Nangbek kisa khaken (2) ~ Dong Mung

Nangbek kisa khaken (2) ~ Dong Mung

Na it pen, na ngaih pen in hong paisan hun ciang lungleng khuangai mahmah kawmin ‘Aw zawzen… leitungah lungzuan ngaihtam sial dinga mim bang piang sese ka hiam. Aw kei aw.. kamsia lawmlawm sing e.. maw..’ ci-in nang bek a thuak bangin na khitui a luang ziahziah kha hiam?

• Nang bek hikei cei…
• Nang dan mah in
• A pa sihsan
• A nu sihsan
• A u sihsan
• A nau sihsan
• A ni sihsan
• A gang sihsan
• A lawmngaihpa khen
• A lawmngaihnu khen
• A it penpente paisanna a thuak mi tampi om hi.

Nang pen a patna hilo, nang mai ah Adam khang akipan tuadan a omden hilel hi. Tua ahih manin thuaksiam inla, nang bek kisa kha ken…

Nang hihtheih tawpin hanciam maimawt napi ci’n na lametna bangin lawhcinna, gualzawhna na ngahloh ciang lungkia in thanem lua na hiam?

Lungkia le thanem zenzen ken. Nang ma in zong mi lawhcing sate’n a na tuah ngeingei thute mah hi.

America President hoihpen akigen Abraham Lincoln in 10vei val guallelhna na tuak ngei hi. A guallelh ngiingeii khit ciang gualzawhna hong ngah hi.

Alibaba company neipa le makaipa banah leitunga mihau pente laka kihel Jack Ma in 20 vei val guallelhna ahihkeh lawhsapna na tuak ngei hi.

Tua ahih manin lawhsapna, guallelhna na tuah ciangin a masa pen kisa kha ken.. nang mai ah mi tampi’n na thuak, na tuak khin uh hi.

Na siamtawp, na hanciam theih tawpin hanciam kalsuan napi ci’n, mite’n hong nawlkhin, hong pampaih hun ciang khasia lua in thanem kha na hiam? Thanem zenzem ken…. Nang ma in zong mi tampite’n a tuah a thuak ngei thute hi. Topa Zeisu nangawn mite’n nawlkhin in langpan uh hi…

Tampi gen nawn kei ni… Leitung tomkal na nuntakna sungah haksatna, lungkhamna, dahna, lungkiatna nang tungah hong tun khak ciangin nang bek a tuak kha, nang bek a thuak kha, nang bek a phu kha danin kingaihsun loin kei tuah ma, kei thuak ma, kei phut khak ma in zong mite’n a na tuah, a na thuak, a na phut khak thute aive maw, ci inla, na mailam nuntak nadingin hangsan takin kalsuan lel in…

A sia ah/ na lawhsap guallelhna ah nang bek na hiloh mah bangin, a pha/ lawhcin gualzawhna ah zong nang bek na hi kei dinga, na hanciamna tawh kituakin nang tawh hong pangkhawm ding mi om veve hi.

Tua ahih manin KEI BEK cih ngaihsutna paikhia inla Mainawt in… Lawhcinna le gualzawhna in na mai ah nang hong ngak hi… Lungdam, Dong Mung