A semnuampa kisawl nuamlo, a semnuam lopa kisawl
Khat vei ka innlak sanggamte khat in ko zong ka pa uh Pawlpi Upate in nasep nop bangbang hong genin ci veh e, ko ka pa un a sem nuam kei-a hi ven, ong ci se hi. Ka lungsim sungah kei bel ka sepnop ka siauhsiauh zong a ngah lah hi ingh ei, tua hi, ih kilamdanna ka ci hi. Khat veivei a semnuam taktakte kisawl nuam lo se a, a sem nuam pha khol loteng kisawl se hi. A sem thei dingte kimangngilh bawlin a sem thei khol lo ding teng kisehseh se hi.
Hun khat lai-in “Halelujah” a ci nuam lote piangluite kici a, tuhun ah “Haleluijah” cih theihna bek tawh piangthak kisakna pen piang sualte kici nuam ta hi. Nidangin Pawlpi in a sapnop loh a zatnop loh Syate Pasian’ zat loh kici a, tuhun teh Pawlpi le kipawlnate in Pasian’ thumaan-thutak a gen tangtangte sam nuam nawn lo, zang nuam nawn lo uh hi. Sunglam gal ci-in mite a gengente pen amau mahmah sung lam galte na hi pah thei uh hi.
Nop nawn loh hun hong tung ding hi (the time is coming)
Paul in Timothy tungah a tuah ding thu hamsate a gen ahi hi. Mite in thuhilh Sya citakte a sap nop nawn loh hun hong tung dinga, amaute in amau’ deih bang thu a gen thei Syate bek a cial thuah hun hong tung ding hi, ci-in Timothy Laikhakna ah gen hi. Tua bang Thuhilhkhial Syate in tangthu phuahtawm peuh ngaihsutpi-in nei ding uh hi. Lai Siangtho sunga kihel lo (non-canonical) tangthu-tuanthute bekbek hilhhilhna le Lai Siangtho theician lopi a hilhna pen thuhilh khialsyate’ kipatna ahi hi. Tua ahih manin Pastor sem ding, tuucing dingte in bangzah in Lai Siangtho sim kul, sin kul, kan kul, theih kul, kigin kul cih thu hong mu saka, kidop huai mahmah hi.
Hih bang Syate in mite’ zaak nop theihtheih bek thu gen uh a, tulaitak Zomi te sungah tua bang mite bekbek a kisap hun a kizat hun ahi hi. Tua bang Syate pen mite’ duh dan, deih dan, pahtak danin thugen kiva mahmah uh a, mite in zong sannop zaknop neknop sa mahmah uh a, ciak ngeingai uh hi. Timothy banga thuhilh cian Syate a kideih nawn loh hun, a kisap nop loh hun, a kizat nop loh hun, a theihpih nop loh uh hun hong tung ta ahih manin, Pawlpite le Christian societies te ki-en pha a, ih kidop mahmah ding hong thupi ta ding hi.
Tuhun ah gammial nasepna zah mah in Pawlpi sungah thuhilh khial Syate’ thuhilhna tawh mipite’ upna laigil a manthan loh nadingin a citak a hanciam thuhilh Sya citakte’ nasepna, hangsan taka thumaan gen veve-na tawh Lai Siangtho upna doctrine pite a kepcing ding uh pen a thupi mahmah hun hi ta a, tua pen Pastor citakte ii vaipuak ding hun hong hi ta hi. Mite in thuhilhkhial Syate’ thuhilhna hangin thumaan thutak upna (sound doctrine) pen deih nawn lo duh nawn lo bek hi loin muhdah ta mawk uh hi. Thu taktak ahilh Syate nangawn muhdah in langpan ta mawk uh hi. Satan in thuhilhkhial Syate zangin Pawlpi suksiat ding vaihawm tawntung hi.
Mite in thuman a ngaih noploh hun, amaute’ zaknop thute bek a gen ding Sya a cial thuahthuah hun hong tung ding hi. Amaute suangdalin thuman thutak ngai nuam nawn loin tangthu phuahtawm (myth) peuh ngaihsut pi in nei ding uh hi (2Timothy 4: 3-4). Tua ahih manin tuhun Pawlpite in ih ngaihsut phat ding thu khat om a, tua pen “Pasian in zang mahmah” cih thu kidop huai hi.
Pasian in hua pa zang mahmah a, hih pa zang lo hi cih sangin eite’ in Pasian’ thumaan-thutak Lungdamna thu taktak a suut theite ih zang nuam hiam? Ih cial hiam? Cih kingaihsut huai hun hong hi zaw ta kha ding hi. Pasian’ thugen pa kideih nawn lo a, mihing’ duh le deihdaan thu gente bek kideih hi. A sem thei pa, kipua seh a, a sem thei lo pa kila hi. A sem nuam pa kizang lo a, a sem nuam lo pa kizang, Lungdamna thu gen pa kisam nuam loin thucin thutaang genpa bek thuhilh dingin a samsam ih hi khak ding a thakin kidop huai hi, ci thu… Evan. Suang Dal
Comment piaknop aomleh...