Na Values! ~ Dimno’ Pa

Na Values! ~ Dimno’ Pa

Papi pawlkhatte pen a tangval lai un zu leh sa tawh kidiah in nu leh pa, u leh nau khual ding cih thadah amau thalawhsa na ngawn khom lo-in, sum leitawi liang, a thaman ding uh lakhol liangin zu dawn in nuam sa uh hi. Inn ah aom zong, gamdang ah aom zongin kikhual cih peuhmah om lo hi. U leh nau, khuapih tuipihte adingin kimanna khat mahmah zong om lo-in, piang kei zaw leh cih dekdek liang dingin gina lo lua mahmah uh hi.

Tua bang pi mah tawh zi hong nei-in, ta hong neih uh ciangin lamdangpi in hong kikhel toto uh a, zu hong ngawl in, tep leh muam hong zang nawn lo-in biakinn lam hong manawh uh a, pawlpi sungah muan leh suan, leh sawltak theih dingin makai mun dong ah hong kipia lai uh hi. A nuntakna pen upmawh loh zah dong dingin hong kikhel mawk hi.

Pawlkhat leuleu pen a tangval lai un gamtat hoih in kham theih guih theih a tuamtuam a kipan zu, za cihte peuhmah zangh kilkel lo-in, pawlpi sung, khuasung leh kipawlna tuamtuam ah muan leh suan, zatthangzang dingin panmun tuamtuam la in, khua leh tui khantoh nadingin mapang panin mapang lai uh hi. Etteh tak in kipak huai mahmah hi.

Ahi zongin zi hong neih ciangin a tangval lai hong bang nawn lo-in, kikhel pi-in hong kikhel hi. Zu hong dawn in, zatep hong kisin tawm a, zi neih khit ciangin nitak a vak nawn lo ding kim lai, nitak vak hong kipan mawk hi. Kipawlna tuamtuam ah zong kihel zo nawn lo-in, biakinn na ngawn zong nipi sim in hong tung zo nawn lo hi.

Tangval lai zu dawndawn khat, zi hong neih ciangin zu hong dawn nawn lohna leh, a tangval lai in zu dawn het lo khat in zi hong neih ciangin zu dawnpi in hong dawnna thu ka lungngaih ciangin a zite tung ah tampi kinga kha dingin um ing.

Zi hoih i ngah kei leh bel i mailam nuntakna ding hong lauhuai pha mahmah ding a, zi hoih i neih khak leh bel na dang khempeuh sangin leitung i nuntaksung i ngah khempeuh lak ah a mannei pen hong suak kha ding hi.

Tangval zu dawndawn khat in, numei hoih lo khat tawh hong kiteen khak leh tuate innsung baangkua pen a mansa hong hipah ding hi. Ahi zongin tangval gamtat hoih khat, Pasian a it khat in zi hoih khat hong ngah a leh bel tuate innkuan sung pen vangam malep hong bangin hong lawh cing pha mahmah ding uh hi.

Michelle Obama in Barack Obama pen kumpi a suah ding manin a teenpih hi lo hi. Pasal hoih, pasal gina khat in numei hoih, numei gina khat a ngah khak man leh a zi panpih, a zi thapiakna hangin kumpi inn dong a tungzo uh na hizaw hi.

A nungak lai-in a dam mahmah na lawmnu, na zi pen nang tawh a kiteen a kipan hong dam theih het kei leh zong nang tung panin guhnatna khat ngah kha ahih na meel kithei lo ahih manin na kisit tel pha in.

Numei i hih leh zi hoih suah sawm in, pasal i hih leh zong pasal hoih suah sawm tek ding hang a, tua in i man (values) hong suak ding hi.

By,
Dimno’ Pa
November 7, 2017