New Delhi, India ah khualzinna ~ Rev. Lang Suan Thawn

New Delhi, India ah khualzinna ~ Rev. Lang Suan Thawn

Rev. Dr. J.M. Ngul Khan Pau’ deihsakna le sapna tawh South Asia Initiative of Leaders (SAIL) Seminar kah dingin Kawlgam pan Rev. Tual Hau Khup (Church Pastor, Upper Room New Life Church, Yangon) tawh July 2, 2014 ni-in Yangon pan New Delhi ah TG vanleeng tawh ka leeng uh hi. Bangkok ah tawmvei ka khawl uh a, tua pan TG vanleeng a lian deuh khat tawh New Delhi, India zuanin ka le’ng leuleu uh a, Indira Gandhi International Airport, New Delhi pen nitak nai 9:00 in ka tung uh hi. Ka kimuhpih ngei nai loh uh Karan in Airport ah hong na dawn hi. Ka Seminar kah nading uh mun ahi Treehouse Hotel (Hotel Queens Pearl), Gurgaon, New Delhi ah zin hong tungsak uh hi.

SAIL Seminar

Hih Seminar ah gam nga (Bangladesh, Myanmar, Nepal, Sri Lanka, le India) pan mi 28 kihel hi.

Ni khatna (July 3, 2014)

Zintun ni hi. Nitak lamin kipanin khatlekhat kimeltheihna, omna le nasep pulakna, Seminar sung kalsuanzia dingte pulakna, tua ban ah makaite in hih SAIL hong piankhiatna le a lametnate uh pulakna hunin kizang hi. Hih Seminar sungah Topa’n hong lamlah nadingin thunget ki-apna ka neikhawm uh hi.

Ni nihna (July 4, 2014)

1. Bangladesh pan hong pai sanggamte in zingsang devotion hong makaih uh a, tha kingah mahmah hi.
2. Rev. Dr. J.M. Ngul Khan Pau in Late 133 bulphuhin, “Unity for the Churches in South Asia” thulu tawh Thusinna hong makaih hi.
3. Gam khatlekhat pankhop sepkhop theih zia ding tawh kisai-in Jonathan Abraham in hong makaih hi. Tua hun sungah (a) Art & Media; (b) Business; (c) Children & Youth; (d) Mission & Social Justice; (e) Pastoral Care, Church Ministry, & Church Planting cih bangin group kikhenin thu kikupna le thu sunkikna a group zui-in hong neisak hi.
4. Delhi khua sunga Pastor-te le Khristian makaite tawh nitak-an nekkhopna ka nei uh hi. Hih hun sungah tutpih makaite tawh kiholimna hun nuam khat ka ngahkha uh hi.

Ni thumna (July 5, 2014)

1. Sri Lanka pan hong pai sanggamte in zingsang devotion hong makaih uh a, tha kingah leuleu hi.
2. Rev. Dr. J.M. Ngul Khan Pau in “Building and Discipling those around us” cih thulu tawh thusinna hong makaih hi. Group zui-in kikupna le thu muhkhiatte pulakkikna zong kinei hi.
3. Mailam ah kizopna hoih neih theih nading kikupna ka nei uh a, 2015 ciangin Nepal ah kimuh kik dingin kigeel hi.
4. Hunkhakna ah Northeast India panin Rev. Gibson Marak le a lawmte in hong makaih uh a, lungsim hong lawngkha mahmah hi. Jesu i sila limpua makai ahihna lim la-in khatlekhat khe kisawpsakna le thu kingetsakna ka neih khit ciangun, Nekkhawm nekna tawh ka zom uh hi. Tua khit ciangin “Give Thanks” cih la sa-in thungetna tawh SAIL Seminar nuamtakin ka zo uh hi.

Zomi Pawlpite ah:

Dr. J.M. Paupu le New Delhi sunga om Zomi Pastor-te le makaite vaihawmsakna tawh July 6, 2014 Nipi Ni-in Zomite kikhopna pawlpi pawlkhat ah ka na kikhawm thei uh hi. Rev. TK Lianpu in ka Seminar bawlna uh hotel ah mawtaw tawh hong dawnin, ka zintun nading uh Guest House ah van teng ka koih khit ciangun ka hunzat nading Zion Zomi Baptist Church ah kei hong kha uh a, tua pan Rev. TK Lianpu’ pawlpi ZCF ah Kawlgam pan ka tonpih Rev. Tual Hau Khup in hun va zang thei hi. Hun man ciangin hong dawn leuleu uh a, 2:00PM ah biakpiak hun a kipan New Delhi khuapi sunga Zomi Christian Fellowship (ZCF) (Rev. Khup Za Go’ patkhiat) pawlpi ah ka kikhawm leuleu uh hi. Huntom thugenna ka nei uh hi. Tua pan ZZBC pawlpi ah ka pai leuleu uh a, Siate le upate in holimna le tutpihna biakinn ah hong neihpih uh hi. ZZBC pawlpimi, Pa Do (USA a om ka lawm, Rev. Ngo Suan Thang’ upa) te innkuan in Siate le upate tawh nitak-an a inn uh ah hong nekpih uh hi. Tua pan Sia Khaibawi’ (Tu’n Australia ah tung ta) makaih pawlpi ZCF, Hastsal khangno hun ah khangnote hanthotna ka pia hi.

