Na lungsim tung peuhleh
Tua nitak ka lup in zan 11 sat khin hi. Tawlet pua lam ah guahsi phin seuhseuh hi. Zanpuan sungah ka lutsuk kawm in ka kiphotsakna nai ka sawk phei hi. Ka nai na khawl hi. Nai tang lei mangngilh hita veng maw. Hizah khuadam lak ah tawh kik ding ka kizo kei hi. Ka phone la in agamla aa om ka nu ka gal sap hi.
“Nu … ka nai tang bei in zing ciang ka zum uh ah kimuhkhopna nei ka hih uhteh zingsang nai 6 in phone hong sam inla hong phong in maw.”
“ Aw … hi hen oo leh boih” alang khat ah mumang kawm aa hong dong ka nu aw ka za hi.
Zingsang phone hong gin ciang ka man hoih laitak tawh kituak hi. Apua lam zong khua zing lai hi.
“Boih no … tho ta oo … kimuhkhopna nei ung ci hi lo na hia?”
Ka khutlam in nai ka en hi. Zingsang nai 5 le minute 40 …
“Nu nang zong … nai 6 kong cih ai ve. Ka ihmut suak lai ngel hiven … tun nang hang aa kisam lo pi in lol kha pah kai maw.”
Lungkim mello in ka nu ka gal awt san hi. Ka nu in bangmah hong gen kik lo hi. Kei zong phone ka khia hi.
Kithawi saisai in innpua lam ka pai khia hi. Khua hun ahileh vok in guahsi te zong leng lai hi. Bus mawtaw ka ngak kawm in ka khutte tat in ka khe te akilanglo in ka diang seihseih hi. Sanggam melmak khuvak nailo in ka gei ah samkang khin putek le pitek nupa khat aom lam kha phawk kha hi. Akiho kammal te ka ngai kha hi.
“Nang hangin tuzan thapai ihmu theilo ing aa … nai khat manglang aa nong phot … tun hiah sawtvei pi ih ding kha pah ve” ci in putek pa in pitek nu kiang ah gen hi.
Himah … bus phual pan alol pen bus minute 5 sung ka ngak lai uh kul ding hi.
Bus mawtaw hong tungciang mawtaw tung ka kahto pah hi. Mawtaw hawlpa pen khangno khat ahi hi. Mawtaw tung ka tunciang mawtawh kong khak in mawtaw pai pah hi.
“Hei … hei … mawtaw hawlpa anuai ah uham nih mawtawh tung kah nailo pi. Hi zah aa khuadam lak ah angak zawh uh sawt khin peuhmah. Bang hang ngaklo aa paisan na hia?”
“Aw … phamawh kei lua ei. Tua te ka nule ka pa aive.Tuni ka mawtaw hawl masakni ahihciang aa kei hong en aa hong pai hi ei.” ci in khangno mawtaw hawlpa in hong dawng samsam hi.
Thakhat thuin ka khitui hong kicing hi. “ ka nu aw … zan hoihtak ihmu ngamlo aa kei hong phawng hita aa maw. Boih ziakai niteh hong ci lai veh.” Phone sung pan kapa hong thugen khat ahi Jude minam te paunak khat ka bilkha ah kaza ciai ciai hi.
Apa in atapa van apiak hun ciangin atapa nui hi.
Atapa in apa van apiak hun ciangin apa kap hi.
Nang e na khitui aluang nai hia? Kei ka hihleh tu ciang mah ka mit ah khitui kicing lai hi. Sam akang khin nulepa te hong itna ka thudon khakloh kum bang zah asawt khin tam maw. Tua itna te vangik khat bangin ka ngaihsun kha ngei hi. Amau ii hong lung himawhna kammal te tawh hong dotna te lunglut lo lua in ka dawnloh hun naktam inteh maw. A awmsung uh ah itna tawh akidim lam ka phawk khak loh hunte aw tam si inteh …
Azenzen in nulepa te hong itna hisang telsiam zaw leng amau zong hizang lungdam zaw tham ding in um ing. Ki lungduai sakin amau hong gente ngai in hong dotna te uh dawng kik in na damdam uh hiam ci in phone khat vei hopih leng. Amau tawh nikhat ni nih sung bang va om khawm leng … hite bang ahaksa pi hipeuh mah ahia … ih lungsim tung peuh leh… Ref: Internet
Posted by Peter Suumpi at Zingsol.com
Comment piaknop aomleh...