ZIUSA pan Dr. Do Khan Khup tawh ki muhkhopna kinei
Malaysia Zomi te van dingin hong zin Zomi Innkuan-USA (ZIUSA) Executive Director Dr. Do Khan Khup tawh kimuh khopna 16 August 2018 sun 1:30PM pan 5:30PM sungteng in kinei thei hi. Hih hun sungah Pawlpi siate, Khuamakai te leh a lunglut mimal pawl khat hong kihel thei uh a, dotna leh dawnna tampi kinei thei hi.
17 August 2018 ni in zong UNHCR zumpi ah Dr. Do Khan Khup leh UNHCR Representative Richard Towle te kimuh khopna nai 2 val sung nei thei uh a, Malaysia Zomi te ih lunggulhna ahi (1) 31 December 2019 ciangin Chin State pan hong tai te UNHCR pan in vaipuak lak nawn loh ding vai ah ngaihsut phatna hong neihsak nang leh a hun hong khin toh sak nang cih a kipan mipih te lunggulhna te va pulak khia thei hi.Tua tawh kizui in mailam ah kalsuan zia ding leh sep khop theih ding thu pawl khat kikum khawm thei lai uhhi.
Malaysia Zomi te van dingin hong pai kawmin Malaysia om galtai te vai tawh kisai kikup khopna khat ahi Chin Consulting Meeting ah zong 13-15 August 2018 sung va kihel thei in Chin State sung pan hong pai galtai te vai in bang cih leh hoih dinga, bang ci kalsuan ding cih te a kipan thu tampi kikum khawm thei hi.
MAPANG KHAWM NI ZOMI KHUADO 2018
Zomi Khuado pawi bawl ding tawh kisai in 08 August 2018 (Wednesday) ni-in ZAM zum ah thudotpi te tawh kikup khopna kinei in, Zomi Ngeina Khuado Pawi limtak bawl dingin thukimna kinei hi. A mun dingin Zomite Khuado Hall, Chin Woo Stadium mah ki kipsak hi. Khuado pawi nasiatak a bawlna dingin sum leh pai tampi hong kisam ahih manin muanna leh lametna lianpi tawh Khuado Committee in anuai a bangin mapang khawm dingin kong zawn uh hi. 1. Khua kipawlna pan RM200 pan a tungsiah, 2. Biakna pawlpi khat ciang RM300 pan a tungsiah leh 3. Khua kipawlna leh Pawlpi panbek hilo in, mimal in zong ma ih pan khop na dingin kong ngen uh hi. Khuado ni dingin 15 October 2018 (Monday) ni dingin kikip sak hi.
Zomi te kumkhen Khuado pawi ah Malaysia leitang tung a om Zomite khempeuh khatzong pelemlo a, ih kihel kim theih nading deihna tawh kong theikhol sak uh hi. Tuasung ah Zomite maban ding thugenna, Zomi Idol Malaysia 2018, Laam tuamtuam, lasaknate a kipan kivakna/talent show tuamtuam zong om ding a hihmanin khuahun sia leh thusia tuamtuam te tawh kipelh nadingin thungen ciatni.
Zomi Khuado pawipi muakna in ih neihngei sa mah bangin in Zomi League kimawlna zong om ding hi. By: Khuado Committee 2018
ZOMI IDOL : Kumsim ih neih ngei sa om mah bangin Zomi Idol zong tukim kinei ding a, hih Zomi Idol tawh kisai in hong makaih sak dingin Rev. Thawng Khan Sut – 016 6443 011 Rev. Gin Khan En – 017 3342 760 te muanna tak tawh kiseh hi.
ZOMI LEAGUE : Ih bawl ngei a om mah bangin Zomi League 2018 zong nopci tak in kibawl ding hi. Hih Zomi League ah hong makaih sak dingin
- (1) Sia Pau Sian Piang – 016 3185 296
- (2) Sia Thomas Piang – 018 3566 881
- (3) Sia Gin Go Mang – 018 2021 216
- (4) Sia Kam Sian Mung – 018 3122 957
Zomi League tawh kisai min sazian pia nuamte in kipia thei ta a, a tunga siate kiang ah kipia thei ding hi. Dot nop tuamtuam te zong kidong thei ding hi.
UN CARD RENEW TAWH KISAI
August kha ni khat ni pan kipan in UNHCR zum ah Card renew (Tettan tuu) na pai ciangin ih gengen sa om mah bangin teelna nam (2) sung pan khat hong telsak ding uhhi.
Teelna (1) Hih na teel leh 31 December 2019 dong na card hong renew sak dinga, ahi zongin 31 December 2019 pan kipan in UNHCR te mi kahinawnkei ding hi cih lungkimna suaikaih (Signature) hong hih sak ding uhhi. Kum khat leh kha 5 sung khawng UNHCR misuak lai ding cih na ahihi.
