaikhia) Victor Yanukovych’ lawm Gas zuak a sumbawl mi leh Ukraine gam-a mihau pen nihna Dmytro Firtash kici in Spain gam-a organised crime tawh kizopna a neih manin Austria gamah kiman hi. Firtash pen kum 51 mi hi a, Russia gam-a gas company lian Gazprom tawh kizopna nei-in sum tampi ngah hi. Firtash in US President Trump in a vote zon’ lai-in Trump’ zon’na huh (campaign aide) ngeite tawh zong kizopna nei hi. Austria khuapi Vienna a om Vienna Court in zong nekgukna ah a kigolh manin US gamah piak khiat (extradited) a, thusitna mai-ah din’sak ding hi cih a pulak khiat ma a Firtash kiman ahi hi. – The Deccan Chronicle

# UK gam-a piang, Dubai pansan a sumbawl, Mara Group Holdings leh Inspire Group company neite tapa India mi Ashish Thakur in a zi lui Meera Manek khen sawmin thukhenna inn ah “divorce battle” kici sawtpi a neih hangin a vai siang thei lo a, a zi lui tungah makman sum tampi a piak ding hi ci-in sitni ten thukhensatna nei uh hi. A makman bangzah pia ding hiam cih bel kigen lo hi. Ashish Thakur pen Africa continent adingin billionaire naupang pen ahi hi. A zi lui tawh Space hawhna ding ticket $1,60,000 vai-ah zong buaina nei uh hi – The Telegraph

# Pakistan gam-a top Shariat Court in test-tube babies kici nupa nau nei thei lo ten pasal na tui (sperm) la-in numei na tui (egg) tawh test-tube ah zatui tawh lim takin naungek pian’sak theihna dingin “fertilisation” bawl pen thukimna pia ta hi ci-in Federal Shariat Court in pulak hi. Nupa kibangte na tui mah zang loin a dang panin lak pen kiphal tuan lo hi ci-in gen beh hi. – PTI

# 2030 ciangin mihingte kum 90 bang nungta zo ta ding hi cih thu ngentel taka kan (researchers) ten mu khia uh hi. South Korea gamah numei naungek 2030 kum cianga piangte kum 90.8 nungta zo ding uh a, 2030 ciangin S.Korea ah numei kum 65te (average 65yrs.) kum 27.5 a nungtakna uh kibehlap ding hi. France, Japan leh Spain gam-a numeite pen kum 88 bang nungta ding uh hi cih mu khia uh hi. S.Korea gamah pasalte nuntak hun (life expectancy) ding pen 84.1 hi a, Australia, Switzerland, Canada leh Netherlands gam-a pasalte nuntak hun ding pen 84 hi ding hi ci uh hi. Sub-Saharan Africa mite nuntak hun tom pen ding hi. Researchers ten a muh khiatna uh-ah gam hausate lak panin US gam-a nupi (maternal) leh naungekte tam si pen hi cih mu khia uh hi.

# NASA ten space ah leitung gam tuamtuam in space station dingin a zat uh International Space Station (ISS) ah SpaceX supply ship “Dragon” kici mi guk tuanna suppy pia dingin a sawl uh GPS in nasem khial (failure) ahih manin zan in ISS a lut ding khawlsak (aborted) uh hi. Nung diakin zong NASA ten historic moon pad a cih liang uh a len’sak sawm uh zong len’na mun kician nei loin leng (flawless flight) gawp ngeiingei hi. – PTI

# Britain Prince Charles’ zi lui, a phamsa Princess Diana (Princess of Wales) kizepna hoih nonote (iconic dresses) ziing ciang a kipanin London khuapi ah “Her Style Reign” cihna munah lak khiatna (exhibition) kinei ding hi.

A NGAIHSUTHUAI KAMMAL
“Mi khempeuh in sem khia loin a kampau bek tawh a tawpsan pen khawlsan ding poimawh mahmah hi. A kampau bek tawh khawlsan loin sepna tawh lak khia leh huhna kisam dongtuak ten huhna an (food aid) ngah thei pan ding uh hi.” – Pope Francis in S.Sudan food aid kisapna thu a genna/ Thang Khan Lian