July 7, 2014 ni-in ka zintunna uh Guest House pan Kawlgam Embassy a ulian, Pa Khual Cin Kam le Nu Hau Man Cing-te kiangah ka kituah leuleu uh hi. Nu Hau le a tanu Nem in Citywalk Shopping Mall ah sun sung hong vakpih uh hi. Nem pen a thagui kipelh manin a khe na-in a bai laitak hi napi’n hong vakpihpih leh damlawh hiau hi. Nitak lamin World Vision a nasem Tg. Daniel Mung (Dr. J.M. Paupu’ tapa upen) kiangah thungetsakin ka hawh uh hi. Khangno, tupna kician a nei khat ahihna ka mu hi. Nitak-an pen Pa Hau le Nu Man-te inn ah hong nesak uh a, Lamka pan Vaimimciim lim mahmah zong na huan uh ahih manin, adang tam sawk man loin Vaimimciim bek mah ciltui kai liangin ka na ne uh hi. Nak lim hi ven! Nitak veng kikhop pen ka zintunna uh ah ka nei uh a, hanthotna ka pia hi.

July 8, 2014 ni-in Nu Hau’ hong piak kiallap pen mohhinkha hi leuleu hi. India ah Kawl-an lim mahmah hong pia uh hi. Pa Lian le Pa Hau in Sia Khup tawh khua sungah hong vakpih kawikawi uh hi. UNESCO in World Heritage sazian sunga a koih uh Red Fort Complex ah ka pai uh hi. Hih mun ah tavuan tawh a na om galkap bawk nih KK Guite tawh ka kimukha uh a, Zomi khat a na om manin noptuam kisa mahmah hi. Tua pan Gandhi-te han le India Gate ah ka pai uh hi. Nisat mahmah laitak ahih manin hong vakpihte ki-aana mahmah hi. Ko adingin a thak bekbek ahih hangin hong vakpihte adingin a muh ngei mun bekbek uh ahih manin nisa sa diak ding uh hi. Nitak ciangin ka zin uh ah veng kikhop na nei leuleu uh a, Rev. Tual Hau Khup in hanthotna pia hi. Nitak kikhopna ah hong pai i mipihte tawh hun tomno sung ahih hangin, kilawmtat theihna hunnuam ngah ka hih manun ka kipak mahmah uh hi.

July 9, 2014 ni-in innteekpa Pa Kam pen sunglam dam lohna tawh zum kah zo lo hi. Pa Kam i dam lohna ko’ hamphatna suak hi. A hang in Ni sa sa lua ka hih manun vak loin, inn ah ka om uh a, Pa Kam, Nu Hau le Nem-te tawh hun nuamtak ka zangkhawm thei uh hi. Pa Kam pen kamtam lo napi’n pau sunsun leh nuihsuah nading gen thei mahmah hi. Nu Hau pen kamsiamin zindo siam mahmah hi. A tanu uh Nem pen laipil mahmah in, kiniamkhiat mahmah hi. Tan 12 pen average 94.7% tawh zo hi. (Kawlgam ah hileh All-D ngah i cihte hi!) College minthang mahmah khat ah luttheihna ngah a, “kei’ hang hi kei, Pasian’ hang hi,” mah ci thei lailai hi. Pa Kam zumkah a pai ma-in innkuan thunget a neih zel uh thupi ka sa hi.

Nitak-an nek khit ciangin Pa Kam le Nu Hau-te’ inn pan Rev. TK Lian in Vanleeng tualpi ah hong kha hi. 11:45PM in Indira Gandhi International Airport pan Kawlgam zuanin ka ciahkik ta uh hi. July 10, 2014 ni 8:45AM in Yangon ka tung uh a, KBZ vanleeng ngah lai ka hih manin Yangon pan Kawlpi le’ng leuleu in, 12:15PM hunin Kawlpi cidamin ka tung hi.

Hamphatna le lungdamna:

– SAIL Seminar ah gam tuamtuam pan Pastor bek hi loin, kivakna tuamtuam a nei makaite tawh kithei kha le tha thak tampi ngah ka hih manin, hampha ka kisa hi. Hih Seminar kah theih nadingin hong sam bek hi loin, hawh nading, om nading, le hunzat kikhop nading dong ah hong vaihawmsak Rev. Dr. J.M. Ngul Khan Pau le a innkuanpihte tungah ka lungdam mahmah hi.
– Kawlgam Embassy zuma ulian Pa Khual Cin Kam-te’ inn ah ni 3 sung nuamtakin zintun bek hi loin, kimeltheihna ka ngahkhak manin hampha ka kisa mahmah hi.
– Vanleeng sap, visa man le Seminar sung a kisam bangbang Development Associates International (DAI) in hong vaihawmsak ahih manin ka nuam mahmah hi.
– Vanleeng letmat lei nadingin $900 kiim hong zangsak Rev. Dr. Go Chin Zam (OM) tungah ka lungdam mahmah hi.
– Nipi Nibup a hun hong pia a, kikhopnate ah hong kha kawikawi, giak nading zong hong vaihawmsak, Laibu hoih mahmah bu nih hong pia, le ka ciah ciangun vanleeng tualpi dong hong kha Rev. TK Lian tungah genzawhloh lungdamna om hi.
– Bek tham loin, ka kikhopna uh ZCF pawlpite le ZZBC tungah;
– A mawtaw tawh khua sung a hong vakpih Pa Lian, Pa Hau-te tungah;
– An hong nekpih Pa Do le Pa Hau-te innkuan tungah lungdamna lian mahmah hi.
– New Delhi ah mi le mawtaw tam ka sa hi. Mawtawte pai muaimuai uh ahih manin a kisukha, a kinawkkha tam mahmah hi. Tua hangin New Delhi ah mawtaw virgin (a kinawkkha lo) om lo hi, ci liang uh hi.
– New Delhi pen a khuahunin cile’ng a sat teh sa mahmah a, a vot ciang zong a vot mahmahna khua hi. Banghangin India in New Delhi pen khuapi dingin teel ai tam, ka cihleh khat in, “New Delhi pen a neituam minam om lo ahih man hi ding hi,” ci’n hong dawng kik hi.