Na khat na kisam lai hi

Na khat na kisam lai hi

Jesu in itna tawh tua mipa en a, “Na khat bek na kisam lai hi. Pai in la, na neih khempeuh na zuak khit ciangin mizawngte tungah na sumkhotte va pia in. Tua hi leh vantungah sum na hau ding hi. Tua khit ciangin ka nung hong zui in,” a ci hi. – Mark 10:21

Jesu in a khualzinna a zom dingin a paikhiat ding laitakin mi khat hong tai-in a mai-ah hong khukdin a, “A dik siapa aw, nuntak tawntungna ka ngah nading in bang hih ding ka hi hiam?” a ci hi. Jesu in, “Bang hangin kei midik hong ci na hi hiam? Pasian simloh kuamah a diktatzo omlo hi. Mi that kei in; numei tungah mawh kei in; mi’ neihsa gu kei in; mi khem kei in; na nu na pa zahtak in, cihna thukhamte theilo na hi hiam?” a ci hi. Amah in, “Sia aw, ka neutunga kipanin hih thukhamte khempeuh ka zuikhin hi,” a ci hi.

Tua ciangin Jesu in itna tawh tua mipa en in, “Na khat bek na kisam lai hi. Pai in la, na neih khempeuh na zuak khit ciangin mizawngte’ tungah na sumkhotte va pia in. Tua hi leh vantungah sum na hau ding hi. Tua khit ciangin ka nung hong zui in,” a ci hi. Tua mipa mihau khat ahih manin hih thu a zak ciangin, maikhing in a dahsa in a paikhia hi.

Jesu in a kiim a om a nungzuite en in amaute kiangah, “Pasian’ Ukna sungah mihaute a lut ding uh bangzah takin haksa ahi hiam?” a ci hi. Nungzuite in hih thu a zak uh ciangin lamdang sa uh a, ahi zongin Jesu in a thugen zomlai in, “Tate aw, Pasian’ Ukna sungah lut ding bangzah takin haksa ahi hiam? Pasian’ ukna sungah mihau khat a lut ding sangin phim bilvang sungah kalaoh (camel) khat a lut ding baihzaw lai hi,” a ci hi. Tua ciangin amaute in lamdang sa mahmah uh a, “Tua bang hi leh kua in hotkhiatna ngahzo ding ahi hiam?” a ci uh hi.

Jesu in amaute en in, “Mihingte’ ading in hi zolo mah hi; ahi zongin Pasian ading in ahimawh thu hilo hi; Pasian ading in na khempeuh hi thei hi,” a ci hi. Tua ciangin Peter in ama’ kiangah, “Ko zong na khempeuh nusia in nang kong zui uh hi,” ci-in a gen ciangin, Jesu in amaute’ kiangah, “Hi mah hi; ke’n kong cih in-ah, keima’ hang leh lungdamna thu hangin a inn, a sanggam pasalte, a sanggam numeite, a nu, a pa, a tate, leh a leitang, khat peuhmah a nusiate in tukhang hunin a zah za khat innte, sanggam pasalte, sanggam numeite, nute, tate, leitangte ngah ding uh a, bawlsiatna zong ngah ding uh hi. Hong tung ding hun ah zong nuntak tawntungna ngah lai ding uh hi. Ahi zongin tuhun laitakin a lian ahi mi tampite tua hun ciangin a neu hi ding uh a, tuhun laitakin a neu ahi mi tampite a lian hi ding uh hi,” a ci hi.

Sanggamte aw, nang koi ah na om a? Tulaitak a a lian na hia a neu? Mizawng na hia mihau? Kisap a nei lai na hia a nei nawnlo? Topa Jesu in mimawhte zong dingin hong pai hi. Hong sam hiauhiau hi. A aw na za nai hiam? Jesu’ hong deih bangin na nungta hiam? Pasian hong sapna/hopihna aw a za theikim dingin mimal kim Pasian in thupha hong piata hen. Amen. Fellowship News, ZCF, Delhi