Teelna (2) Hih na teel leh appointment laidal hong pia pah ding uh a, tua zui in interview phi kik kul ding ahihi. Kawlgam ciah kik theih lohna, galtai hih na cih te amau thukhun a huam dingin ih phi theih ding kisam ding a, tua dan ih phi theih leh UNHCR card hong pia kik in gam 3 na lam kizom thei ding hi. Ahi zongin UNHCR card ih ngah cil hun lai ih interview tawh hong kibang khollo ding a, ei lam pan thu leh la tampi tak kician takin ih gelkholh ding thupi ding hi. Amau thukhun sungah ih lut zawh kei leh hehpih ngetna lai khat vei ki at thei lai ding a, tua ah zong ih lut zawh tuan kei leh UNHCR tawh kisai nawnlo kihi pah ding hi.
Ahi zongin hih sungah Pipe Line sung a tungsa te kihel lo ding hi. Zomi pih akua ma ciatin ih mailam ding hoih tak ngaihsun kawmsa in ei mahmah lungkim takin ih khentatna lampi mah ih zuih ding hong thupi ding hi. Midang khat khentatna tawh ih kalsuan ciangin kimawh sakna leh ki khasiatna tam thei ahih manin ei ma khentatna mah tawh kalsuan ding ih ki hanthawn hi.
ZAM FREE CARD KINGAH TA
ZAM in kumsim a manngenloin ih bawl zel mah bangin Malaysia Zomi khua kipawlna makaipite leh pawlpi kem Pastor te ading ZAM card free in kibawl sak ding hi. Tua ahih manin Khua kipawlna makaite leh pawlpi kem siate in August 1st-31st sungteng nisim 9:00am-6:00pm kikal hunngahni khat peuhah ZAM Free Card nong bawl nading un ZAM zum pan zahtakna lianpitawh kong zasak uhhi. A thei kha nailo a om leh MZCA, ZCMC leh kipawlna tuamtuam te pan nahilh sawnsak un.
UNHCR CARD NEI TE KUMPI ZATO PAN 50% KIPIA KIK TA DING
August 10 ni a kipan in UNHCR card leh laidal tawite khempuh 50% kikhiam kik ta ding hi ci in CLU te in hong zasak uhhi. Ahi zongin UNHCR appointment laidal tawi in tua hamphatna ngah theilo ding uhhi.
TENAGANITA LEH ASYLUM ACCESS TE TAWH KI MUH KHOPNA KINEI THEI
Malaysia gam sung ah Gambel mite tawh hong ding khawm den ahi Tenaganita leh Asylum Access te tawh kimuh khopna kinei thei hi. Ei gambel mite a dingin a diakdiak in hong panpih thei na te pen “ih nasepna pan in ei lam pan hoih tak leh citak tak nasem napi in ih boss te in hong zawh thawh bawlna, hong nianniamna, hong bawlsiatna, kamtawh mimal simmawh manin ko ngawp na cih te ih thuak khak leh kiko thei ding hi. Tua ban ah nasepna hangin liamna khat peuh ngah napi in boss te in hong thupi simlo in donlo in koih cipna tawh ki sai te zong kiko thei hi. Hidan ih thuak khakna a om leh amau lam pan lawyer te tawh kikum khawmin kivai hawm khawm thei ding hi.
MyRC CARD
MyRC card abawl nuamte in ZAM zum ah min sazian kipia khol thei lai hi. A bawl nuamte in a manlang thei in sazian piak kholh ding kisam a, ZAM card a tettan om lai te bek kibawl thei ding ahihmanin ZAM card te zong hoih tak ih et phat ding kisam hi. A sawtloin sazian ki-ap ta ding ahihmanin abawl nuam/alunglut te in a man lang in ZAM zum ah sazian hong pia-in na card te uh nong sit phat nading uh zong kong zasak uhhi.
MyRC CARD KINGAH TA
ZAM zum pan in MyRC card a bawl masa te in a card uh ngah ta uhhi. A zomzom in card te hong kipia ta ding a, ZAM pan in phone hong kiho kik ding hi.
UNHCR PAN APPEAL AT DING TAWH KISAI THEIH SAKNA
UNHCR pan in interview na man khit ciang appeal letter at ding hong piak leh at hamtang ding hoih zaw hi. Ih vai khat peuh pen a tawp dong mah ih zuih tang suakna in citakna khat zong hi a, mailam hun ah bang ci ding cih kigen theilo ahihmanin lungkia pah loin at tangtang in puak hamtang ni. Mi tampitakin at hang kilamdang tuan kei cih tawh at nawnloin kilak kik na om nawnlo uha, tua sangin ih at hamtang mah hoih zaw hi. At dan ding a tello leh a thei lote in ZAM zum ah hong pai un.
