News tomkim aa lakkhawm (06 February 2017)

News tomkim aa lakkhawm (06 February 2017)

Feb. 6, 2017: News pen a kicingin i post ciangin a sim nuam leh sau sa lua-a a phun den om se ahih manin a tom in tu ni-in pawl khat kaikhawm pak ni.

# France thukan (investigators) ten Paris khuapi a Louvre Museum suam dinga a ummawh a matpa uh thusitna a neih hangun a mimatpa un thudotnate dawng nuam lo hi. A kimanpa in nung Friday in French galkapte tem tawh dot sawm a, galkap ten a gil na kapsak uh a, nak liam mahmah ahih manin zato inn ah kipuak pah hi. Hong damkang ciangin thusitna a kinei ahi hi. Amah pen Egypt gammi hi.

# Saudi Arabia kumpi in a gam uh-ah phalna lai poimawh nei lo-a teng Pakistan gammi 160 a gam uh-ah puak kik hi. Tua Pakistan gambeel mi 160te Saudi gam panin Special flight tawh Pakistan gam-a om Benazir Bhutto International Airport ah kipuak kik hi ci-in Dunya News in suaksak hi. 2012-2015 kikal bekin gam tuamtuam panin Pakistan gambeelte mi 2,50,000 a gam uh-ah kipuak kik hi ci-in gen beh hi.

# Qatar kumpi in nung kum in gam ulian tampi in siah a piak nuam lohna hangun gamdangah a sum khol simte uh a pholakkhia Panama papers ah ko kigolh kha lo hi ung ci-in Pakistan gam-a Qatar palai Saqr Bin Mubarak Al Masouri in zan in ci hi. Qatar Prince Hamad Bin Jassim Al-Thani’ laikhakte pen ama’ aituam na (private property) hi a, Qatar kumpi in hih thu kipholakkhiatna vai-ah kigolh lo hi ci hi. Panama papers in thusim a pholakkhiat manin Pakistan Prime Minister Nawaf Shariff leh a innkuanpihte min zong tuang kha hi.

# US gamah naupang kum li mi khatin a ha a nawt loh manin a nu Iris Hernandez-Rivas (kum 20 mi) in a tanu gil peksak a, si hi. A nu in bel policete kiangah ka tanu bath room ah lut a, minute 15 khit nangawn in hong pusuak khia lo ahih manin ka va et leh bathtub sungah a lu kiphum in na si hi ci hi. Ahih hangin siavuan ten naupangnu autopsy a bawlna uh-ah a pumpi tungah sidup tampi om hi a cih manun Hernandez-Rivaz in a ha a nawt loh manin a gil ka suihsak hi mah hi ci-in kipoholakkhia hi. #Nupite a kungfu siamna uh zang siam lote zi dingin kihtakhuai kha ding hi. Lamka khua-ah zong blackbelt khatin a upa vua lum ngiau mawk hi.

# Kuwait in zong Syria, Iraq, Iran, Pakistan leh Afghanistan panin gambeelte lutsak lo hi ci-in President Trump in Kuwait kumpi in gambeelte a lutsak lohna a Facebook ah a phat hangin Kuwait Foreign Minister in tua bangin gambeelte lut ding kidal lo a, ahih hangin gambeel nuam khempeuh lut theihna ding dalna in “blanket ban” kici bel kikoih mah hi ci hi.

# US gam Missouri state sunga om Parkway School District a kah middle school naupang Gavin kici in President Trump in a lukhu ah “America liansak kik ni,” cih suai a kaihna a tuang lukhu a khuk leh a lawm ten bus sungah na ko gawp uh a, pawl khatin, “Kulh ciang nuam na hi hiam?” na ci uh hi. Tua bang lukhu a khukna hangin zahkona tampi tuak a, bus sungah kilawi gawpna piang lawh hi. Gavin a sang panin tawl khat sung kinot khia (suspended) lai hi. Gavin’ nu Christina Cortina in, “Ka tapa pen politics ngian zangte in etteh dingin na kizang uh a, ngawhna man lopi zang uh hi,” ci hi ci-in KMOV-TV in suaksak hi.

