Na Nu na it taktak hiam

Na Nu na it taktak hiam

May 10,2015 Sunday
Mikheem peuh in Nu te peen ki it ciat a, ahizong in I it daan kibangkim lo in atuamtuam in itna kinei ciat hi. Pawl khat te in Nu te it mahmah ahimna in Nu te adamlaai in phawkkha lo zawzen in asihsantak ciang namtuikaai liang in kidiik damdam in kap damdam uhhi. Pawl khat te leuleu in Nu te it mahmah in ngailua mahmah uh ahihman in khualzong zinsan ngamngiatlo in inn phualzaang ah kualpih ngemngam in Uipi saguhbawk vil bang Ann ngawldekliang in phual ngaak uhhi. Pawl khat te leuleu in aom om napan Nu te a it man in hopih tangtang in akampi bekmah tawh a itna angaihna thu gentangtang uhhi. Pawlkhat te leuleu in Nu te ngai it lua mahmah ahihman in adeihdeih leisak in sum le paai tampi puak in itna lakciat uhhi. Hih te kheempeuh peen Nu te I itna hi a ahizong in hihbang a I Nu te I itna hang in I Nu te kata in ong it taktak ci in ongciamteh ding in nalam en hiam? Nalungkim akim zotaktak dia? Nadong kha ngei hiam cithu TA kheempeuh in ngaih sut huai kasa mahmah hi.

I Zomi sung ah Ipi te ahihkei leh I Nu ten nau acin uha, Nau a-ihmut ding adeih uhciang Nau Awih La cihkhat lungleen huaitak leh thangah huai tak khat nanei ngeungeu uhhi. Tua La in “ Nau aw ongkhang mengmeng inla, Huan a Maaidawng vabang in.Huan a Maaidawng batzawh ciang., Nu Tha Pa Tha kheek in aw Tuai aw Nau” naci uhhi. Hih nau awihla peen I Nu ten isepding leh aomziading a adeihpeen uh thu hiding in kalam en hi.

Ongkhang Mengmeng In:

Ta te peen akumtawh kituak in khang in Lian to mengmeng a pilcing in Nu le Pa abuaisakse lo in picing ding in ongdeih masa uh hi.
Huan a Maaidawng Vabang in:
Ta te ici ilu damngiatding, itha tang gol haat khangual te saang thahaat zaw golzaw ding in ongdeih mahmah uhhi.
Nu Tha Pa Tha kheek in aw, Tuai Aw Nau:

Tate khanglian in cimdam ngiat a pilna zontheih zah zong ding ban ah Nu le Pa Lungsim pumpi tawldam sak in, Zi leh Ta suan le khaak neihding leh Nu te Pa te sepding teng asepsak zoding., alang ah ma apangzo ding in ongdeih mahmah uhhi.

Sum le paai piazo in aduh adeih uh piazo am, ikam tawh ong it ing Nu aw acihciang beksang’ Ikhan nading, Icidam nading ongdaal thei guihtheih khamtheih, gamtat siatna atuamtuam te peel in., Nu te mahbang a Zi le ta nei in Nu te lungkham ma in alungkham lohna ding geelsiam a, Nu te geelna bang izuih leh Nu te lampan ong it taktak hi ci in atamzaw in ciamteh uhhi.

Nute peen- Leitung ah Missionary Lian peen aseem te ahi uhhi.
Nute peen- Leitung ah Tate ading in Sang Sianu lianpeen ahi uhhi.
Inu te aitsiam kim ding leh I Nu ten kata in ong it mahmah hi acihdong ahanciam zoding in Topan thupha ongpia ta hen.

Thang Khawm Pauzomi