Na Pa’ Thupha na sang nuamhiam? ~ Jam Daniel

Na Pa’ Thupha na sang nuamhiam? ~ Jam Daniel

‘PA’ cih kammal sung ah Pasian in vangliatna koihsak a, Pate in tua vangliatna tate tung’ hongzat uh ciangin a samsiat ten samsiatna ngah thei a, thupha apiak ten thupha ngahtakpi uhi. Pasian in hih theihloh a neilo Pasian ahih mah bangin I leitung PA te zong tate tungah hih theih a nei Pate ahi uhi.

Tua ahih manin samsiatna sangin THUPHA i deihzawk leh tate in sep ding le zuih dingte zuih zawh ding thupi mahmah ahih manin anuai a thu 4 tate’n zuih zawh ding hanciam ding hi hang. Na zuih leh thupha hi dinga, na zuih nop keileh thusia hipah ding hi.

1. Na Nule na Pa zahtak in.

Thupiakna sungah a 5 na ahihi. Na kampauna tawh zahtak in. Na gamtatna tawh zahtak in. Absalom in a pianna pa langpan in do do mawk ahih manin, a pa khutlum tawh a sihloh hangin, hoih a kisak penna akimuan penna tawh sih sia in si hi.

2. Na Nule na Pa thu mang in.(Efesa 6:1; Kolose 3:20)

Piancil 22 sungah Isaak in a pa thu a manna I mu hi. Sih ngamna dongin a pa thu mang hi. Jesu in a Pa thu mang in sihlawh hi.

Nule Pa thu mang photphot peuh lehang tawmvei sung haksatna a om zongin a sawt loin nopna zing ni thak suak kik veve hi.

3. Na Nu le na Pa thuhilhna ngai in.

Ta hai, ta thumanglote in thuhilhna sang thei lo uhi. Tapil in, ‘ka nule ka pa tung ah ka sin theih ding thu tampi om hi’ ci’n muhna nei hi. Paunak Lai Siangtho pen thulhilhna vive hi a, pilna tawh kidim pah hi.

4. Kum tam khin na Nu teek na Pa teek hoihtak in na kep ding ahihi.

Nule pate a kum uh tam semsem in, a tha uh nem semsem hi. Zileta na neih khit teh na nu teek na pa teek nung a zui zui na hi a, amau na bawl bangin hong kibawl ding ahihi. Na tate’n hong bangci bawl leh ut na hiam?

Pate’ kampauna vanglian mahmah ahih manin, nang a ding bang thu pau khialeh ut na hiam?

• Na pianna PA it in.
• Zahtak in.
• Pahtawi in.
• Thu dong in.
• A thu mang in.
• Hehpihna nei in.

Thupha na sang ding hi. Jam Daniel, ZCF Kota D’sara