# IS ten Iraq gam-a om Mosul nitumna lamah khuamite teenna inn (building) vutvang sakin tua munte zangin pusuak sungtum in Iraq galkapte dona dingin panmun dingin zang uh hi. Khuamite’ inn a vutvang sakna uh a nasep thaman dingun IS ten inn neite tung panin Iraq sum 7,000 dinars ($5 kiim) ngen sawnsawn uh ahih khuami ten cimtak mahmah uh hi. Tua bek hilo in Mosul nitumna lam humbitna dinga sumbei ding khempeuh khuamite tung panin IS ten aana tawh sum ngen uh hi. Mosul khuapi pen IS ten Iraq gamah IS caliphate (kumpi gam) dingin a zat uh hi a, Iraq galkapte leh a pawl ten nung kum Oct. 17 in “Final Operation” kici panin US galkap ten tung lam panin huhna na pia uh a, tu dong kila zo nai lo lai hi.

# China gam-a om Zheliang province ah zan in foot message parlour (khe mekna sai) ah meikang hi. Hih meikatna hangin mi 18 kiim a sih banah mi nih in liamna tuak hi. Mi 8 pen meikatna hangin a mun ah si pah uh a, mi 10 zato inn ah si hi ci-in ulian ten pulak uh hi. Mi pawl khatte meikang panin a nuntakna a humbit theihna dingun tawlet a tawm khia uh a, meiphelh ten nasia takin meiphelh uh hi ci-in Sina Weibo microblog in hih thupiang maan tawh a zaihna suaksak hi.

# Barack Hussein Obama leh Michelle Obama in nipi kal nih sung Palm Springs leh British Virgin tuikulhte ah hun nuam a va zat khit nung un a teenna ding uh inn thak, Washington DC sunga om Kalorama neighbourhood ah ciah kik ta uh hi. A inn vengte un “Welcome Home” cih na suangin na muak ngeingai uh hi. Obamate nupa in Tudor kumpi inn 1928 kum a kilam, a golna 8,200 square feet innluah/sap uh hi. Hih inn ah lupna room 9, bathroom 8 leh a kim (eight and-a-half baths), living room khat, dining room khat om hi ci-in CNN in suaksak hi.

US President lui a tamzaw ten a term uh a bei ciangun Washington khuapi nusiatsan pahpah uh hi. Ahih hangin Obamate nupa in a tanu uh kum 15 mi Sasha Obama in a school kahna a man khit dong Washington ah innsap in om sawm uh hi. Obamate innvengte lakah French ambassador lui, US Congressman lui, Trump’ tanu Ivanka Trump leh Jared Kusher cihte om uh hi.

# IS ten Lebanon leh Jordan gam panin a galkap ding un naupang galkap a lak theihna dingun mi zuak a sumbawlte (human traffickers) sum pia uh hi ci-in UK report thak in suaksak hi. Counter-terrorism think-tank Quilliam in hih bangin report a suaksakna ah European Union’s police agency Europol kici ten naupang 88,300 kiim mang (missing) a, tua ten ngongtatna lungsim (radicalised) a puak theihna dingun a kipattahna a ngak khak ding uh lauhuai mahmah hi ci hi ci.

IS ten Lebanon gam panin a campte pan un naupang galkap leina dingin sum $2,000 pia uh hi. Nung kum in Jordan police ten Jordan leilu lam-a om Irbid kianga regugee camp panin IS ten naupang galkap lakna dingin a zat uh sleeper cell kici a bawl uh na mu khia uh hi. Report dang ten a genna ah IS ten refugee campte ah nek ding an pia uh a, tua bangin na hoih sem kineih in naupangte a galkap dingun zol khia uh hi ci uh hi. Source: The Times of India/ Thang Khan Lian