Na zi na itlam ki langsak in

Na zi na itlam ki langsak in

Na zi in, ka pasal in hong it hong khual mahmah hi a cih theih nading lampi tuamtuamte lakah nam sawm tawh zite tungah itna kilak khia thei hi.

Zite a khual lo, khualna lungsim a nei lo pasal pawlkhat a om hangin pasal a tamzawte in a zite uh it-in khual mahmah uh hi. Ahi zongin tua bang kawmkal ah gamtat luhek pawlkhatte in khat veivei a it lo a khual lo bangsak thei uh hi. Tua pen pasal khempeuh in tel kim lo uh hi.

Tua bang thute a om manin a pasal in lah itna lak khia kisa mahmah, a zi in lah a pasal itna hawmthawh-in a nupa un itna hangin kitawng thei uh hi. Nupa kaal sungah tua bang thu a om loh nading le pasalte in a zite uh a itna hanciamtaka lahkhiat tantan kul se lo a, a gamtatna khempeuh ah a zi a it a khualna a kilang ding deihna tawh hih lai a gelh ka hi hi.

Teel ding nihta om hi. A hoib le a hoih lo om khawm ahi manin, na tel zaw pen a hoih ahi dingin limtakin ngaihsun in. Bang hangin teel ding nih kikoih sese hiam cih leh nangma lungsim nang sim loh in telcian lo ahi manin, a koizaw pen in ka zi ka itna lakkhia zo pen ding hiam cih nang le nang in teel in.

1** Na zi an huan meh huan, “ Lim mahmah ei”, cihsak zaw ding na hiam? Ahikeh na nu meh huan dan nam khatpeuh hilh ding na hiam? Na lawm na gualte zi ii an huan meh huan siam dan peuh na zi tungah gen kikkik ding na hiam?

2.) Nasep hanciam mahmahna tawh na zi na khualna kilangsak zaw ding na hiam? Ahikeh na innkuan sungah innkuan lutang na hina a kilang dingin na zi nasep gimsak zaw ding na hiam?

3.) Na zi in, inn nasep khatpeuh ah nang hong konlawh khak ciangin maitaitak in huhpah lel in. Ahikeh na nu in, inn nasep tawh kisai napa a buaisak ngeiloh lam na gensa thuteng mah gen kikkik den in.

4.) Na zi kiangah hong it ing, hong ngai ing, i lu tunga om samzang malte le khuamuhnate in thu a gen ni, i teek i huai hun dongin lobang kitul ni maw ci hamtang ding. Ahikeh numei peuhmah tungah itna ngaihna kamkhum gen ngiat lo ding. Zawhthawhna in hong nei thei, ci-in kam hun zaw ding.

5.) Na zi in nang huhna le panpihna kisam mahmah hi cih na theih leh hunin panpih pah in. Ahikeh, hong huh in hong ci lo ahi manin, kitheihmawh bawl inla bang mah a thei lo bangin om hithiat lel in.

6.) Na zi in, nang adinga hong sepsak hong bawlsaksa nate tungah lungdam ko in. Ahikeh, kong sepsak kong bawlsaksa tam luata hi. ngaihsun thei le cin hi sangin ka thu nong man zawk lai ding hi, ci in.

7.) Kaal khat sungah ni khat, na zi ading hun pia in. Amah tawh mun khatpeuh ah paikhawm inla hun nuam zang khawm in. Ahikeh, khat vei mahmah zong na zi tawh hun nuam zangkhawm ngei kei in. Sum le pai bei lel ci ziau lel in.

8.) Na inn sung khempeuh na zi lungkimna bangin puahsak lemsak inla, na lupna lukhung ahi a, lupna khaan sung mun khatpeuh ah na nupa maan uh suang in. Ahikeh, na lupna khaan sungah nungak liapaalte maan bekbek tawh na lupna khaan sungteng nangma thuin zem in.

9.) Nang a dinga khut gim khe gim thuaka a bawl nate thupisimsak in. Ahikeh, tua bangte khawng gimthuak tak kei, sum tawh kilei thei lel, gim liang, tawl lianga sep ding ki-naman kei, cihsak in.

10.) Thu khatpeuh hong gen ciangin, limtak ngai inla a mittang mah en gige in. Ahikeh, numei thugen peuh thupi kei ci inla phone toksanin, video peuh etsak hihiat lel in.

Teel ding thu nihta om hi. A hoih khat le a hoih lo khatta om hi. Mi a tamzawte in a hoih lo pen kizang mun mahmah se citciat hi.

Hih thute pen Laibu sung pan Zolai tawh a kilet khia kik ahi manin, ahi bang lianin kilet kik loin Zolai tawh a hoih zaw ding le a theih baih dingin kilet zaw hi. A dang tampi om lai ahi manin, a lunglutte in comment ah na gelh un. Lungdam, Job Cinpi (Zomi laisim nuamte)