Nainganzi (politic) ih cih in banghiam? leh Kawlgam nainganzi (politic)

Nainganzi (politic) ih cih in banghiam? leh Kawlgam nainganzi (politic)

Nainganzi (politic) ih cih in bang hiam? Ei Zokam in gen leng gamthu, leitung thu cih na hi. gam thu leitung thu cih adaudau sang in Nainganzi (politic) cih kammal zang zaw ni. Nainganzi pen Pasian thu, kha (spirit) lam thu hi lo hi. Nainganzi ih cih pen ki uk na tawh kisai pilna, theih na, ki uk na tawh kisai lampi, ki uk na ding tawh kisai gelna cih te ahihi. Genteh na in ah,: Thukhat koi ki khensat ding ( mi atamzaw, atawm zaw, ih vekpi) thukim na tawh khentat ding maw cih ahi zong, khua khat in guu tawh nga man lo ding cih thukhun abawl uh pen mipi za ah 60% in thukim na aneih man in ki kipsa hi cih te pen nainganzi (politic) ki ci hi.

Nainganzi (politic) pen leitung mihing nunsung ah thu man thu dik alakkhia, kha lam hi lo, Pasian thu lam hi lo, leitung ci leh sa ih nuntak na ah thu man thu tak tawh kal suan theih na ding zat loh apha mawh thu khat ahihi. Tua hih man in mi khempeuh tawh kisai hi ci aa Pi Aungsansuhkyi in zong nainganzi pen mi khempeuh tawh kisai hi a na cih na zong hih hang ahihi. Leitung pai, tak sa pai ih cihcih zong pen nainganzi pai apai cih na khat hi. Innkuan sung ah nupa kitot ih cih zong, bang hang ki tawng hiam? Sianggen leng pen Nupa ki tawng ih cih pen tungnun kituh ih hihi. Thu nei nuam ki tuh man hi aa, kei thu bek cih pan hongkipan hi ci leng tam ki khial kha lo mai thei hi. Uk na, thu ngeih na, aana (power) pen nainganzi (politic) ahihi.

Tulai tak Kawlgam nainganzi(politic) dinmun, pai zia ih tel na ding in Kawlgam tangthu ih sut hongkul denhi. Banghanghiam cih leh Kawlgam pen pyine (state) tuamtuam kigawm khawm (union) gam khat ahih hang in gamkhat ( state) khat dan in ki pai ahih man ahihi. Banghang in Kawlgam pen hih zah in ki zawngmawk ai hiam? A sung aa ateng te mawlthei lua maw, hai thei lua maw, ahih kei leh mimal ateng tawm lua ai hiam? Hi buanglo e. 1885 kum in Mangkang te in kawlgam hong uk uh aa, khamtung gam ih om na Zogam (Chin state) pen 1889 kum pan in hong uk zo pan bek hi. Mangkang te Kawlgam hong uk kipat 1885 kum masiah hunsung khempeuh pen ei leh ei, ih gam tek ah ukpi, hausa, Sawbua te bek ii uk na nuai ah ki om tek hi. Ei uk pi leh ei Hausa tek bek khut nuai ah ki om aa midang (kawl, vai, mang) te uk na nuai ah ki om lo hi.

1885 kum pan in 1947 kumciang Mangkang gam keek te leh Japan gam keek te khutnuai ah ki om hi. Hih mangkang te honguk na pen ahoih lam in genni ci leng mangkang te in hong uk tak uh teh leitung thu bek hi lo, anung ta Pasian thu hong hilh (missionary) hong sem kawm pah uh ahih man un ei mualtung mi ahi Zomi te akipan, Kachin, Karen, Kaza(Karenni) ect… te in a nungta Pasian thu kizak lawh, ki theih lawh pah hi.

Mangkang kumpi in Kawlgam hong uk tak teh mualtung mi ten pen Pasian thu kitheih lawh, nuntaak khuasak dan ih khantoh lawh hang in Kawlten thuak lah cihtak in thuaklah phadiak uh hi. Banghang in thuaklah pha diak uh hiam cih leh a biakna (Bodah)leh a Lai uh (Kawllai) pen ki zangthei nawnlo ahih man in, tua abiak na uh leh a lai, apau aman than ding alauh man uh ahihi. Tua ahih man in Kawl mipil te leh makai te in a biak na uh, a lai uh, a pau uh akhantoh na ding ahih nak leh sep nop loh bangmah nei lo uhhi. Tua hang in Kawl ten Mikang kumpi tungpan suahtak na deih in Burma Independent Army(BIA)cih galkap kipawl na khat pen Thailand, Bangkok khuapi ah 1941kum, December(27)ni in Bochoh Aungsan makaih na tawh hongphuan khia uhhi. 1942 kum teh BIA pen Burma Defense Army (BDA) cih tawh amin laih uhhi.

