Na Nu Thu Na Mang Hiam? ~ Cin Ngaih

Na Nu Thu Na Mang Hiam? ~ Cin Ngaih

Nute ni ah thugen tampi te in khitui luang liangin nute itna thugen uh a, thungai mitampi te inzong khitui luang liang mah in thungai uh hi. Ahih hang thugen tampite in nute ni ah nute thumang ding khitui luang liangin agen tawm uh a, tua mah bangin thungai tampite in zong khitui luang liangin nu thu mang ning e ci in ngaihsun a angai tawm mahmah hi.

Bishop khat in agenna ah “Nu” cih kamal ah lungnopna bangzah aom dia ci hi. Mangkang te in thu poimawh le lungsim koih asak mahmah uh 3 tel uh a, tua te in mother, home le heaven hi in tua lak ah apoimawh le lungsim akoih pen in mother ci uh hi. Nu cih pen nu neinawnlo te kiangah gen ding hoihlo hi.Tua bangin ih gen ciang nute hong it dan leh neulai a hong kep dan te ngaihsun uh a khitui luang uh hi.

Abraham Lincoln in “tulaitak a ka hihna leh hiding a ka ngaihsutna te pen ka nu tung a ka leibat te hi in, hong thungetsakna te banghun banghun ah ka phawkden a, tua te in hong zuiden in ka nun ah hong belh cip,” ci hi.

India gam lapi (anthem) aphuak Rabindranath Tagore in Pasian bawlsa te lak ah ahoih pen in numei te a hi hi ci hi. Napoeleon in Piantit gam ii kitangsap pen in nute ahihi ci hi.

Nute kiangah om pen lungnopna tampi om a, ta te ban ah pate zong alung uh nuam hi. Khuazin,khualak vak ahizong inn ah ciah ciang akizong masa in nu te a hi hi. Na nu koi ah om ahih keileh nu koi ah om kici hi. Nu te kiangah om pen lungnopna kha muangna om hi. Eimi khat khualzin na pan inn ah aciah ciang azi omlo ahih man in atate kiangah na nu uh e acih leh atate in apa kiang ah”kanu pawisim ci in agen le, kulsakeising e aw,” ci hi.

Ta te ban ah pa te in zong khualzin na pan nu te phawk thei mahmah uh a, ahih hang aphawkna gen nuam pak lo in “tun bel tate ngai tasam ing e cithei uh a, tua bang ciang alawm dang ten tate sang tate piangna (nu) angai hizaw nicia”, kici uh hi. Nu omlohna innkuan pen nuam hetlo a hi hi.

Nute pen tate a dingin thupi mahmah hi. Hebrew nupite in atate uh pen nawi apiak kawmkawm in thu hilh uh hi. Laisiangtho in thumanglo te thu kihilhlo te pen zawlta na ci hi. Paul in nu te thumang ding pen Khristian ngeina na ci hi. Tua ahih man in Pasian zahtak a thu um mite in nu thuhilhna zui uh hi. Mosses in kum 12 sung anu thu hilhna ngah in zuih ahih man in leitung si le sa deihna sangin Pasian mite tawh haksatna thuak ding tel zaw hi. Tua hi a si le sa deihna zuihna in nu thu manglohna a hi hi.

Leitung ah akikhial mahmah in tate in na asep thei uh ciang nute thuhilhna zuih nawnloh a hi hi. Gamla pi ah khualzin sum zongin om in nute sum khakloh ding tawh vua cih zong ki om thei a tua bangin na om le Pasian kiangah mawhmai na dingin ngen in. Lai gelh siam khat in hih bangin gen hi. Nu le pa thumanglo te leitung thak ah lutlo ding ci hi (1T).

Khristian ka hi akici te in nu te thu mang loh pen Pasian thu bangci mang thei ding hiam? Thupiak 10 lah ah “na nu na pa zahtak in”, ci hi. Nu te hong hilh banga zuihna in tate a ding in khialna, minsiatna leh maizumna te pan a kipelhna a hi hi. Bangzah ta in pil in siam in om mah leng zong nute pen Pasian in ei hong hilh ding a hong piak a hi hi.

Na piangna nu thu manga na it takpi leh zi le ta na neih khit hang in na nu in na kianga om nuam sa ding hi. Na pianna nu na it takpi le athu zong na mang ding a hi hi.

Koimun koimun ah na om zongin nu thumang na hih nak leh na pianna nu alungnuam ding hi.

Nu cih kammal ah lungnopna kha muanna te tampi om ahih leh tuni in ngaihsun iin, na hoihna ding a thu hong hilh na nu thu na mang takpi hiam? Cin Ngaih