New York meikatna ahang kitheita, naupang kum 3 aphapan khat meitawh kimawlmawl

New York meikatna ahang kitheita, naupang kum 3 aphapan khat meitawh kimawlmawl

USA, New York khuapi sungah Thursday nitaklam in Apartment Building kaht meikanggawp a, mi 12 takin sihlawh uhhi. Tua meikatna ahangpen Fire Investigators te’n hoihtak akancian uhciangin naupang kum 3 khatin meikhuk ah meitawh kimawlmawl in tuahangin meikuang akipan hi ci’n FDNY Commissioner Daniel Nigro in Friday ni in genkhia hi.

Tua naupangno ii aomna Apartment pen dawlkhatna “First Floor” ah hi a, anu in atate 2 innsungah amauguak nusia uhhi. Innkongkhak tezong honsa in koihsawnsawn ahih manin, meikuang pen manlangtak in kilawhpah ziahziah hi ci’n Fox News te’nzong genkhia uhhi.

Meikuang kipatpen Thursday nitaklam 7pm madeuh hi a, mi 12 takin asihlawh banah adang aliamte lakah mi 4 zong gimmahmah uh cih kiza hi.

New York khuasung aom Apartment khat meikang, mi 12 si in tampi liam

USA, New York khuasung aom Apartment Building khat meikang in atawmpen mi 12 siding cih Fox News pan kiza hi. Tua asi mi 12 te banah aliamzong mi tampi om hi ci’n Mayor Bill de Blasio in Thursday nitak Press Conference ah genkhia hi.

Hih meikatna hangin tuzan in Bronx khuasung aom innkuan te hongki thehzak sak hi. Hih meikang pen hihkhuasung ah ihmuhkhak ahuaisiapen “worst fire tragedy” hiding hi ci’n Mayor Bill de Blasio in genkhia hi.

Tua meikatna Apartment Building pen dawl 5 (five-story) aphakhat hi a, Thursday nitaklam 7pm hunpawl in meikuang akipan ahihi. Asi te lakah naupang ngeklai khatzong kihel a, aliamzong tammahmah cihi. Asi tepen naupang kum 1 panin uhamsa kum 50 kikal hiding kici hi.

Hih meikatna aphual ah meiphelhding in Firefighters akigawm in mi 160 val in delhpah uh a, meiphelhhuan ngeingai uhhi ci’n New York City Fire Department te’n genkhia hi.

AF News (Associated Press) te genkhiatna ah tua meikatna Apartment Building sungah Elevator omlo cihi. Meikuang pen inndawl 1 na panin akipan masa ci a, tuapan in inntunglam avekin kizelto zihziah hi. Hih meikuang akitheih ciangin Fire Department te kizasakpah a, Emergency Call akibawlzawh Minute 3 sungin meiphelhding in Firefighter te tungpah uhhi.

Video: At least 12 dead in New York City apartment fire

Hih meikatna pen koipan in bangci bangin hongki pankhia cih gentheih nadingin ahun piaklai kisam hi ci’n FDNY Commissioner Daniel Nigro in genkhia hi.

Meikat laitak in ageinai panin amukha khat ii genna ah papi khat tua Apartment Building sungah lutsawm a, ahi zongin meikuang khauhluata ahih manin, lutthei nawnlo hi. Tuaciangin katate sikhinding uhhi ci’n awnggawp cihi.

More: Yangon, Thingangyun aom puanbawlna setzung khat meikang, Kyat Thein 7000 kangtum

Bronx khuasung ah abeisa 2007 kum inzong meikang omngei a, tuahunlai in naupang 9 leh ulian 1 si uhhi. Tua meikat kipatna pen Space Heater panin akipan ci a, Bronx khuasung ah mitam asipen “Deadliest Fire” in akiciamteh ahihi. Tuazawh tutung Bronx khuasung meikatna pen tunai tuahsiatna te lakah ahuaisiapen “worst fire tragedy” ahihi. Sawltak #zomidaily