Tuabang dan in kawl ten amau suahtak na angah na ding in hi dan in Galkap phuan in pan alak laitak hun mah in, mualtung mi ahi Zomi(Chin ), Kachin, Shan akipan atuamtuam in zong amau Ukpi, Sawbua, Hausa tek tawh na ki uk uhhi. Cih nop na ah hih kawlten a phot uh galkap te’n ei mualtung mite hong uk kha lo, ei tawh kisai nai lo hi. Hun hong ki vei toto in Mangkang ten amau uk gamkhempeuh pen amau leh amau aki ukzo te suahtak na pia ding cih thu hong om teh Bo Aungsan in zong London ah vapai in kawlgam suah tak na hongpia in ci in va ngen hi. Tua hunlaitak kawlgam(Burma) cih mangten hong ciapteh na ah tu laitak aa mualtung minam Kachin, Kaza, Kazian, Chin, Mon, Bama, Zakhai, Shan teng ki hel hi hang.

Tua ahih man in Londan ah Bo Aungsan in tua dan aa ava nget ziau teh Shan ten ko theih pih kei ungh, mualtung mi te palai (kusale) hi kei, amau kawl teng bek ii ngaihsut na hi ci in siikkhau na sat pah hi. Tua bang aa Shan te lungkim lo in siitkhau sat na hang in mangkang ten zong Bo Aungsan kiang ah va ciah kik in la mualtung mi no kawl (Bama) ahi lo teng tawh thukim na khat va bawl phot in, tua khit teh hongpai kik in ci in vaikhak pia in, Bo Aungsan zong Kawlgam hongciah kik hi. Bo Aungsan Kawlgam hongtun kik ciang in 1947kum, Feb (12) ni in mualtung mi palai (kosale) mimal(22) tawh Penlong thukim na(agreement) na bawl thei uhhi. Tua Penlong thukim na abawl palai(kusale) sung ah ei Zogam (Chin state)pan in Pu Thawng Za Khup (Tedim), Pu Rua Mung (Falam), Pu Kuai Man (Hakha) hih mi (3) teng na ki hel thei hi.

Tua Penlong thukim nasung ah mualtung mi te pen kawl(Bama) tawh akipawl nop kei uh leh suahtak na ngahzawh kum(10)khit teh inntuan thei(gam khat aa ding) cih ahi zong, mualtung mi khempeuh liangko kikim ding Shan in pek khat angah leh Kawl (Bama) ten zong pek khat ngah ding ci’n thukim na sungah ki hel hi. Mualtung mi palai (Kosale) ten Bo Aungsan na muang mahmah uh ahih man un, Penlong thukim na(agreement) a bawlthei uh hi aa tua thukim na abawl zawh uh 1947Kum, July(19) ni in Bo Aungsan aha zaa U Saw leh a pawl te’n Bo Aungsan anasem te tawh gamvai aki kup lai tak un na kap lum uhhi. Tu ni ciang Kawlgam salpha( Aa Za Ni, အာဇာနည်) te zahtak piak na sanginn te ah aki zat den na hang ahihi. Penglong thukim bulphuh in thukhun (constitution) pen U Chianthun in hong gelh hi.

Tua thukhun (constitution ) hong gelh khit ciang Mangkang ten 1948kum, Jan(4) ni in Kawlgam suahtak na hong pia hi. A hih hang in tua U Chianthun ii gelh thukhun pen mualtung mi ten Penlong thukim na tawh ki pelh sa lua uh ahih man in mualtung mi lak ah Kazin ten kawlkumpi lak ah 1949 kum in langpan na hong kipan uhhi. Tua bang in hun hongpai toto in atom in ci leng 1948 kum pan 1962kum hun sung pen Parliament Democracy sanit tawh kawlgam ki makaih hi. 1962 Kum pan 2010ciang Galkap uk na sung ah ki om hi. 2010Kum pan in tu ni ciang Party Sung Demrocracy (ပါတီစုံဒီမိုကရေစီစနစ်) tawh akimakaih lai tak ahihi.

