Na tate na it leh thu hilhin, lam maan zuihna thuak sak in

Na tate na it leh thu hilhin, lam maan zuihna thuak sak in

Lai Siangtho sungah “na ta na it leh ciang duai tawh sat in,” ci hi (Paunak 23: 13, 14; 29: 17). A cidamna dingin na tate kakuaisi kisun sak in. Nu le pa pawlkhat in a tate a tanglam lo itna tawh it kha uh hi. Hehpih, khuangaih nading munte ah koih zanzan zawin, a kul lo munte ah ki-it sak, kihehpih sak, kikhuangaih sak mahmah uh hi. A tanglam itna tawh ih tate ih thuaksak ding hi zaw hi. America gam le Europe gamte ah tate ciang tawh sat cih thadah lungkim kei leh tate in 911 mekin palikte in nu le pa bang hong man ziau ding uh ahi hi. Human right uang lua ta ahi manin Lai Siangtho tawh kituak khin tuan lo kha ding hi. Ahi zongin America gam ah a om Zomi te in America gam dan mah zuih loh a phamawh ding ahi hi. Zomi te pen nidangin sang pan sangsyate in hong satin inn pan nu le pa in hong sat hi. Tua bangin a uang lua kisatna thute hangin tuhun a tate sat lo bikbek ding cih Zomi contact tawh a kigam la lai hi phot hi. Lai Siangtho in bel na tate na it leh ciangduai tawh sat in, ci ahih manin a thumang het lo, sat ek dinga kilawm na tate na sat khak phial leh zong a lu peuhmah pan sat ngei kei inla, a taw pan sat in. Lu pan kisat kivuak pen khantawn kiciamteh thei a, a taw pan sat lehang a zun a ek tawh pai khawm in mangngilh thei hi.

Tate a siat ding na deih leh

Tate a siat ding na deih leh sum hong nget zahzah pia ziahziah in. A vanzatte nang mahmah in hepsak tawntung in. A deih peuhpeuh leisak inla, a ut bangbangin ta sak lel in. Nipi sangkah kikhopte sawl se ken la, kum 21 dong a ut bangbang in koih in. Naupangte’ mai ah na ut bangbangin pau inla, na ut bangin ciamnui in gamta lel in. Laibu hoih lo lim hoih lo le video et ding khawng kham se kei in. A gamtat a kampau a hoih loh hangin nuihsan lel in. Mihoihlo tawh a kithuah hang kham kei in. Mi tawh a kitot leh na ta gum in.

Tahan Baptist Church Golden Jubilee Magazine 1959-2009, laimai 286.

Tate na it leh

Tate na it leh thu hilh in. Antang khat ii manphatna gen in. Na sem nuam dingin sin in. A pil dingin pantah in. Na zinte tawh an ne khawm sak kei in. Ankuang um khop loh a phamawh munte ah a kihhuai mite le a zahtak huai a siangtho zinte syate mehtui kuang khat sung ah sikkeu kitaih kha dingin suak khawm sak kei in.Zomi te ih kihhuai nuntak khuasak an nek tui dawn ih kihhuai zia kilang baih mahmah hi.

Na tate ann a nek ciangh antang khat zong kia sak lo-in a kuang a zut kilkel dingin sinin. Antang khat manphatna le sum le paii lo tawh meh lim an lim a kine zo lo ahihna thute thei sak zelzel inla, ankuang zahtakna tawh a gamlum lo theithei in tawisak inla, amau an nekna pakaan ciat sawp sak pahpah in.

Na mo le na tute na it leh

Na tate in na tute ngek lai lua pi-in lo a kuan san loh nadingin vaihawm in. Naupang lo kuan san lianga sum thalawh sum zonna hangin a ci uh hong na leh a bei sum tam zaw lel hi. Ih sih suah khit ciangin min sialin, tamlo lianga ih kikah keei sangin, na nuntak lai un na tute na tapa le na mo in a kepsiam ding, a zuun siam ding, a it siam ding, a huai siam a makaih siam dingin tawsawn zaw in. Zolo le vokbuk ah tate nusia lianga sum zonna in zato hong tunpih zaw thei a, zato khatvei tung le’ng ei ni khat pek khat zong sum lut pongmaan a nei lote’ kum khat thalawh sum in dam zo lo hi. Na ta na mo nau a paai laitak an lim a nek ding le a thamaan ding haza kei in. Tha nei lopi-in nau suak leh sum tam bei zaw dinga, nangma’ hamsat lunggim nading mah hi veve hi. Kiha za lua lehang “Ak ta duh gawl kilawh khuh” a cih kibang lian hi. Teek ahi khinte tungah genna hi nawn lo zaw a, teek ahi ding mote tungah genkholhna hi zaw hi.

Evan. Suang Dal