Myanmar gamsung ah nasemte atawmpen nitha K4800 in ki ciangtanta

Myanmar gamsung ah nasemte atawmpen nitha K4800 in ki ciangtanta

Myanmar gamsung ah nasem te ii atawmpen nitha “Minimum Wage” pen nikhat K4800 (US$3.52) ahih keileh naitha naikhat K600 ($.044) in ki ciamtehta cih Coconuts News tungtawn in kiza hi.

Hihvai tawh kisai in Myanmar’s National Committee te’n abeisa December 29 ni in Myanmar gambup “Nationwide” ah atawmpen nithavai akhentat ahihi. Tua khentatna pen Union Minister for Labour, Immigration, and Population Thein Swe in kipsakta cihi.

Abeisa 2015 August kha akipan Myanmar gamsung ah atawmpen nitha “Minimum Wage” pen K3600 ($2.64) ahihi. Tua panin tu’n K4800 (US$3.52) ah aki khantota ahihi.

Hih “Myanmar’s National Minimum Wage” vaitawh kisai in thukhun khentatna pen nasem mi 10 pan atungsiah anei sumbawl “business” khempeuh in azuihding ahihi.

Hihbangin Myanmar’s National Committee te’n khentatna aneihtheih nadingin nasepnei Employers te, nasemmi Employess te leh kumpi thunei Government Officials tuamtuam tetawh kamkupna aneihkhit uhciangin avaihawm uh ahihi.

Ahi zongin nitha K4800 cihpen tawmlailua hi, nekledawn Living Cost pen khangsemsem ahih manin, innkuan kivak nadingin kicing zolo hi ci’n Labor Organization te’n genkhia uhhi.

Atawmpen nitha ciangtanding vaitawh kisai in kamkupna akineih hunlai in “Confederation of Trade Unions of Myanmar” te’nzong atawmpen nitha K5000 leh K6000 kikal ciangtanding in thusunna nei uhhi. Ahi zongin nasepnei Employers te’n tuapen nialbawl uhhi.

Hihvai tawh kisai in avaihawm ahi “State and region-level committees” te’n kuppihna, deihgenna “Suggestion” ka muak uh ci a, ahi zongin hih atawmpen nitha aki ciangtanpen tuzawh ni 60 sungin kizangthei tading cihi.

More: Myanmar Tourism Ministry te’n Hotel saap khiamsakding ci

Myanmar kumpi thunei te’n nitha pen atawm theithei in ciangtanding Pressure tammahmah cihi. Banghanghiam cihleh Southeast Asian gamvengte sangin nitha aniamzawk keileh gamdang panin Myanmar gamsung ah sumbawl “Foreign Investment” honglutlo khatheiding a, Manufacturing Sector kiamkhading cihpen kumpi thunei te ii lunghimawhna hileuleu hi.

Myanmar gamsung ah mikhat ii kumkhat sumlut Average Annual Income per capita pen $1140 bek ahihi. Sawltak #zomidaily