1974 kum in U Newin makaih na tawh thukhun(constitution) khat hong bawl khia leuleu in tua thukhun (constitution) in 1948 kum aa akibawl thukhun(constitution) masa pen ahi U Chianthun ii gelh hong phiat khia(beisak) hi. Tua thukhun tawh kizui in Kawlgam bup biakna pen Bodah(milim biakna) hi ding, gam bup ah akizang ding kampau pen kawlpau hi ding cih khawng ahi zong, tai (တိုင်း) leh Pyine (ပြည်နယ်) cih te hong khen in hong uk hi. 1974 kum thukhun (Constitution) aki bawl ma in Zogam (Chin state) pen Pyine (ပြည်နယ်) hi nai lo in Huihtitahtai (၀ိသေသတိုင်း) cih bek tawh kiciam teh hi. Tua ahih man in 1948 kum lai aa Bama (ဗမာ) gam khat pen 1974 kum ciang gam (7)suah uh cih na ahihi. Shan ten pek khat angah leh Kawl ten zong pek khat cih pen, tun Shan ten pek khat angah leh kawl ten pek (7) ngah ding cih na ai ve.

1974 kum pan in (Mahsahlah) ih cih Myanma Socialist Lansen Party tawh hong makaih in, Kawlgam bup ah hih party khat bek ding thei hi. Party dang kuamah phuat khuan kipia lo hi. Hih party khat nuai ah ki om in hun hongpai tohtoh teh mipi in thuak lah kisa in 1988 kum ciang sangnaupang te akipan kumpi nasem te dong in lungpho na hong nei ziahziah uhhi. Gamsung hong buai tak ciang in galkap ten thuneihna hong la leuleu in 1974 kum aa akigelh ahi ( Mahsahlah) hunsung aa azang thukhun(constitution)zong hong phian(pai khia) leuleu uhhi. Hi bang aa lungpho na mipi in hong neih uh ciang in Masahlah party hong puuk in 1990 kum party sung (ပါတီစုံ) kitel na hongbawl uh hi. NLD zong 1988kum lungpho na huhau hang aa hongpiang khia party lian khat ahihi.

1990 kum party sung (ပါတီစုံ) kitel na ah NLD in gual zawh na hong ngah mahtase leh U Newin leh Galkap lubawk pawlkhat in ha za ahih man in kumpi tokhom tung ah NLD te tu kha sak lo uhhi. NLD ten kumpi hongsep cih thadah amakai pi nu uh ahi Pi Aungsansuhkyi leh apawl te banmat in thung sung ah aki den natawh, inn ah aki khum cip tawh cih bang in hongom in, pawlkhat te gampua lam hong tung uhhi. Galkap thuneih na tawh kawlgam hong ki uk toto phot in, hun hong pai tohtoh ciang Kawlgam zong gamdang hong ban zo nawn lo, hong kiam semsem, hong gawng semsem, a guh guak bek in hong om peetmah ta hi. Galkap kumpi hunsung pen galkap thuneih na hi mawk ahih man in gamsung sumpiang khempeuh galkap lubawk te ip sung tung khin aa mipi tading bangmah om nawn lo hi.

Ei a mipi te pen galkap te pawta, kuli pua in ki om aa, taiban kipai in ei leh ei anguai pua in mawtaw lam ki to in, galkap sakhan ki lam in, lei ki bawl in ki gim mahmah hi. Hih zah aa na akisep hang in sum ngah cih tha dah sat(vuak) ki thuak kha thei lailai hi. Sum muh na om lo ahih man in nek tawm ding zong honghaksa pah mawk aa, tua bek tham lo den aa ih cih samah bang in pawta, taiban tam lua ahih na tawh khantoh na ding lampi limlim mipi ading in omvetlo hi mawk hi. Tua bang zah dong aa gentheih na hong om teh mipi in zong gamdang pai in sum leh pai zon ding cih pen hongkul ta hi. Tua hang in Ngainganzi (Politic) zong ki ngaihsun ngam zo nawn lo, lau na tawh ih ki dim aa, nisim in galkap ten hong sat(vua) tam maw, hong man tam maw, gal hong tung tam maw? cih patauh na tawh ih ki dim aa, tua kawm kal ah nek leh dawn ih haksat na hang in ngainganzi(politic)thu ih theih aa ih sep dingsang in gamdang pai leh sumbawl pen ei ading lungnopna khat hongsuak zaw ta hi.

