Na mu kha ngei hiam?

Na mu kha ngei hiam?

Ke’n mu kha ingh. Tulaitak hunsiat kawmkalah Online panin Live tawh gamthu hitaleh, Covid thu hitaleh thu tuamtuam a gen tam mahmah ta hi. Zaknop hi. Thu tampi kitheih lawh hi. Thupi mahmah uh sa ingh. Sum tampi bei in a mipihte uh theih huai thu tampi ong hilh uh hi.

Pawlkhat bangin ih telloh ding lau lua kisa dam gen mahmah uh a, niangtui bang hong dawn zel phot zawzen uh hi. Amaute in hong deihsak lua uh ahihmanin an ne kawmin Live pan thu gen uh a, zasan bang thak lua hiding hiven a nap uh bang tolh liangin mainul tawh nul kawmkawm uh hi.

Khat veivei a thugen uh sangin a gamtat zia uh muhnop in kilunglut zaw thei hi.

Ging dakdak lianga an aneek kawmkawm un “A kiza hia, nong mu thei uh hia, Comment tawh nih leh thum in hong gen dih vevua” ciin zusa kua ah zusa a om tam cia kuul khikhe a ih et bangin hong en uh hi. 4/5 in comment a piak khit uh ciangin niangtui pen ging daap daap in hong dawn kik phot uh a, tua khit ciangin dam takin ong haam phot uh hi. A gen ding uh kiza nuam mahmah hitaleh ih Online leina sum hong bei ta mawk hi.

Ke’n mu lua e. Ahizongin amaute hong deihsakna uh, a thumuhna uh leh a ngaihsutna uh ong hopsawn nopna lungsim pen thupisa in ka paakta mahmah hi.

More: A theihuai Hai 2 thu

Nikhat ni ciang hun leh sum no lam pan hitaleh na thugen uh a ngai mipi lam pan hitaleh a tawm bei theithei dingin a kigingsa in hong om unla, neek leh dawn lamte thu na gen sung un hong masak kei dih un. An neek hun om a, niangtui dawn hun a omah bangin thugen hun zong omsak ni. Na thugen uh a za nuam mahmah, ko WIFI nei lote adingin baih deel lo hi. Lungdam, Zomi Quavadis