Na zi in nang adingin bangteng haksatna thuak hiam ~ Job Cinpi

Na zi in nang adingin bangteng haksatna thuak hiam ~ Job Cinpi

Itna khakhia in: Pasal neih ding cih pen numei hoih khat a ding in thubaih hilo hi. numei hoih cih ciang in numei siangtho/ numeipil te gennopna a hihi. Numei pawlkhat te in a neksim uh hong tampian ahih man in, a kua neihsa ne zaw hiam cih pen amau le amau hong ki thei nawnlo uh a, thua man in pasal khatpeuh hong kai ziau thei mawk uhhi. (pasal neih ding a baihngaihsut khempeuh tua bang numei hi cih na hi pah lo a, pawlkhat te cihnopna ahi hi.)

Tua a hih man in, numei hoih khat a ding in pasal neih ding cih pen thubaih hi zenzen lo hi.

A masa pen in a neutung a kipan a kem a khoi ahi a Nu le Pa angsung pan in hong paikhiat ding uh pen thubaih hi zenzen lo hi. a pasal a ngaih man in, a teknu / a tekpa pen Nu le Pa mah hong cih kul mawk hi. lungsim sung pan hongpai a hilo, lamsiamna lel tawh mi khat pen Nu le Pa ci a, minvawh ding pen thubaih hi zenzen lo hi. Tua hi a, a pasal a it a ngaih na hang in a Nu le Pa zong a it a ngaihsak ding hong kisam pah hi.

A ma Nu le Pa inn sungah a utut in om thei hi. A hih hang in pasal hong neih tak ciang in a pasal te innsung ah mo thak a hih na tawh a maizum mah mah hi. A zahtak huai mi dang khat tawh (interview), kimuh ding pen khuaul ziat le vei ah kai thei a hih man in, a ma a ding in, a hanciam kul mahmah ding hi mawk hi. tua a hih man in amah pen ni tampi sung inntek tang thei lo ding a hih man in zum mahmah ding hi. aNu aPa innsung ah nek le dawn nuam a sa zaw te ading baih lo zaw lai ding hi.

Nau hong pai ding uh a, haksat na pen hong kipan ta hi. Naupai a hih man in annduh hong kikhel thei mawk hi. Nidang in a duh mahmah khat zong hong duhlo thei a, a duhngeiloh khat zong duh mahmah thei hi. tua bang hun ciang in a duh khempeuh genngamlo a duhloh khat zong hamsapi in netantan thei uhhi. A naugil uh hong vah tetet uh a, hong hekvek lo tektek uhhi, tua pen pasal pawlkhat te in khual theilo uhhi, ann tamneklua-a gilvah pak na leng zong ki thuaklah mahmah ahih leh kha 9. val bang a gilsung a naungak a pua numei te pen bangzah tak in haksa ding ahi hiam.

Hih pen pasal pawlkhat in a numei te pen naupai ding mah a, PASIAN samsiat hi cipongmawk uhhi. tua pen thungaihsun lo te kampau a hihi. Pasal te zong zingsang pan in nitak dong khua-ulkai in nasam ding a PASIAN samsiat sa te hi na pin, nasep ding pen kihta mahmah hi hang. Tua a hih man in, khat le khat kikhual ding a kisam hi cih nop na a hihi.

Nau hongsuak uh ciang in nuntakna luangkham ahih man in, sihtheihna guamsung a nawk uh ahihi. a nau neih uh pan kipan in hunawng cih pen amau a ding in hong om thei nawn lo a, inn-nasep ding leh a ta tawh hong buai mahmah uh a, a pumpi uh zong kipuah man nawnlo uhhi. a nau neih tung in a tha uh bei mahmah ahih hang in, ei zogam khamtung lam te leh khua nei tuamtuam te ah pen bang mah kingaihsutsak se lo in tua cih kikoih lel hi. a duh khatpeuh a om hang in genngamlo uhhi. tua bang te zong thumuh loh na leh nuntak haksatna tawh a kisai ahih man in kimawksak theih om tuanlo hi. (paulkhat te bel thei mahmah ahih hang a, sum le pai a bei ding nasalua a hih man in a theilo peuh ki neih uhhi.)

Nausuak tanei cih tawh pauhlap kizong thei lo in, lo kuan singpuak ding leh inn nasep ding pen hong sem veve uhhi. pasal pawlkhat te, na zi in bangsem hiam ci-in kidong leh bang mah sep nei kei innnasep bek sem ci uhhi. inn-nasem te pen bangmah asemlo dan khat in ki mumawk hi hang. inn nasep pen a baih mahmah ding sa uhhi. inn nasep a baih loh na papi innngak den te bek in tel uhhi.

Tuabang te pen innkuan sungah thutheihna le thumuhna tam lo a hih man in a hi thei thu leh theihsiam ding khat in ka ngaihsun hi. (a zi te a ding in bel theihsiam ding bel baih in um kei mawk ing. ) Nau hong neih khit uh ciang in a mel a-sa uh a nungaklai uh tawh hong kikhai mahmah uh ahih man in, pasal pawlkhat te lungkia in om thei uhhi. (Nupi na hih hang in kipuah hahkat ding zong kisam hi.)

Pasal pawlkhat in kaNu le kaPa sang in kazi gumzaw ngei kei ning ci uhhi. a zi sang in aNu le Pa it zawk cih pen Nu le Pa it mahmah cih na a hih man in, nak hoih mahmah hi. A hih hang in nang mah bang in, a Nu le Pa a it mahmah nazi in a ma Nu le Pa nusia in nang kiang ah hong bel a hih lam phawk in la, a hoih pen ding leh a lungkim theih pen na ding in na zi tung ah bawl in.

Nupa kikal ah itna pen khahkhiat ding a kisam mah mah thu hi a, tua itna in mawhna maisak a, mawh kimaisakna in kilemna piangsak hi. kilemna om peuh leh innkuannuam hong suak a, innkuan nuam i cih in PASIAN deihna leh vangam malep a hihi. Innkuan nuam a suak thei ding in TOPA in thupha hong pea ciat ta hen. Job Cinpi (Zomi laisim nuam te)