Gamdang apai gam (3) na atungte leh gam(2)na aa om pawlkhat te in Kawlgam sung ah aom lai uh banglo in gamdang atun uh ciang ngainganzi(politic) hong thei in, hong lunglut uh aa, hong vei uh hi. Galkap kumpi khut nuai ah kumpi nasem te sang in gamdang pai te honghau zaw mawk pah uhhi. Banghang hiam cih leh kumpi nasem ten khasum kham ngeilo uh aa, kumpi in anasem te a khamkhop ding, aki cing in khasum pia zo lo uhhi. Bang hang aa hizah dong in kumpi in anasem te khasum aki cing in pia zo lo hiam cih leh kawlgam leisung sumpiang pan angah uh hi ta leh mun tuamtuam man angah uh sumte pen thauvui thautang lei na in zang uh aa, tua ban ah galkap lubawk pawlkhat in amau ip sung ah aguanguan man uh ahihi. Tua alei uh thauvui thau tang tawh mualtung mi thautawi te kap cih tak in kap uhhi. Banghang in kawlkumpi in hih zah tak in mipi hong en lo, hong don lo hiam? A hang pen hong ngaih loh man zong hi pah sam lo hi. Kawl biak na, Kawl pau, Kawl ngei na pen Kawlgam bup sung aa omkhempeuh in ih zuih pih tek theih na ding cih deih na tawh hi bang aa hong bawl uh ahihi.

Kawl te ngaihsut na ah banghiam cih leh Mualtung mi Kawl (Bama) lo khempeuh pen an nek tui dawn, niik ten puansilh ki sam sak mahmeh leng tua aki sap uh tawh hongbuaibuai lel ding uh in, Nainganzi(politic) lam hong lunglut zo nawnlo ding uh in atawp na ah ei Kawl te khut sungah hong lut khin(kawl minam hong suak khin) ding uhhi. Tua ni ciang Kawlgam pen Kawlpau, Kawl biakna, Kawllai namkhat bek ki zang ding, Kachin, Shan, Chin …etc.. akipan minam tuamtuam cih bang om nawn lo ding a tawntung in ei kawl ten thunei den ding cih a ngim na uh hi zen hi. Kawlgam ah Kawllai, Kawlpau ahi lo minamdang (Kachin, Shan, Chin ect…) te Lai leh pau tawh buaih(degree) ki ngahthei nai lo hi. Buaih (degree) ciang cih thadah tan(5) ciang zong kisinsak nai lo laihi. Hihzah dong in Kawlten mualtung minam (Kachin, Shan, Zomi (Chin) ect… ) te hong nengniam mahmah aa ih vek in kawl minam suahsak hongsawm in, kawlbiak na hong zuih sak sawm hi. Biak na lampan ci leng Matupi khuapi huam sung ah singlamteh khat phuk ngei uhhi. Mawtaw lamzik pi zong Yangon pan ciahto leng Mongzua khuapi ciang bek hoih aa tua pan ei khamtung lam khempeuh hoih nawn vetlo hi.

Tua bangdan mah in mualtung mi om na mun khempeuh ah khantoh na gentham ding bangmah sepnei ngei lo uhhi. Sen mipil, makai pa ahi Maw Si Dong in agam amakaih na ah athumeiletpi pen banghiam cih leh ka minam, ka lai, ka pau, ka biakna akhantoh na ding ahih nak leh minam dang ahi kagam sung aa aom nam keke te ka that mangzong in tua ka thahna pen ka maan kei aa ahi zong in ka minam ading in ka maan hi (Wrong is Truth)cih ahihi. Ka maan loh na pen ka maan hi(Wrong is Truth) cih thu meiletpi tawh Sen gam hong uk in makaih aa tua a thumeiletpi pen kawlten hong la(tuhkhu ih ci diam) in Kawlgam hong uk hi. Cih nop na ah Kawllai, Kawlpau, Kawl biakna akhantoh na ding ahih nak leh mualtung mi nam keke khempeuh ka that mangzong un ka thahmang na uh pen khial mah ungh, ahih hang in ka minam ading ahih nak leh ka khial tuan kei uh hi cih na ai ve. Tua hang in Kawlgam sung ah tuni ciang Tawlanzi (တော်လှန်ရေးသမား) hong pian khiat na leh kawlgam tuni ciang ih zawn ih ngau na, ih khantoh loh na ahang pi ahihi. Hun hongpai zel in 2008 kum ciang galkap kumpi mah in thukhun (constitution)hong bawl leuleu aa tua thukhun tawh tuni ciang hong uk uhhi.