ZEC MAHARAJALELA SANG NUAPANG TE LEH PU DR. DO KHAN KHUP HOLIMNA NEI
Zomi Education Center (Maharajalela) sangnau pang te leh Zomi Innkuan USA (ZIUSA) Executive Director Pu Dr. Do Khan Khup te in 17 August 2018 (Friday 3:00PM pan 4:00PM sungin kiholim na nei uh a, Pu Dr. Do Khan Khup in sangnaupang te in vision kician neih huai thu, ih kalsuanna ah vei leh tak ah hawi loin tangtak in ih ngimna mun ih tun dong lungkia loin kalsuan ding cih te a kipan thapiak na hong nei a, sang naupangte lam pan in zong theihnop leh telnop thu tuamtuam te dotna hong nei uh hi. Sang naupang te dotna te Pu Dr. Do Khan Khup in hong dawn kik ciatciat hi.
UNHCR ZUM AH INTERVIEW NA PAI CIANG
UNHCR zum ah interview na pai ding ciangin kigingnaomlo pi in pai kei in. Interview ah khat vei nagen thute hoihtak in kiciamteh ahih manin kilaih kik nemnuam thei nawnlo hi. Adiakdiakin UNHCR vai hunhoih nawnloh kawmkal ah interview hong kisap leh hoihtak in kinbawl in thupi ngaihsut in. Nang ading atawpna zong hi thei ahih manin in kiging khol hamtang in. Khat vei ih kiciat lohna hangin mailam tampi kikhak suak thei hi. Tua bek thamloin mikhat leh nih thugenna tungtawngin minam ai bup a ding sup lawhna zong piang thei ahih lam phawk gige ni. Tua ahih manin zum ah interview ding nalut ma-in nathute hoihtak kiging khol inla na kiging dan ding natheih kei leh ZAM zum ah hong pai in.
Innkuan kigawmna tawh kisai
(i) A Zi/a Pasal USA tungkhin in Malaysia a om Innkuanpih a Zi/pasal leh a tate asam nuam tepen Malaysia UNHCR in nidang in Card piaksak himah taleh tu-in tua bang innkuan pihte ki piaksak nawnlo ding ahih man’in kawlgam pan in samleh uh lemzaw dinghi.
(ii) USA te in kiteenna/Nupa tawh kisai policy thak tukum March kha-in abawl na uhtawh kizui-in Nupa ahih leh legal married certificate/kumpi zumpi pan’n nupa hihna laidalpi aneite bek nupa in ciamteh uh-aa tualo biakinn pan/Ngeina tawh kiteenna cihte pen Nupa in sanglo uh hi.
ZATO LAM TAWH KISAI : Zato lam tawh kisai in vai khat peuhpeuh na neih leh Contact :Sia Mungpi 018 3122 957
THONG LAM BUAIPIH TE
- 1. Thang Thawn Piang (Kapteel) Kajang thong ah
- 2. Cin Khen Thang Kajang thong ah
BELANTIK CAMP AH KI HAWH KIK DING
Belantik Camp ah ki hawh kik ding a, 19-08-2018 (Sunday) zan 12 in KL pan ki ding khia ding hi. Meltheih tanaute om in hong zui nuam ih om leh hong zasak un. Contact : 018 202 1216
KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kibaih sa in om den ding uh hi. Sia Tuang Pu : 016 254 4093, Sia Go Mang : 018 202 1216
ZOMI TE ADING NASEP :
Subang ah Factory Store general Worker pasal citak 3 ki nawh deih hi. Omna pia-An pialo. Nasep hun-Monday to Friday 8:00am to 7:00pm/Saturday 8am to 5pm Nai khat sung khawlhun. Off day- Every Sunday Khasum-Rm1400. Pau – English or Malay Na sep hahkat te khasum khan toto.
Uptown Puchong Nigh Bazaar ah na semding pasal 2 ki nawhdeih hi. Nasep hun-Nai 10 sung. Khasum-Basic Rm1200 tawh kipanding. Omna pia- Anvak. Offday-kal1 khatvei off. Amun-Puchung
Zomi nasep neilo te in nasep tawh kisai dotnop na neiuh leh :Sia Khuppi—016 3838 014, 011 3563 2059
LUNGDAM KOHNA
ZAM zum leh nasepna te adingin mapan khopna hong pia te tungah lungdamna lianpi kong pulak khia uh hi. Zomi te itna veina taktawh ih zumpi a dingin hibangin mapang khawm in nong dinpih na te hang mah uh tawh tuni ciangdong a kikalsuan toto zo ahihi. Mailam ah zong a piakhia zo semsem dingin TOPA’N thupha hong pia henla, a zahtampi in hong thukik tahen. 1. Buanli Khua Kipawlna RM100
Comment piaknop aomleh...