Namsia Vaina Thu ~ Mungpi Khupson

Zankim nai nih leh alang pawl ahi a, hong kipankik khiankhian uh hi. Ka phei hong su masa uh a, tuaciang ka tan, ka gil… ka thuak keeikaai phot hi. Tawmsan vei nawnlo a’ih teh tuzan peuhmah pen na lianpi khat ka sep kisam hi cih ka tel mahmah hi. Ka ngawng hong sukkhak tak ciang bel.. ‘huat kenla $ 1 million ong pia ning’ ong kici phial zong kisaangzo deksuai lo ding hiven!!! palikten gutate thakhat a bawhhuan vat mah bangun thokhia vatin mei ka taangsak pempam a, ka zanpuan ka lem leh kalai!! “Na thei vo lawmte… keima sisan note tatna dingin phal peuhmah keng” ci kawmkawm ka mekkham pah ngiatngiat hi. Ka lukham kawm, ka delhphah kawmteng ka vel khit dikdek teh 20 val mahmah phalo dia. Sisan tawh a gimnam tawh tuahpha ngel ing ei tuzan pawh!! Hih namsia a kici 20 val euaute pen zansimin ka sisan tawh kivak ana sawm den danuh hi tazen veh aw, nak hehhuai hiven!!

Sun lam na kisem ahih manin zan lup theihloh pen supna lianpi khat suak hi. Mang nuamtak man a I lup hithiat laitak, hong eng khat beng keek a, hong subuai den keei cihmawk pen, ka cimtak zawh sawtzo hi! Khatvei Shopping mall ah namsia za (Bed Bugs spray) ka zon leh muzo mahmah lo ka hih manin, innlawi za (cockroaches spray) lei in sualvang, baangvang leh ka muanmawhna innsung kawmlakteng ka kap ngingei leh a nampen hi vet lo… motaw za nuhna munpi mah bang keei mai hiven!! Zan nih zan thum khong bel hong phadawm pah sam. A hoih suak ding kasak leh na tuaci vetlo.

Tualeh hihdan(method) tuam khat tawh ka vaat leh hong phadawm pah lian hi. Tua method pen banghiam cih leh… Samkhawm phot ding, kipetsak masa vetse ding..sawt na thuak zawh leh success percentage phasemsem ding cihna! tualeh.. vitsa na zanpuan lemvat ding, meitaangsak pah ding.. tuatak ciang:

1st step: A kimu masasa ban zialsuk mengmeng ding.
2nd step: Na kukham vel dikdek ding, a siik kawmlaka bu khinkhiante meek kham pah zangzang ding.
3rd step: Na delhphah tuamna(bed cover) damtak lem ding..atung anuai limtak veel ding, namsia nekcikcikte na khaksuah kha deh!

4th step: Na delhphah(mattress) pumveel ding, buksiam mahmah uh cih thei in la limphatak veel in, a tuii khong zong om thei lai hi ei..na siansuah khit ciang na khut sappiang tawh sawpsiang inla, lungnuam tak na ihmu kik thei ding hi.

5th step: Na ihkhun gei a puan, suitcase, laibu leh kawmlakteng khempeuh zing na thawh ciang veel dikdek in la, na muh batloh kawmlak pen namsia za na neih kei leh zong thoza/innlawiza tawh kap ziau in. Na kap main nek theih dawn theihte hem phot in maw, cidamna dingin hoihlo hi, ahih theih leh inn na paikhiatsan ding ciang kap lecin na ciahkik teh a gimnam nawnlo ding aiveh. Warning! Na zanpuan, delhphah leh puante tua za-te tawh kap(spray) peuhmah ken, misiamten ci aimaw!

Hih bangin zan nih zan thum hih peuh lecin na room sungah vampire oh! Namsia om nawnlo kha ding hi! Hih pen kei’ muhkhiat ngiat 🙂 ahih manin hong hawmsawn hing!!!!

• Namsia tawh kisai a sin, a kaanten bangci na gen uh hiam en peuhmah dih ni:
• Namsia pi khat in tuii 300 val nei thei hi. Ni 10 sungin a tuii keuh kici lai ei!
• Namsia pen an(sisan) lo tawh kum khat(kum 1 val nungta thei zong om) sung nungta zo hi.
• Namsia pen sun khuavak sungteng bucip uh a, zankim gamdaih laitak ong pusuak uh hi.
• Suitcase sung, puansilh niikteen tung, motaw tung, thungkuah sungah sawtpi nungta zo uh ahih manin kipua kawikawi, kilawh kawikawi thei hi.(Malay pana ‘R’ tawh US tungsuk pawlkhat ana pua kawikawi zong om hih tuak :D)

Namsia picing pen 16 *C(61 *F) sanga vawtzaw ah zong si loin sawtveipi sung ihmucip thei uh hi. -10 *C(14*F) nangawnah ni 5 sung nungtazo kici sawnsawn!

A lungdamhuai khat pen Namsia in mihing natna lungno tuamtuam 28 ngah thei napi, tua natnate pen midangte tungah lawhlo kici hi.

Ganhing tuamtuam ui, zawhngeu, vasa, akte tungah tuii thei mawk uh hi.

Za tuamtuam pyrethroids, dichlorvos, malathion cihte tawh kithat thei a, ahih hangin cidamna dingin hoih khollo ahih manin ciinhuai khollo hi. Carbamate za kici propoxur bang pen Namsia in lel mahmah napi Evironmental Protection Agency(EPA) in zat dingin approved nuamvetlo kici hi, naupangte adingin lauhuai mahmah hi.

Phiatna dingin Vacuum cleaner leh zanpuanteng tuisa tawh sawp kiphat mahmah hi.

Namsia pen Gam khangto Europe leh America-te ah 1930-1980 kikal cimang zah dongin kiam mah leh 1980 khit ciang nakpitakin pungkik kici hi. Hih pen khuazinmiten a lawh kawikawi hi dingin kiummawh hi!

Khatvei nasem ding limtak kithawi ka paikhiat leh lawmte khat in ka puantungpan namsia khat hong lakkhiatsak hiau… Customer te’n muman leh bel nuamkhollo ding hi cih bel!!

Mungpi Khupson