Tua thukhun (constitution) sung ah Pyine (ပြည်နယ်) kumpi sem ding pen ei pyine ciat pan ei tel theih hi lo in kumpi pa in hongsehsak suk ziau ahihi. Tua ban ah galkap te pen lawtdaw khempeuh ( upper house/ lower house) ah zakhat ah sawmnih leh nga (25%) ki hel khin uhhi. Kawlgam lan (Flag) zong athak in kilaih hi. Cih nopna ah 2008thukhun pi(constitution) tawh tuni ciang hongkiuk na pen Democracy taktak hi lo atuh(a lim) bek hi in galkap uk na sungmah ah kiom lai hi. Galkap in zakhat ah 25% percentage tawh hong uk lai cih na ai ve. 2008 kum aa akibawl thukhun tawh kizui in 2010 kum party sung (ပါတီစုံ) kitel pi hong om leuleu aa, galkap te phuat khiat ahi USDP (ကြံ့ခိုင်ရေးနှင့်ဖွံ.ဖြိုးရေးပါတီ) te in gualzawh na hong ngah in kumpi hongsem uhhi. Galkap te party ahih hang in Party min tawh hongpai aa, party cih min tawh hong uk limlim uh zong pen galkap in thaumuk tawh hong uk uh sang nuam kisa zaw in, suak ta ihki sa zaw tham pekpek hi. Ih suahtak na pen galkap hun lai aa pawta puak, taiban pai, ki sat(vuak) cih te hong om nawn lo in khua khat leh khua khat kikal gamdang huh na tawh mawtaw lam hong ki ziik in, phone zat hong nuam zaw in,gilbem sung aom te pawlkhat hong khah khia in abeisa hun tawh ih et ciang tampi tak in ki khangto zaw aa zong nuam ih sa zaw mahmah hi.

Party cih min khat tawh hong uk bek uh zong hih zahin nuam kisa in, ki khangto tuam mahmah ci leng, ei mualtung mi te ii ih deih ahi ei leh ei ki uk ding, ei pau ei lai tawh buaih (degree) ngah thei ding, ih gam leisung sumpiang khempeuh ei leh ei in zeek theih ding cih te hong ki pia leh gamdang zong pai kul nawn lo ding aa, gamdang mi te hongpai zaw ta ding uhhi. 2008 kum akibawl thukhun tawh ki zui in 2015 kum kitel pi anihvei na kibawl zo leuleu aa NLD party ten gualzawh na hong ngah uhhi. Tulai tak aa kumpi asem USDP party te in 1990 kum lai hongbat kei nak uh leh 2016, March kha pan in NLD party in Kawlgam ah kumpi tokhom tung hong luah, hong tu ding uhhi. NLD pary cih pen mipi in ih deih leh ih ngak lah mahmah Demrocracy maan taktak tawh ki uk na adeih leh a zang nuam party lian khat ahih man in 2015 kum kitel pi ah gualzawh na hong ngah uh pen lungdam huai mahmah khat ahihi. A hizong in NLD ten Kumpi tokhom tung ah hong tut uh hang in 2008 thukhunpi hong laih zawh kei uh leh angeina mah hong bang lel ding aa, 2008 hong laih zawh uh leh kawlgam hong hoih in hong nuam mahmah ding hi cih ki lam en hi.

