Nasep nading mawtaw hongpia ~ Sia Do Khup

Nasep nading mawtaw hongpia ~ Sia Do Khup

Nasepna ah khuapi khuata i et zawh nadingin U Hau Pau leh ka Pu Sang (Zomi Sang Ngaihte) amau gel in hong hanciampihna mawtaw thak tu zingsangin inn phualzang hong tungta hi. U Hau Pau in mawtaw ading tengh 100 hong pia a, ka Pu Sang in tengh 85 hong pia hi. Amau tegel tungah lungdamna lianpi i ko hi.

U Hau Pau in tu a bek hiloin Japan a om lai-in zong Japan sum 200,000 hong pia ngei a, tulaitak innmun man tawh tuat leng Tengh 1000 bang hong pia himawk hi. I mawtaw gol pen zong ama hong leisak mah hi a, mencim tuikhang dongtuah hun leh tutung Covid 19 dongtuah hunah kizang ahih manin cimawh huhna-in nihvei tak kizang ta ahi hi.

Tua banah ka lawmnu ading a tuamin India cycle khat leisak lailai hi. Hih bangin a nau inntuan khat bangin hong en ngiat U Hau Pau tungah Zomi bup hong theihpih dingin lungdamna ka ko hi. Hih zah a thukhual U Pau pen Pu SB En Za Langh leh Pi Niang Go Cingte’ tapa ahi hi.

Ka Nu ngai mahmah ka hih manin ka pu Ngaihte-te khempeuh in zong hong it ciat uh hi. Ka Pu Sang tawh mawtaw lei ding vai ka holim uh a, “Hihbang a Zomite a it tupa Sia Do Khup kong neih khak uh ka lungdam lua” ci-in hong nehno a, ka putu-un ka kikah kha uh hi. Lungdamna khitui ahi hi.

Zomite phattuam nading ahih nak leh a itsik ngeilo ka pu sang-te innkuan tungah lungdamna lianpi i ko hi. Amau Tuithang khuami hi uh a, Pu Gin Za Pau (Ngaihte) leh Pi Dim Sian Lunte’ tapa ahi hi. Piakkhiat nading lamsang ah a pasal a hanthawn den ka Pi Man Ngaih Lun tawh Topa thupha Tg. Zomi Khual, Lia Lun Sian Sung, Tg. Mung Khup Lian-te nei uh a, South Dakota, USA ah teng uh hi.

Mawtaw vai hita leh oxygen vai hita leh hong buaipih den ka Pu Rev. Thang Kim tung leh Yangon pan Kawlpi dong thaman la loin hong hawl tohsak Khuppi leh Tuang tungah lungdamna lianpi i ko hi.

MAWTAW VAIKUAN PAH HI.

Zomite lasa siam pen Zogam lapu T S Khai pianna khua Pimpih ah zong positive 45 bang om khin ahih manin tuni-in Nurse-te a delh dingin kisawl hi. Zatui zaha va hawm ding uh hi.

Topa min tawh nong piakkhiat uh sum leh paaite tawh zatui zaha, antang, besan, sathau, oxygen cihte kilei den hi. U Hau Pau leh Pu Sang hong piak mawtaw zong inn ah zan khat bek giakin tu zingin vaikuan pah hi. Zat ding a hong kipia ahih mah bangin kizang toto lai ding hi.

Kei zong positive ka hih manin a gamla pek panin thungetna ka neihsak hi. Thungetna ah hong phawk ciat un, ngap lopipi a nasep pen nuam het kei ei lawmte. Sia Do Khup