2008 thukhunpi ahoih aa hong laih zawh na ding leh ih deih federal demrocracy taktak tawh hong uk theih na ding un thu nget na ah ih phawk tek ding thupi hi. Galkap uk na pen mualtung miten haksa kisa in, kawlgam buai na pen ngainganzi (politic) hi, sabuai tung ah kikup theih hi ih cihcih sam hang galkap ten thautawi mawk uh ahih man in thau pen thau mah tawh leh do kul ding, thau pen khutpeek tawh daltheih hisam lo ahih man in ci in mualtung mi thautawi hong piangkhia ziahziah hi. Kachin, Shan, Karen, Kaza(karenni), Mon, Zomi (Chin), Kazian, Zakhai mualtung mi khempeuh in thautawi lo om lo hi. Tua bang aa thau tawi in kawlgam kumpi hong do toto kawm mah in sabuai tung ah ngainganzi(politic) thukikup ding kumpi tung ah hong ngenngen uhhi. 2012 kum pan kipan in kawlgam ah kikap khawl na (ceasefire agreement) hong bawl khia thei uh hi. Kikap khawl bek hipan in nainganzi(politic) tawhkisai sabuai tung ah thukikup khop na kisam lai ahih man in, thuki kup khop na a pian theih na ding in 2015, Oct (15) ni in ((NCA) Nationwide Ceasefire Agreement) cih kawlgam bup huap in kikap khawl na thukim na khat mualtung thautawi pawl(8) te leh Kawlkumpi in letmat hong thuh theih uhhi.

Tua NCA tawh kizui in nainganzi(politic) tawhkisai mualtung mi te leh Kumpi (kawlte) kikal thukikup na hong omtoto ding aa ih deih dan leh ih ngim na abat leh kawlgam pen Federal Demrocracy ki uk na tawh hong kalsuan ding hi. 2015Kum, December (16)ni in Union Peace Dialogue Join Committee (UPDJC) ten agelh uh ahi Framework for Political Dialogue Draft(FPDD) thulupi abawl khit uh U Teinseng tung ah ap na nei uhhi. Tua FPDD tawh kizui in 2016Kum, January(15)ni in kawlgambup huap in nainganzi(politic) kikuppi khat mi(700)ki hel in neih ding sawm uhhi. Cihnop na ah 1947kum, Feb (12) ni aa kibawl Penlong thukikup na bang mah in anihvei na Penlong thukikup na hi ding cih na ai ve.Ahih zong in tua bang dan aa ki uk na hoih aom theih na ding in bangtan hun sawtding hiam cih pen gen theih hi lo aa, kum khat, kum nih, kum sawm, kum za zong sawt thei aa, nikhat zong sawt thei hi. Kawlgam hoih na ding tawhkisai in pawl khat in hoih takak thei lo ding hi aci pawl om thei hi. Kawlgam cih pen leitung mah hi aa leitung tuam khat hi tuan lo hi. Pasian in hoih sak nuampeuh leh asung aa atengte lungsim leh kumpi asem(kawl)te lungsim honghei sak in hong hoih thei lah lo hi lel hi. Pasian in sep zawh loh nei lo hi. Ei mihing lam pan ih muan taktak zawh loh man hi lel hi. Ih sep na tungtawn in Pasian in thupha hongpia ding hi. ZCD leh NLD party pen banghang in mipi in thapia pha deuhhiam cih leh galkap ten thaumuk tawh hong uk in kuamah ih pau ih phun ngamloh laitak in, ZCD makai Pu Cin Sian Thang leh NLD makai Pi Suhkyi te thungsung ah an ngawl in aom hun tam mahmah ding hi.

Kawlgam pen tawmtawm hong kikhel na ahang zong Kawlgam hoih na ding ahun uh leh aneihsa uh apia khia te leh thunget na tawh mapang te hang hi kici thei hi. Banghang hiam cih leh gambup naingazi(politic) cih pen ut bangbang aa kilum let ziauziau thei hi sam lo aa, asiat leh kum bangzah sunghiam khat sia in, ahoih leh zong kum bangzah sung hiam khat a hoih phot kul hi. Mualtung mi te in ei leh ei ki uk aa, uk na, thu neih na (power) pen midang (kawl, vai, mang) te khutsung tungsak loh ding ih deih pen leh ih ut pen ahihi. Kawlgam sung pan inntuan(gamkhat in ding) ding cih na hi lo in pyine (ပြည်နယ်) khempeuh kigawm khawm gam lian khat(Union)gam hoih piangkhiasak ding cih ih deihpen ahihi.

Kawlgam ah kawl te bekbek in thunei in amaubek lian in, amau khutsung ah sila(sal)bang aa adang teng ih om loh na ding, amau zong ei ma khutnuai ah sal (sila) bang aa om tuan lo ding, ei mau leh ei mau tek ki uk ding cih na hipen hi. Federal cih ciang in gamkhat (Union) sung aa akipawl, aki hel pyine khempeuh in akikim in thuneih na kibang ding, thuneih na hawm khawm cih na ahihi. Genteh na in ah Center Government (ဗဟိုအစိုးရ) in Sum laidal/ sum tang bawlkhiat(or)pei khiat theih na thuneih na, gamdang tawh kizop na (embassy), kakuaizi (defense, ကာကွယ်ရေး), meileng, vanleng tawhkisai thuneih na te kipia in tua lo adang thuneih na khempeuh pen mualtung mi ei pyine tek tawhkisai thukhempeuh, genteh na in pil na lam, cidam na lam, lamziikpi cih akipan, pyine kumpi (ပြည်နယ်အစိုးရဝန်ကြီးချုပ်) sem ding ei leh ei pyine ciat in tel ding cih atuatuam ei leh ei ki uk na, thu neih na pen Federal ki uk na ahihi. 1962,March(2)ni aa galkap in kawlgam bup kumpi thuneih na hong lak na ahang zong Federal ih cih pen inntuan(gam khat aa din) na hi, tua ahih man in Federal in ki uk mawk leng mualtung mite hong inntuan tek (gam khat in ding) mawk ding ahih teh hoih kei, galkap in kawlgam tawmvei ih uk kul ding hi ci’n paulap hongzong uh aa hong uk uh ahihi.

A taktak tak in ci leng Federal cih pen den aa ih gensa mah bang in inntuan(gam khat aa din) ding cih na hi lo in gamsung aa aom sa pyine khempeuh kigawm khawm in thuneih na hawm khawm ding, ei pyine tek ah thuneih na neitek ding, kawl te bekbek in thuneih na nei lo ding, kawl ten amau kawl(bama)mun teng ah thuneih na nei ding, ei mualtung mi te om na ah kawlten thuneih na hong nei sese lo ding cih na hi zaw hi. Tua thupen kawlten athei lo hi lo in Federal tawh ki uk mawk leng mualtung mite om na teng ah thuneih na kinei kha lo ding aih ciang, kawlgambup sungkhempeuh ah ei bek in thuneih na neinuam ih hih teh cihtawh kawlgalkap in honguk suk hi zaw hicih ihtel ding thupi hi. Demrocy ih cih in banghiam cih leh mipi thuneih na cih na ahihi.

Mipi in mee (vote) tawh kumpi (vuangi) semding te ih teel aa ih teel ten azawh leh kumpi (guangi) hong sem uhhi. Mipi khempeuh in kumpi na kisem thei kim sam lo ahih man in ko mipi te in, ih vek in kumpi semthei lo ih hih teh, tamlua mahmah ih hih teh ko tang in kumpi nasep (vuangi) hongsem in ci aa ih mee (vote) tangkhat tawh ih sawl hi lel hi. Thunei zaw pen ih sawlpa hi loin asawl te in thu neizaw cih na hihi. Tua ih sawl te in mipi ading nasep hoih hongsem zo taktak hiam cih hoihtak ih et cing ding ei tavuan hi leuleu hi. Sawl ziau aa hoihtak asep dan ih et kik kei leh khantoh na om tuan khawllo thei hi. Mihau ten anasem te hoihtak asep leh asep loh uh a et mah bang un, en zong ih sawl ih teel (vuangi) kumpi nasem ten hoih tak asep leh asep loh en cik aa ih om ding hongthu pi mahmah leuleu hi. Ih deih dan aa asep kei leh kiteel kik ciang ih sawl, ih teel nawnloh ding, mee (vote) ih piak nawn loh ding thupi ding hi.

Hoih lo ci aa natheih pen na sawl, na teel kik teitei leh nang amawh na hi aa, nang khialh na hi ta ding hi. Demrocray ki uk na sung ah ih suan ih muan, mihoih mahmah ih teelsiam ding thupi hi. Na mee(vote) tang khat in thu nei mahmah aa thupi mahmah hi cih ih phawk ding kisam hi. Banghang hiam cih leh kiteel ciang in nang athupi pen na hi aa nangsang in athupi zaw, thunei zaw kuamah om lo hi. Na teel na bangbang in hongpai ding ahihi. Tua a hih man in Demrocracy ih cih in mipi thuneih na cih na ahihi. Federal Demrocracy Sanit (ဖယ်ဒရယ်ဒီမိုကရေစီစနစ်) ki uk na hoih tawh hong ki uk ding ih deih pen ahihi. Timothy S.Nangpau